THA 18

Polnii Koren ki katat

1Aitaitei mpounii Athens ki- teito tatpatsanii Korenki gong takle. 2Sateichii mpounii Jehudimei hangninii Akuila sii kalat, Pontas ki mei hangninii kadou wotakle. Klo- diusnii Jehudimei hang kalei kaga Rom kito tat matutang karam jangpii kakhat kapyii jangpiinii mpou nou Prescilla go kaswisii mpounii Itali kito kagong tei thang makle; teito Polnii ahnyiida gong takle. 3Sateichii atha tei mpougo njoi katu jangpiinii mpounii ahnyiigo kaswisii bamsii tha tiile, kadaponii ahnyii tei dwipei katii tha katiimeile. 4Sateichii mpounii bam ntak piinei leimik mata Jehudimei ndwi nito sam kajyiisii Jehudimei ninado Grikmei hang go malum matu tang karam jangpiinii hemle.

5Sateichii Sailas nei Timothinii Misidoniya kito tat kahum tinglang kak, Polnii Jisu ai Kristale katu tei Jehudimei hang dakii sakchyii pyiisii samtam kiteito lungliitsii bamle. 6Sateichii ahnyiinii mpougo jyiipasii tam mashyii tusek-kii, mpounii mpou peimani gam buinei tei katungtoi aisii ahnyii dakii tamle, “Gonyii zai tei gonyii phyii gam khii matulo! Inii kama gale, aitoisekpiinii Inii lui kakimeida tat tutang takle.” 7Sateichii mpounii teiki teito tatpat tosii Titius Justas sii kalat Saraago kamalum mei hangninii kilung liit takle; mpou kitei Jehudimei mah ndwini doisek tei bamle. 8Sateichii Jehudimei mah ndwinito apum katiipii Krispasnii mpouki kalung- mei hang go kaswisii Bangpiigo malum wotakle, sateichii Koren kito kaleimei hangkanii shiiwosii malumdo malum takle dwido mpum wotakle.

9Sateichii Bangpiinii Pol dakii tinghum madhang pyiisii tamle, “Hingsulo, tam mpatlo, malhiisupii- nii bam sulo. 10kadaponii Inii n-go kaswipyii leile sateichii mei hang- ninii kaniido n-go tiimashyii tang karam jangpii denglakle, kadapokii namdi aikito gumei hangkii leile.” 11Teito mpounii ahnyii kak kikii Saraa mah kabi rasam tam ralipyiisii tingkum hangninii sakhii saruk bam takle.

12Nlenii Gallionii Akaiyaki Rom- mei mah Governor pung kaleidou, Jehudimeinii gong ndwi wosii, Polgo jumsii Sratki pangkhiisii tamle. 13“Mei aipou ainii ajaitingshang kasupiinii Saraago mata matu tang karam jangpii meihang go hemsii bamle.”

14Nlenii Polnii mwi kokgapatle sek-kii, Gallionii Jehudimei dakii tamle, “Kama tiikabam mak-kii mei tiikanhii tiikabam lei lepochiinii, he Jehudimei samkang tei taiswisii Inii gonyiigo pung njoitangle; 15nlenii samkang, zei ninado gonyii mah kaang kito kajyii katu sam lepochiinii gonyiinii gonyii roinapii jutulo; aisamhang jangpiinii Inii samtak katiipii tiinyii makle.” 16Sateichii mpounii ahnyiigo Srat kito baatoi aitakle. 17Teito ahnyii hangpii Jehudimei ndwi kito apum katiipii Sostenes go jum wosii samtak katiipii doiteito dat tutakle. Nlenii Gallionii tha aikaang ki aito samah kado lungnhii pyiimakle.

Polnii Sairiyaki nlai kagong

18Sateichii Polnii teiki leimik kathangkii bamsanii kangsanameigo tat n-nousii Prescilla nei Akuilago kaswisii Sairiya ki katang malyii hoisii gongtakle. Mpoumah riishii hangninii kabam jangpiinii Kenkriya kito aphyiitaam kabiittoi aitakle. 19Sateichii ahnyiinii Ipisa ki gong wosii mpounii ahnyiigo teibam kikii kai aitakle, nlenii mpoupum sek teinii Jehudimei mah ndwiki tei liit tosii Jehudimeigo sam kajyiitu takle. 20Sateichii ahnyiinii mpougo teiki tinglang kathangkii bam matu tang karam jangpii khang katu kito mpounii mazhiipyii sutakle; 21nlenii ahnyii datotat n-nou aisii “Saraanii kamaning teile pochiinii Inii gonyiida nlaigongkai tangle” sii tambam sanii mpounii Ipisa ki teito malyii gam tong wotakle.

22Teito mpounii Kaisariya ki gong wosek-kii, mpounii tatpatsanii Charsh hang go salam tii aisii, Antiyok ki mpounii tat humtakle. 23Sateichii mpounii tinglang shangniikii teiki tei bamsanii tatpat takle, sateichii Galati ninado Phrugiya sazyiiki adoidoi tat gongsii boumei hang go lung tiisangting pyiile.

Apollonii Ipisa ninado Koren ki

24Sateichii Jehudimei hangninii Apollos sii kalat Alekjendriya kito kati kahai mei Ipisaki gongle, sateichii mpou ai kabi rasam kito tiigatpii katimei hangniniile. 25Sapfii mpou aigo Saraa mah pwidi kito tampyii ralipyii bamtakle sateichii mpounii lungnhii gatsii Jisu mah kaang kito kidosu nkangdo supiinii tiigatpii ralipyiile, teitii kado mpounii Jon-nii dwi mpum kapyii teiroinii tile. 26Sateichii mpounii Jehudimei mah ndwinito lungdisii tamtu takle, nlenii Prescilla ninado Akuilanii mpou samtei shii wosek-kii, ahnyiinii mpougo ki pang gongsanii Saraa mah pwidi tei nkangdosu kidosupiinii mpou dakii tiigatpii ralipyii takle. 27Sateichii mpounii Akaiya ki katang tat majupat kanyii kiteito, kangsanamei hangteinii tam katwipyii sanii mpougo lukai pyii matutang karam jangpii ryiipyii takle. Sateichii mpounii gongtang wosek-kii, jumage kapyii kito malum kalumei hangteinii hang- kapiinii tiihale. 28Kadapokii Jisu ai Krista teilesii mpounii kabi rasam paikito mangou pyiisanii meihang doito Jehudimei hangmah samtei tiigatpii tambang toi aitakle.

Currently Selected:

THA 18: NAG2

Highlight

Copy