MARK 14

Jisugo gitang karam choi

(Met 26.1-5; Luk 22.1-2; Jon 11.45-53)

1Leimik hangnatai tei kaa- kamaju mah takbai ninado ahee kaihai kasu tiirok takbai tei hang-ngi lesii bam takle, sateichii tingdimei ninado ajaitingshang kati ojamei hang teinii mpougo dakum- piinii makumpii jumsii gitangpo katu pwidi tei fiitu takle; 2dapochiinii ahnyiinii tamle, “Hang-ngi tinglang kaknii sulo, kadapokii mei machiinii nrungtu tangle.”

Jisugo Betani kito thao manuk kapyii

(Met 26.6-13; Jon 12.1-8)

3Sateichii mpounii Betani ki kabam kak, tiigyiira tchiisii kaleipii Simon kilungto mah chiisii kalei tinglang kak, sapwimei hangninanii kairum kabi mai kating thao kui- tubung hangninii poisii gongle; sateichii mpoupeinii thao bung tei tiipaksii mpou phyii gamkii rui- kaipyii takle. 4Sateichii ahnyiirang tiisii ahnyii kak kito lung samou supii kalei mei kangkanii tamle, “Kadajangpii aitiisii kamanuk thao ai tiikadak leipo? 5Kadapokii thao ai sana haisii rekngii sung kisii joitoisii mah kagameigo pyii wobuile.” Sateichii ahnyiinii mpoupei gotei sampeile.

6Nlenii Jisunii tamle, “Mpoupei rang tiimatulo, dajangpii gonyiinii mpoupeigo tiimachang leipo? Mpoupeinii kabi ninado ngoukabi ngam tei gujangpii tiipyii takle. 7Kadapokii mah kagamei teinii taksupii gonyiinii kaswisii bamle, teipiinii gonyiinii tiikanyii tinglang hang kito gonyiinii ahnyiigo kabi tiipyii wobuile, nlenii Inii gonyiigo taksupii kaswisii bamhum lakle. 8Mpoupeinii tiikabuita tei tiitakle; poigoi tang karam jangpii mpoupeinii gu gamkii reipii thao manukpyii takle. 9Sateichii Inii gonyii dakii kasangpii tam leile, sazyii pouryii bamlyii hangki kabi rasam tamsii tat tang karam hangki sapwi mpei ainii tiikabam teido mpoupeigo maningloi tang karam jangpii tam mpat tangle.”

Judasnii Jisugo schoi-choi kakai

(Met 26.14-16; Luk 22.3-6)

10Sateichii keariisiinakhii kak kito mei hangninii Judas Iskariot katupii ainii Tingdimei dakii mpougo pyiitoi tang karam jangpii tat tutakle. 11Sateichii teitei ahnyiinii shii wosek-kii, ntasii seh sanah pyiitangle katu tam mpat takle, sateichii mpounii kada takumpii Jisugo schoi-choipyii tangpo katu tinglang tei fiitu takle.

Jisunii mpouboumeigo kaswisii kaakamaju malot chii katu

(Met 26.17-25; Luk 22.7-14, 21-23; Jon 13.21-30)

12Sateichii ahee kaihai kasu tiirok hang-ngi leimik karei piinei, ahnyiinii kaakamaju malot mah Jaonah kagi piinei, mpouboumeinii mpou dakii tamle, “Kaakamaju mah malot ai chiitang karam jangpii nyiinii kadaki maasii gojangpii tiikada katu mareipo?”

13Teito Jisunii mpou boumei hangna go aitiisii tamsii lang matu takle; “Namdi kitei tat liitlo, teito mei hangninii dwikhii pungsii goneigo kadou tangle; mpou tai tei swiwolo, 14sateichii mpounii tat kaliitki apumpii dateikii tamlo, ‘Madhii- kapyiipiinii tamle, Inii guboumeigo kaswisii kaakamaju mah malot tei chiitang karam ki shang tei kadaki leipo?’ 15Sateichii mpounii mahlyii hang sangsii tiida kabam alangh kasagoi ki shang kadi hangninii goneigo mangou tangle; teiki teikii goneinii nyiijangpii tiikadalo.”

