Mark 1

John Baptist di nirausi rena ago

(Mt 3.1–12; Lk 3.1–18; Jn 1.19–28)

1Mina bi Sei di mida#1.1 Sei di mida; bura bedakai mina ago nufa de. Iesu Keriso di ago buni yomakai kora reyo. 2Sei di ago niyo amiye Isaiah yaku bura reyo#1.2 niyo amiye Isaiah yaku bura reyo; bura bedakai niyadi vene yaku bura reyadi nufa. kana:#Mal 3.1

“Sei yaku makai niyo, ‘Nai ago moi raga redo amiye yi budari nifeidegida.

Yi ida moi dogo rego.’

3Amiye yokoi di goroka bi gagani autu sanari raka nido,#Is 40.3

‘Varika amiye di ida dogo resi

ini dibo ida moi rorobo rifa.’ ”

4Ma John Baptist gagani autu sanari vegu no feresi moi etagae rina ma Sei yaku ini vegu no koite makuna di babatiso di ago nirausi resi ina vene babatiso magamo.#1.4 John Baptist gagani autu sanari…babatiso di ago nirausi resi ina vene babatiso magamo; bura bedakai John Baptist gagani autu sanari…babatiso di ago nigamo maka nufa. 5Ye Judea gagani tora noibanu vene tau ma Jerusalem vene ina rofu baegamadi. Ye ini vegu no niogau regamadi ma Jordan koruri babatiso regamo.

6John di varuka bi kamelo di ueta ma ini gagaba ukita maena bi boromakau di ro. Ini iruku bi kaufa ma kaoro di ona.#2 Kgs 1.8 7Ma nirausi resi niyo, “Na usi baego amiye ini vava yaku nai vava etei riyo, ye na bi rorobo de efuka odesi ini yuka ro di maena younegida. 8Na yaku koru dudu ya babatiso reyaka, idu mina amiye bi Vima kikifa dudu ya babatiso rego.”

Iesu di babatiso rena ma uka maina regika nivena

(Mt 3.13—4.11; Lk 3.21–22; 4.1–13)

9Mirona ituari Iesu bi Nazareth taoni Galilee gutuna baeyo ma John yaku Jordan koruri babatiso reyo. 10Iesu bi evade koru ideri gutuna bae iruruka resi ne reyori bi oma ekeyo ma Vima kikifa bi pune erena kana ina fafau rou reyo. 11Ma goroka yokoi oma gutuna degasa niyo, “Ya bi nai uka maida mida; ada tora gade ya rofu reida.”#Gen 22.2; Ps 2.7; Is 42.1; Mt 3.17; 12.18; Mk 9.7; Lk 3.22

12Ne ituari maka Vima kikifa yaku gagani autu sanari Iesu nifeideyo. 13Ma gagani autu sanari meda 40 amegamori, Satani yaku vegu no reyainedi vonisi, ini uka maina regika niveyo. Ina bi tuma dona nadinasa amegamo ma Sei di naivo naivo vima yaku nari regamadi.

Iesu oyena rutu vene 4 raka niyo

(Mt 4.12–22; Lk 4.14–15; 5.1–11)

14John Baptist moi gira reyadi fufuta rofu, Iesu Galilee ri nesi Sei di#1.14 Bura bedakai ka ourefeidena amena sana di nufa. ago buni nirausi regamo. 15Resi niyo, “Gua bi Sei di meda, ma Sei di ourefeidena amena sana bi atafu okiyo. Yi vegu no feresi moi etagae risi ago buni rofu mokena vari gira aefa!”#Mt 3.2

16Iesu bi Galilee moka daidai tora seriri bogasa bi Simon ini usika Andrew sa koruri fate makugamadi ma veyo, adina ina bi oyena rutu vene. 17Iesu yaku ina vene rofu niyo, “Na usi baefa ma oyena koda rena kana amiye nirutu rena ya rigida.” 18Minari maka ini fate feresi usi diyadi.

19Doba deri bogasa bi uba dubuisa James ma John, Zebedee di mida, veyo. Ina yaku bouti fafau fate veika regamadi. 20Iesu yaku evade uba dubuisa raka niyo ma ini baba Zebedee ma ini moimai rededi vene boutiri feresi usi diyadi.

