MARK 10

Nounaa n-nou katu mah kaang kito Jisunii ralikapyii

(Met 19.1-12; Luk 16.18)

1Teito Jisunii teibam kiteito tatpat tosii Judiya lungkoi sazyiiki sateichii Jordan karyii lugang tei gong takle. Meimoinii mpou dato gong ndwi wotakle sateichii mpou-jai taiswisii Jisunii ahnyiigo ralipyiitu takle. 2Sateichii Farasismeinii gong mpougo ajai jutang karam jangpii n-nhiile, “Sapfiimeinii mpou nougo n-nou katu ai ajai makpo?”

3Mpounii ahnyiigo khekalatle, “Moses-nii gonyiigo kadalesii tam kakhatpyiipo?”

4Ahnyiinii tamle, “Moses-nii larek ryii mati aisii mei kata hangninanii mpou nougo n-nou kalu ai mazhii lesii tampyiile.”

5Nlenii Jisunii ahnyiigo tamle, “Gonyii lungtei teiju kalei jangpii Mosesnii kakhatsam tei ryiidekle. 6Nlenii tii mpat saroi sekto ‘Saraanii sapfiimei ninado sapwimei ai tiipyii takle.’ 7‘Teijangpii sapfiimei hangni- nanii mpoupwi mpou pfiigo toisii mpou nougo njasii lungtu tangle. 8Sateichii hangna teinii hangninii tiitangle.’ Teijangpii ah nei tei hangna sutakle, nlenii hangniniile. 9Teijangpii Saraanii poi njapyii kalei tei mei kaniido poi kapak sulo.”

10Sateichii ahnyiinii kilung liitsek-kii mpouboumeinii Jisu dato ai kaang kito n-nhiile. 11Mpounii ahnyii dakii tamle, “Pfiimei kata kangkanii mpou nougo n-nou aisii sapwimei kaki manouloi dinchiinii, mpou nou dato mpounii mashung maha aitakle. 12Ajai aitakumpii, sapwimei hangninanii mpou naago n-nou aisii naa kaki tiiloi woleponii, mpoupeinii mashung maha aitakle.”

Jisunii nahmeigo satoi kapyii

(Met 19.13-15; Luk 18.15-17)

13Sateichii abangpiinii dengpyii matu tang karam jangpii ahnyiinii nahmei kachengmei gotei mpouda pang gongle, teito mpou boumeinii ahnyiigo n-gile. 14Nlenii Jisunii teitei ngou wosii, mpounii rarhiisii mpouboumei dakii tamle, “Ahnyiigo nam sulo; nahmei kachengmei gotei guda liit matulo, dapochiinii Saraa mah sating sazyii teinii ai kakummei lhangle. 15Kasangpii Inii gonyii dakii tam leile, Mei kata kangkanii nahmei kacheng hangninii takumpii Saraa mah sating sazyii gotei dousuleponii teiki tei liitpei wolakle.” 16Sateichii Jisunii ahnyiigo gaisii ahnyii mei n-sang n-sang phyiiryiikii mpou bah poikai pyiisii ahnyiigo satoi pyiile.

Kanimei rahangmeinah hangninanii kalui kaga karing kafii

(Met 19.16-30; Luk 18.18-30)

17Sateichii mpounii tat kapat tinglangki, mei hangninanii mpou doi pakpi kok-kumsii mpougo n-nhiile, “Kabi Madhiikapyiipii, Kalui kaga karing doutang karam jangpii Inii dapei tiitangpo?”

18Teito Jisunii mpou dakii tamle, “Nangnii n-gu dajangpii kabipiisii lat leipo? Saraa tei supii mei kado kabi gale. 19Kakhatsam tei nangnii tile; ‘meigo gisulo, masung maha sulo, kasang kasu sakchyii tei pung sulo, gopwi go pfiigo sadzyii ngariit tiilo.’ ”

20Teito Mpounii Jisuda tamle, “Madhiikapyiipii, aihang ai Inii tiina kalei douto swi wotakle.”

21Teito Jisunii mpougo lungsyiisii jule ninado tamle, “Nangnii kaangkii tiitang makle rei; tat tulo, gomah kabam hangtei joilo, sateichii kamage meigo pyii ailo, teito nangnii sating gamto mah nitangle, sateichii patlo, gutai swi wolo.” 22Mpounii sam ai shii sek-kii, mpouju tei masuk takle, sateichii mpounii swi kamagesii tat tutakle. Kadapokii mpou tei hang- kapii mah kanimei hangniniile.

23Jisunii mpouboumeigo ju maguisii ahnyii dakii tamle, “Mah kanimeinii Saraa mah sating sazyiiki liit tang karam ai kadaziikapii hungpo!”

24Teito mpou boumeinii mpou sam tei shii wosii sung gatakle, nlenii Jisunii nlailoisii ahnyii dakii tamle, “Gunahmei kani kahii kikii kamalum meinii Saraa mah sating sazyiiki liit tang karam ai daziikapii hungpo! 25Kanimei hangninanii Saraa mah sating sazyiiki liit tang karam sung- nii mahum-mi kachet kito poutungki kounahnii joupat kaluniipou mala buile.”

26Teito ahnyii tei tampei kalak tiisii sung gatakle, ninado mpou dakii tamle, “Teitiileponii tanii kei- kapyii tei dou wobuipo?”

27Jisunii ahnyiigo jusii tamle, “Meinahnanii ai ai tiipei wolakle, nlenii Saraa-nanii mah kado tiipei kalak gale.”

28Teito Pitarnii Jisuda tamle, “Julo, nyiimah kalei hangtei toi aisii nyiinii gutai swi wotakle.”

