Luke 12

Ofarosi sina di ago gira

(Mt 10.26–27)

1Mina ituari, amiye tau gade gade okisi egogo resi iniye iniye mini etei rigamadi, ye Iesu siko ini usi dina vene rofu nigi kora reyo, “Ya kaya Pharisee vene di yeast nari rei mona refa—mina bi ini ofarosi vegu.#Mt 16.6; Mk 8.15 2Ye beika bi bou riyadi, bi moi ogau rigedi, ma beika bi sui niyadi, bi moi diba nigedi,#Mk 4.22; Lk 8.17 3mina dada beika sina mukunari niyadi, bi vabarari neidegedi. Ma beika sina bi yava ideri kiya mumugu niyadi, bi yava tebori are resi nirausi regedi.

Sei rofu ori regedi

(Mt 10.26–31)

4“Ye nai asiyaka vene, ya nida, roaita maka umuyegedi vene ori ga refa, idu gabi vegu no yokoi ya rofu anua regedi. 5Idu ya oteimagida kaere rofu ori regedi: Sei rofu ori refa, kaere bi ya umuyesi gabi ita mokari makugi di vava nufa, rama ina rofu maka ori refa!

6“Erena keika 5 di davana bi fore keika remanu dudu ba? Ma Sei yaku ina tau noibanu bi yokoi maka toto de nigo. 7Ye yi ada iye tau vakoi ka gokaisanu amedo bi duaiya reyo. Ye ori ga refa. Ya amiye bi isivaga iniye, erena keika tau gade kana de!

Keriso niogau nina ma fufuta mana

(Mt 10.19–20, 32–33; 12.32)

8“Ye na yaku ya nida, kaere yaku amiye di nemokori niogau rego ina bi nai, bi Amiye di mida yaku ka Sei di naivo naivo vima di nemokori makai niogau rego. 9Idu kaere yaku amiye di nemokori na fufuta mago, bi Sei di naivo naivo vima di nemokori ka fufuta mago.

10“Ma kaere amiye yaku Amiye di mida rofu ago no nigo, Sei yaku ini vegu no koite makugo; idu kaere yaku Vima kikifa rofu ini roka moi no rigo, ini vegu no bi de koite makugo.#Mt 12.32; Mk 3.29

11“Ye usa usa yavari, gavana, o ourefeidena vene di nemokori, kota regi ya moi erokoko regediri, yi mokena toe ga moiyagane, gokai sina nigedi o gokai nikabai regedi rofu.#Mt 10.19–20; Mk 13.11; Lk 21.14–15 12Adina mina medari, Vima kikifa yaku ya beika ago nigedi mina ya oteimago.”

Gugura nufa ada de amiye di ago

13Amiye tau gade di fogori, amiye yokoi yaku ina rofu niyo, “Oteimana amiye, nai dubuini nigiya kumo beika baika uni baba fereyo nasa rau reyaine.”

14Nikabai resi niyo, “Ya remanu di sina sina neidegi yi beika baika rau regi di vava na mana kode.” 15Kamini ina vene tau rofu niyo, “Ya kaya nari rei mona regasa beika baika tau rofu udu ga refa. Adina amiye di vegu iniye bi mina beika baika tau yaku de mago.”

16Kamini Iesu yaku mokena ago yokoi ina rofu niyo: “Beika baika tau amiye, ini kono fafauri, muro iruku tora gade iniye rama niyo. 17Dada iniye mokesi niyo, ‘Gokai kamini regida? Iruku aena sana bi koina.’ 18Resi niyo, ‘Yomakai regida: nai iruku aena sana ukero vau resi tora risi nai iruku ma sogona tau gade minari aegida. 19Resi bi na kaya rofu nigida, lagani tauri mina beika tau bi yi. Nai veguri mina beika baika tau kiya kiya iriga vaiga ada regasa amebigida!’ 20Idu Sei yaku ina rofu niyo, ‘Ya bi ada de amiye! Gua mina urusari umuyegiyari, bi kaere yaku mina beika tau ya kaya moi tauri fereyo mina moigo?’ ”

21Resi Iesu ini sina ni vau regi reyo, “Amiye rofu bi makai: kaere bi beika baika tau inaike moiyo, idu Sei di mokenari, bi beika baika tau de moiyo.”