16Teito mpouboumeinii tat tutakle, sateichii namdi kitei tatliit sek-kii, Abangpiinii ahnyii dakii tam kabam takumpii ngoutakle, sateichii ahnyiinii kaakamaju mah malot tei tiikada wotakle.

17Sateichii tingkhiilam Jisunii keariisiinakhii gotei kaswisii gongle. 18Sateichii ahnyiinii mah chiilei- bangpii, Jisunii tamle, “Kasangpii Inii gonyii dakii tam leile, gonyii kak kito n-gu mah chii njoi kalei mei hangninanii n-gu schoi-choichii tangle.”

19Teito ahnyii tei lung kamagetu takle, sateichii mpou dakii mei nsangnsangpii tamtu takle, “I-de?”

20Mpounii ahnyii dakii tamle, “Kok hangninii lung kikii n-gu kaswisii bah karengkai katupii keariisiinakhii kak kito mei hang- niniile. 21Kadapokii meinah sapfii mpou teinii mpou jangpii ryii kabam takumpii tai tangle, nlenii meinah sapfii mpougo schoi-choi kachiipii teinii kadaziikapii kamage tangpo! Mei teipou jangpii manaa m-mang kasunapou mpou jangpii bibwi tangle!”

Bangpiimah takbai

(Met 26.26-30; Luk 22.14-21; 1 Kor 11.23-25)

22Ahnyiinii mah chii kalei tinglang kak, Jisunii tiirok pangkii poisii riitasii hakalang tamle, tiirak takle, sateichii mpouboumei dakii pyiisii tamle, “Poilo, ai ai gu-tchiile.”

23Sateichii mpounii peek hang- ninii poitakle, Saraago hakalang tamle, sateichii ahnyii daki pyiitakle sateichii ahnyiihang tei sak wotakle; 24Jisunii tamle, “Ai ai sat tang karam karanu samtam mah, meimoi jangpii majou mang kapyii gu zai teile. 25Inii gonyii dakii tam leile, Saraa sagong mah sazyii kito kasatai sak tang karam leimik tei gong kasuta Inii darkha riiti gamto sakloi lakle.”

26Teito ahnyiinii lhii kangkii tiisii Olip zang gam tat tutakle.

Pitarnii Jisugo mazhii kalaksam reipii tam kapyii

(Met 26.31-35; Luk 22.31-34; Jon 13.36-38)

27Jisunii ahnyiida tamle, “Gonyii- hang n-gu toisii pakga tangle, dapokii kabi rasam kikii ryiibam takle, ‘Saraanii jaokakoipii gotei gi aitangle, sateichii Jaonah hangtei marou maruk tutangle.’ 28Nlenii Inii ringkhii kalutai, gonyiidoi reisii Galiliki maa tangle.”

29Teito Pitarnii mpouda tamle, “Mei kakimei hangnii n-go toi aikido, Inii n-go toisang toilakle.”

30Teito Jisunii mpouda tamle, “Kasangpii Inii godakii tam leile, tingnei tinghum Ruigangnii kungnakii kasunakii, nangnii n-gu mazhiilak tumkii tangle.”

31Nlenii Pitarnii kisii kisii tamle, “Inii n-go kaswisii katai katang gong kido Inii n-go mazhii kasu tei tiisang tiilakle, sateichii ahnyii hangniido tei takumpii tam takle.”

Jisunii Getsamani toipyii kito kariita

(Met 26.36-46; Luk 22.39-46)

32Sateichii ahnyiinii Getsama- nisii kalat bam kitei gongle sateichii Mpounii mpouboumei dakii tamle, “Inii riita kalei kak, gonyii aikito bamlo.” 33Sateichii mpounii Pitar, Jems ninado Jon go pang wotakle sateichii hangkapii kamage katu ninado lungnyii lunghao tutakle. 34Teito mpounii ahnyii dakii tamle, “Gu rangii hangkapii kamage takle, taine takle. Gonyii aikito bamlo sateichii sakai wolo.”