29Jisunii tamle, “Kasangpii Inii gonyii dakii tam leile, gujangpii ninado kabi rasam jangpii, kihang, taikarhii sungkatingmei, taipwimei, pwi-pfii, taa-nahmei, luhangdo kata kangkanii toi aileponii, 30mpounii toi tinglangki kaset kalak dou katu njasii kihang, tai karhii sungka- tingmei, taipwimei, pwi-pfii ninado luhang njai haikii, sateichii gongtang karam tinglang ki kalui kaga karing tiilung doutangle. 31Nlenii aitoi kareimei hangkanii natu tangle sateichii aitoi nasii kalei meihang kanii reitu tangle.”

Jisunii taitang karam sam hangtum kashang tiisii katam

(Met 20.17-19; Luk 18.35-43)

32Sateichii Jisu ninado mpou- boumei tei toinii Jerosalem ki pitang karam jangpii pwidito tatlei takle, sateichii Jisunii mpouboumei doirei- sii tat leile; sateichii ahnyii tei hingtakle sateichii tailamto switat kaleimei tei hingtakle; sateichii Jisunii keariisiinakhii gotei sipii pangsii mpou gamto kadapei pat tangpo katu ralipyiitu takle. 33Mpounii ahnyii dakii tamle, “Julo, nyiinii Jerosalemki tatpi leile; teito meinah sapfii mpou gotei Tingdimei ninado Ajaitingshang kati ojamei bah kikii pyiitoi tang takle, teito ahnyiinii mpougo tam mashyiisii gitoi tangle, sateichii lui kakimei bah kikii pyiitoi tangle; 34teito ahnyiinii mpougo dzyii nuitangle, mpou ju gamkii poktai maswikai tangle, mpougo lak tangle, sateichii mpougo gitangle, sateichii jangtumnii tai mpounii ringkhii tangle.”

Jems nei Jonnii kakhang

(Met 20.20-28)

35Sateichii Zebedi nah Jems nei Jon nii Jisuda gongsii tamle, “Ma- dhiikapyiipii, neinii kakhang hangtei nangnii neijangpii tiikasei mareile.”

36Teito Jisunii ah neigo tamle, “Gonei jangpii n-gu kadapei tiisei matunyiipo?”

37Teito mpoupiinanii mpou dakii tamle, “Nangnii pumtei kava haisii gomah sagongbam kito kabampiinei nei hangnago gobah ajiilamkii hangninii go bilamkii hangniniigo mbam seilo.”

38Nlenii Jisuniiahnyii dakii tamle, “Gonyiinii kadapei khangleipo katu gonyiinii timakle, Inii kasak peek tei gonyii poisak wobuipo? Sa- teichii Inii dwi mpum kalu takumpii gonyii dwi mpum wobwipo?”

39Sateichii ahnyiinii mpouda tamle, “Nle,” teito Jisunii ahnyii dakii tamle, “Inii kasak peek tei gonyiinii poisak tangle sateichii Inii dwi mpum kalu takumpii gonyiinii dwi mpum tangle; 40nlenii gobah ajiilamto ninado gubah abilamto mbam tang karam jangpii kalai tang karam ai gu tei gale; nlenii teiteinii tiida kabam mei jangpiile.”

41Sateichii mpou boumei kakimei kearii teinii tei shii wosek-kii, ahnyiinii Jems ninado Jon go rarhii takle. 42Teito Jisunii ahnyiigo mpou dakii lat magongsii tamle, “Lui kakimei teinii ahnyii kak kito kadi kathangmei teinii ahnyiigo apum tiile, sateichii ahnyii mah kadimei teinii ahnyiigo apum katiimei tha tei matiile katu ai gonyiinii tile. 43Nlenii gonyii kaktonii aitiilakle, nlenii gonyii kak kito kata kangkanii dinyiileponii, ahnii meihang mah nga-ngatangle. 44Sateichii gonyii kak kito mei kata kangka reikanyii mei teinii meihang mah kikaleimei tiitangle. 45Kadapokii meinah sapfii mpou teiniido nga-ngasei matutang karam jangpii gongmakle, nlenii nga ngalesii sateichii mpou mah karing tei meihang kago keipyii tang karam jangpii pyiilesii gongle.”

Jisunii mik kachetpii Bartimosgo tii mbikapyii

(Met 20.29-34; Luk 18.35-43)

46Sateichii ahnyiinii Jeriko ki gongle, sateichii Jeriko kito mpounii mpouboumei ninado meimoigo kaswisii tat kapat tinglangki, Temos nah mik kachetpii Bartimos mah kahapii tei pwidi kuto bamle. 47Sateichii mpounii Nazaretki Jisu gong kalei tei shii wosek-kii, mpounii saa mpat takle, “Devit nah sapfii mpou Jisu, n-gu lungsyii pyiilo!” 48Teito mei kamoi kanii mpougo malhii sulosii n-gisii tamle, nlenii mpounii kisii lat teisii kisii saa tutakle, “Devit nah sapfii mpou, n-gu lungsyii pyiilo.”

49Teito Jisunii sat takle ninado tamle, “Mpougo latlo,” teito ahnyiinii mik kachetpii gotei lat takle, ahnyiinii tamle, “Rangalo, tusat tolo, mpounii n-go lat leile.”

50Teito mpounii mpou peimani tei goutoisii ntingtaktu sat totakle ninado Jisuda pile.

51Sateichii Jisunii mpouda tamle, “Inii gojangpii kadapei tiikapyii mareipo?” Teito mik kachetpii teinii tamle.

“Madhiikapyiipii, go-mik ngou matulo.”

52Jisunii mpou dakii tamle, “Tat tulo, gomah kamalum teipiinii n-go tii-mbipyii takle;” teito binasek-kii mpounii mik ngou wotakle sateichii pwidito Jisutai switu takle.

Currently Selected:

MARK 10: NAG2

Highlight

Copy