Amiye yokoi vima no nufa

(Lk 4.31–37)

21Iesu bi ini usi dina venesa Capernaum taoniri boyadi ma evade Sabati medari usa usa yava ideri dui resi amiye nioteimagi kora reyo. 22Ye ini oteimana ago rofu tururu reyadi, adina ini oteimana bi kaere vava nufa amiye kana, ma ago gira oteimana vene kana de.#Mt 7.28–29

23Mina ituari maka, amiye yokoi vima no nufa usa usa yavari raka niyo, 24“Iesu Nazareth amiye, una rofu bi beika ura reisa? Ya bi una moi no regika okiyo ba? Na na diba ya bi kaere—ya bi Sei di Kikifa amiye!”

25Ma emasi niyo, “Babo nisi mina amiye rofu yakusi di!”

26Ma moi seko sako resi ababa nisi ini roaitari yaku diyo. 27Amiye tau bi tururu resi iniye iniye nikaiteyadi, “Mina bi beika? Mina bi oteimana di ida ruaka yokoi mini ini vava nufa! Vima no rofu ago gira madori, neidesi anema yora nidedi!”

28Kamini evade Galilee gagani tora noibanuri ini sina urafo rei diyo.

Iesu amiye tau gade moi buni riyo

(Mt 8.14–17; Lk 4.38–41)

29Usa usa yava fereyadiri, evade James ma John sa Simon ma Andrew di yavari dui reyadi. 30Ye Simon di imokai rema bi gauka resi roaita vaki vaki regasa ekamari varegamo, ma Iesu okiyori evade nioteimaradi. 31Ye mina rema rofu bosi ini vana moisi moi dadiyo. Roaita vaki vaki bi fereyo ma iruku dabara resi nari regamo.

32Uriyenauri meda nei tomu niyori, bi amiye yaku gauka vene tau ma vima no nufa vene tau Iesu rofu afei baeyadi. 33Amiye tau mina taoniri amededi vene ka mina yava ida nefau okiyadi. 34Ma Iesu yaku gauka vene tau gade moi buni risi vima no tau gade meki reyo. Resi vima no rofu ago ga niyaganedi niyo, adina mina vima diba ina bi kaere.

Iesu yaku Galilee gaganiri sina nirausi reyo

(Lk 4.42–44)

35Kamini uriyaku gorogoro meda youna koderi, Iesu bi dadisi feresi gagani autu sanari disi usa usa niyo. 36Ye Simon ini asiyaka venesa maina resi 37baku resi niyadi, “Amiye tau vakoi bi ya maina rededi.”

38Ma nikabai reyo, “Berou rautu eta rofu boi nenadi, ma mironari na ka ago nirausi regida, adina na bi mina dada deyaka.”

39Ye Galilee gagani tau vakoiri disi ini usa usa yavari ago nirausi resi vima no meki regamo.#Mt 4.23; 9.35

Iesu yaku amiye moi buni riyo

(Mt 8.1–4; Lk 5.12–16)

40Refera amiye yokoi Iesu rofu okisi efuka odesi guyaguya nisi niyo, “Ya ura reisa vonisi, ya yaku na moi ruaka rigiya.”#1.40 na moi ruaka rigiya: Mina gauka yaku amiye moi kino redo.

41Kamini Iesu bi iriyeduka#1.41 iriyeduka; bura bedakai gubuyo nufa. resi ini vana moi roto risi mina amiye avaka moisi niyo, “Na yaku ura reida; ruaka ni!” 42Minari maka ini roaitari refera gauka ferei diyo ma ruaka niyo. 43Ye Iesu yaku ago gira nisi evade maka nifeidesi 44niyo, “Amiye yokoi ga nioteima, idu nesi ya kaya Sei ma amiye utari naivo amiye oteimasi yi roaita buni niyo kana ori sisika re. Ye amiye vegedi ya bi buni niyo, Moses yaku ago girari niyo kana, Sei rofu moi ori sisika regiya.”#Lev 14.1–32

45Idu mina amiye yaku disi mina ago nirausi regasa gagani noibanuri digamo. Iesu rofu ago tora niyadi mina resi taoni ariara ma dina bi de reyo. Ye ina bi gagani autu sanari amei digamo, idu amiye gagani gagani tau ina vegika toga okigamadi.

Currently Selected:

Mark 1: kqc

Highlight

Copy