Mokena vari gira Sei rofu aena

(Mt 6.25–34)

22Kamini Iesu yaku ini usi dina vene rofu niyo, “Mina dada ya nida, vegu nigasa amesi beika irigedi, o beika varuka yi roaita yaku akugedi, mokena toe ga moifa. 23Adina vegu amena bi iruku ebu redo, ma roaita bi varuka ka ebu redo. 24Yomina gayo bora erena vefa; ina bi yoya varina, o iruku goena de rededi; dokema, o iruku aena sana ka koina; idu Sei yaku vana redo. Ya bi mina erena ebu rena iniye reyadi! 25Ye ya kaere yaku ini ukari mokena toe moigori, mina mokena yaku ini vegu moi doba rego ba? 26Mina mokena dudu, mina beika keika anua reisa, ye beika resi mokena toe tau moisa? 27Sufari farofaro bi gokai bodedi, mina vefa: moimai de resi varuka de ridedi. Idu ya nida, kini Solomon di varuka burefe tau ka bi mina sufari farofaro kana de.#1 Kgs 10.4–7; 2 Chr 9.3–6 28Sei yaku sufari farofaro imu mado. Mina farofaro bi gua vegu amedo mini, idu agiya bi kufusi makugedi, ma roko nigori, bi ita mokari origedi. Ye yi varuka dudu ya nari rei mona iniye rego, ya kaere bi mokena vari gira keika aededi vene!

29“Ye beika iruku ma koru irigedi di, yi ukari mokena toe ga moifa. 30(Adina mina beika baika tau bi mina konori gagani gagani vene yaku maina rededi.) Idu yi Baba ina diba yasa beika baika koina bi. 31Idu Sei di ourefeidena amena sana maina refa kumo mina beika baika tau ya mago.

Omari gugura tau

(Mt 6.19–21)

32“Ya amiye tau ori ga refa, adina yi Baba bi ini ourefeidena amena sana ya rofu magi ada redo. 33Yi beika baika nufa, bi sero resi fore bi irava vene mafa. Yi beika baika tau omari aefa: mironari fore pausi de no nigedi, ma duma amiye moigi anua rego, ma nurina ka de moi no rego. Ye toga koina de nigedi. 34Adina yi gugura buni tau amededi sanari, yi uka ka amebigo.

Naivo naivo vene kaere nari rei mona rededi

35“Yi varuka mitai ri gira resi yi ramefa orisi toro dudu amefa.#Mt 25.1–13 36Ini varika amiye, rema mena irakuna gutuna dairigori, naivo naivo vene toro rededi kana, amebifa. Ini varika amiye bi rema mena irakuna gutuna dairisi raka nigori, evade maka dadisi ida vena moi eboka regedi.#Mk 13.34–36 37Mina kana vene rofu bi buni tora gade iniye, adina bi ini varika amiye dairigori, bi varena de, ina rofu toro regasa nari amededi dada! Ya vene rofu nida, dadisi ini varika amiye raka nisi moimai regika ini varuka mitai rigo, ma iruku irina sanari amegediri, bi naivo rego. 38Uru tobori baego, o uriyaku vabarasa baego, ina toro regasa nari rededi vene baku regori, bi buni iniye moigedi! 39Idu ya ya diba nifa, yava biyaguna amiye bi siko diba nigo vonisi, duma amiye baego meda nemoko bi, ini yava nari rego, duma amiye ideri ga baeyainedi.#Mt 24.43–44 40Ye toro dudu amefa, adina Amiye di mida bi mokena de rededi meda nemokori baego.”

Vegu rama ma rama de rena moimai rei tavoi rededi vene

(Mt 24.45–51)

41Peter yaku Iesu rofu nikaitesi niyo, “Varika amiye, mina mokena ago bi una rofu maka nisa, ba amiye tau noibanu di nisa?”