35Sateichii mpounii doilam chengniikii tat patsii mpounii sazyii koumangsii, mazhiileponii tinglang tei mpou dato tat maju matutang karam jangpii riitale. 36Sateichii mpounii tamle, “Pfii-o, gojangpiinii matum madum tiiwo kalak gale; peek ai gudato poitoi pyiilo; nlenii Inii kamaning kamarei tei sulo, nlenii nangnii kamaning kamarei teilo sii mpounii riitale.”

37Teito mpounii nlaigongle, ninado mpouboumei hangtum tei zyiisii kalei tei ngoutakle, teito mpounii Pitar dakii tamle, “Simon, nang zyiitu takpo? Gonyii n-gu kaswisii pungkado mik raksii bampei lak takde? 38Sakailo ninado riitalo, gonyiinii kahemki liit kasu tiisii; rangiinanii tiinyiile, nlenii pumnii suile.”

39Sateichii nlailoisii mpounii tat patsii, nusam hangtei tamloisii rii- tale. 40Sateichii mpounii nlaigongloi katu tinglang kak ahnyiinii zyiisii kalei tei mpounii ngoutakle; dapokii ahnyii mah miktei hangkapii masui takle, sateichii ahnyiinii mpougo kadapei khekalat tangpo katu tisu takle.

41Sateichii mpounii hangtum kashang tiisii gongle ninado ahnyii dakii tamle, “Gonyii aitoi katang zyiisii ntak leipo? Buitakle, tinglang tei gongtakle, julo, meinah sapfii mpou gotei toinii kem katiimei bah kikii pyiitoi aitakle; 42gungkhii wolo, nje, nyiihang tat tule, julo, n-gu schoi-choi kakaipii tei aiki leitakle.”

Getsamani toipyii lungto Jisugo jum kalu

(Met 26.47-56; Luk 22.47-53; Jon 18.3-12)

43Sateichii Jisunii sam tamlei- bangpii teisek-kii keariisiinakhii kak kito Judas tei gongle, sateichii tingdimei, ajaitingshang kati ojamei ninado katingmei dato kagong saryiikhang ninado tingrang baitui kapungmei meimoigo kaswisii gong- takle. 44Schoi-choi kachiipii teinii meimoigo tiikamangou hangninii pyiibam takle, “Mei Inii kama- twumpii tei gonyiinii kamareipii teile, mpougo jum wolo ninado mpougo tiigatpii gonyiinii saryii kakoimei kangto pang tat tulo.”

45Judas teinii gong sek-kii, mpounii Jiusda tatpi, “Madhiika- pyiipii!” sii tamsii mpougo matwum takle. 46Teito ahnyiinii bah liitsii Jisugo jum wotakle. 47Nlenii teikito sat kaleimei kak kito mei hang- ninanii mpou khanghe kito saryii khangtei chyii mpatsii Tingditupii ki kaleipii khoi tei tat ndang aitakle. 48Teito Jisunii ahnyiigo tamle, “Ka- ragameigo jumtang karam takum- piinii saryiikhang ninado tingrang poisii n-gu jumlesii gonyii gongleipo? 49Tingnei tingneikii Inii gonyiigo Kaswisii Saraa kamaning kilungto ralipyiisii leile, ninado gonyiinii n-gu jum makle. Nlenii ai ai kabi rasam tei gong matwi matu tang karam jangpiile.”

50Teito ahnyii hangnii Jisugo rat toisii pakga takle.

51Rahangmeinah hangninii, kou- nah peimani kaisii Jisutai swileile, ahnyiihangnii mpougo jumlesii tiile. 52Nlenii mpounii mpou peimani tei rat toisii pum makungpii pakga takle.

Jisugo samtak katii katingmeidoi pangkakhii

(Met 26.57-68; Luk 22.54-55, 63-71; Jon 18.13-14, 19-24)

53Sateichii ahnyiinii Jisugo ting- ditupii ki nitei pang gongle, sateichii tingdimei, katingmei ninado ajai- tingshang kati ojamei hangnii mpougo kaswisii gong ndwi takle. 54Pitar tei akak dhiihaisii mpou- taito swisii tingditupii ki kajang tei tat liitle, teito mpounii saryii kakoi- meigo kaswisii mi lumsii bamle. 55Toinii tingdimei ninado sam katii kating meihang teinii mpougo gitang karam jangpiinii Jisu mah kama tei fiitu takle. Nlenii ahnyiinii kama hangninii kado dousu takle. 56Dapokii mei daziikanii Jisu phyiiryiikii kasang kasu sakchyii tei pyiile, sateichii ahnyii mah sakchyii tei njoisang njoisu takle.

57Sateichii mei kangkanii tusatsii kasang kasu sakchyii tei mpou phyiiryiikii poikai pyiisii tamle, 58Mpounii aitiisii katam nyiinii shiile, “Meinii tiikabam Saraa ki ai Inii tiimaga tangle sateichii jangtum- nii tai meinii tiikasu kaki hangninii Inii tiimakhii tangle.” 59Sateichii aitiisii tam kido ahnyii mah sakchyii tei njoisang njoisu takle.

60Tingditupii teinii gungkhii ahnyiihang doi satsii Jisugo ka- chyiinhiile, “Nang mah kado khe- lalak takpo? Go phyiiryiikii ahnyiinii pyii kalei sakchyii tei kadapeipo?”

61Nlenii Jisunii malhiisupii bamsii mah kado khepyii sutakle. Nlailoisii Tingditupii teinii mpougo kachyiinhiile, “Tam makang tang karam nah sapfii mpou Krista tei nangpo?”

62Jisunii tamle, “I-teile,” “Satei- chii meinah sapfii mpou teinii teimaham kaleipii ajiilamto kabam ninado sating gam kamong go kaswisii kahum gonyiinii ngou tangle!”

63Teito tingditupii teinii mpoupei tei hetriitsii tamle, “Aidoito kisii nyiinii fiitang karam sakchyii kada kaang leipo? 64Mpounii Saraago tam kamashyii gonyiinii shiitakle, gonyiinii kadapei maningpo?” Teito ahnyiihangpii Jisu go tei mazhiisu takle, mpou ai taijyii lesii tam takle.

65Teito mei kangkanii Jisu gam- kii poktai maswijoitu takle sateichii ahnyiinii mpougo mik pei aitakle ninado baijumsii ahnyiinii tamle, “Tiwolo, tanii n-go lakpo?” Sateichii saryii koikalei mei hangteinii mpougo kaphyiisii pangtakle.

Pitarnii Jisugo mazhii kasu

(Met 26.69-75; Luk 22.56-62; Jon 18.15-18, 25-27)

66Sateichii Pitarnii kajang kamwi kangto bamsii kalei kak, Tingditupii ki kalei sapwimei ralhiimeinah hangninii gongle; 67sateichii Pitarnii mi lumsii kalei tei ngou wosanii mpoupeinii mpougo jusii tamle, “Nangdo Nazaret ki Jisugo kaswi kalei meile.”

68Nlenii mpounii tei tei mazhii supii tamle, “Nangnii kadapei tam- leipo katu Inii timakle, kadapeipo katu tido timakle” sii mpounii tamsii kagotki tatpat takle, teisek-kii ruigang kongtakle.

69Teito ralhiipei teinii mpougo ngou wosii dato kalei mei dakii nlailoisii tamtu takle, “Mei aipou ai ahnyii kakto mei hangniniile.” 70Nlenii Pitarnii mazhiisuloi takle, sateichii shangniikii sousek-kii kuto sat kaleimeinii nlailoisii Pitar dakii tamle, “Kasangpiinii nang ahnyii kaktole, kadapokii nang Galili kito kaleimeile.”

71“Teito gonyiinii karashii kalei meipfii aigo Inii timakle, sii tamsii mpounii mpouroinapii sheengsii rashii rasat tamtu takle.” 72Sateichii tinglang teisek-kii ruigang teinii hangna kashang tiisii kong takle, sateichii “Ruigangnii kongnakii kasunakii nangnii n-gu mazhiisu tumkii tangle,” sii Jisunii mpoudakii tam kapyii sam tei Pitarnii maning gong takle ninado mpounii tei tei maning gong sek-kii hat tutakle.

Currently Selected:

MARK 14: NAG2

Highlight

Copy