42Ye nikabai resi niyo, “Kaere bi vegu rama redo mokena tora nufa naivo amiye, ini varika amiye yaku vava mago, ini yava nari regi naivo vene be di iruku ini meda ramari rau rego. 43Ini varika amiye yaku dairisi baku rego, mina vegu regasa amebigori, bi mina moimai rei tavoi redo amiye bi ada iniye rego! 44Rama ya nida, bi vava mago, dada ini beika baika tau nari rego. 45Idu mina moimai rei tavoi redo amiye bi iniye rofu mokesi nigo, ‘Nai varika amiye bi ari dobari dairigo.’ Kamini ini moimai rei tavoi rena rumana rema tau ugi kora resi iruku irigasa koru gira moiga amebigori, 46.ini mokena de redo ariri ma meda nemokori ina toto, ini varika amiye dairisi mina moimai rei tavoi redo amiye di roaita bado bado nugasi#12.46 di roaita bado bado nugasi; o you makusi. mokena vari gira de aena vene di sanari aego.

47“Ma mina moimai rei tavoi redo amiye, kaere bi ini varika amiye di mokena diba, idu yomakai kana dogo de resi de rego, bi ubobo tora gade rego. 48Idu kaere naivo amiye, ini varika amiye di mokena ina toto resi de reyo, bi ubobo keika rego. Ma kaere moimai tora gade ina rofu maro, ina ka bi moimai tau gade reyaine; ma kaere besa moimai tora gade maro, ka bi moimai besa reyaine.

Iesu bi amiye moi utama okuyo amiye

(Mt 10.34–39)

49“Nai deyaka bi mina konori ita origi. Nai mokenari bi ori katugo kumo! 50Nai babatiso#12.50 babatiso: Mina ini adina bi ini esika esika moina. mago; ma nai mokena toe evade moigida kumo!#Mk 10.38 51Ga mokefa na mina konori deyaka, bi uka amuta moi soka reyaka. Ide, idu ya nida na bi amiye iniye iniye utama okugi deyaka. 52Gua mina medari gutuna kaere ini rema midasa bi 5 amededi, mina okugida; regode berou ma remanu berou utama ma remanu berou ma regode berou utama, makai okugida. 53Iniye iniye utama okuyaganedi: baba ini rumana midasa, rumana mida ini babasa; nono ini vefasa, vefa ini nonosa; radiyaka tora ini radiyakasa, radiyaka ini radiyaka torasa.”#Mic 7.6

Meda di ari vei mama rena

(Mt 16.2–3)

54Kamini Iesu yaku ka amiye tau gade rofu niyo, “Meda nedo eta rofu gutuna seuya yokoi dadi baegori, bi vesi evade nigedi, ‘Mina bi miya regi redo,’ resi bi miya redo. 55Ma meda baedo rama eta gutuna aura rebigori, bi nigedi, ‘Meda sei regi redo,’ resi bi sei redo. 56Ofarosi vene! Ya oma ma kono vesi bi beika ari gua una mago bi diba nigedi. Beika resi gua yomina meda di ari bi de vei mama regi bi ya toto?

Yi tuma amiye rofu uka amuta ni

(Mt 5.25–26)

57“Beika resi ya kaya vegu bi rama ba ide mina de moidedi? 58Yasa uka yokoi maka de nido amiye, kaere yaku ya kota aegi rena koderi, idama gogo kota sanari bobigediri, mina amiyesa vakoi yi mokena moi yokoi maka ri, adina bi makai de regiya vonisi, bi kota rego amiye di vanari ya aego. Ina yaku bi dibura yava nari redo amiye di vanari ya aego, ma bi dibura yavari ya aego. 59Na ya rofu nida, mina sanari de yakugiya bogo kota ae niyo kana metona fore keika mai vau regiya mamo.”

Currently Selected:

Luke 12: kqc

Highlight

Copy