THA 17

Thesolonika ki katat

1Toinii ahnyiinii Amphipolis ninado Apoloniya sazyii tei tat majupat tosii Jehudimei ndwiki kalei Thesolonika ki katang tei gong wotakle. 2Sateichii Polnii mpou jai taiswisii ahnyiida tatliit sanii bam ka-ntak piinei hangtum kashang tiisii kabi rasam bung kito ahnyiigo kaswisii maning njoile. 3Teitei tam mpatpyii sii Kristanii kamage kalak lehsii kataimei kak kito ringkhii tang karamle sateichii “Inii gonyii dakii tam ralipyiisii kalei Jisu ai Kristale” sii tiigatpii tam ralipyiile. 4Sateichii ahnyii kak kito mei chengniikii Saraa kamaningmei Grikmei kito mei kamoikii, sateichii sapwimei kak kito aphyii kasatmei hangkanii malum wosii Pol nei Sailas go kaswi wotakle.

5Nlenii Jehudimei teinii meimhiitu takle sateichii meinii lukasu kaikashyiimei kak kiteito mei kashyii kashyii mei gotei poi ndwi wosii, mei ndwi kadi hangninii tiiwosii, namdi ki teito koi nrung tii-mpatsii ahnyiigo Jason kitei kumsii ahnyiigo meimoi doi poi mpat tang karam jangpii fiitu takle. 6Sateichii ahnyiinii ahnyiigo dousu sek-kii, Jason ninado kangsanamei kangkiigo namdi mah apum katiimei doikii pang gongsii saale, “Sazyii pouryiigo poi makum poimachyii ka- tumei ainii bam aiki aido gongtakle. 7Ahnyii gotei Jasonnii lukaile, sateichii Jisu sii kalat sagong kaki hangninii leilesii ahnyii hang ainii Kaisor mah kakhatsam gotei swisu takle.” 8Sateichii meihangtei nei teiki namdi kito apum katiimei hang teinii sam hang ai shii wosek-kii, akoira moitu takle. 9Sateichii teima- ham kajum meihang teinii Jason ninado kakimei gotei pyii kamajyii sana tei pyiimatu sii ahnyiigo mpatpyii aitakle.

Beriya ki katat

10Teito kangsanamei teinii ting- hum manoisekkii Pol nei Sailas go Beriya kikii langtoi aitakle, sateichii mpoupiinanii gongtang wosek-kii, mpoupiinanii Jehudimei mah ndwiki tei liit takle. 11Toinii ahnyii teinii Thesolonika kito kalei Jehudimei sung kisii hangkengle. Kadaponii kabi rasam tei ahnyiinii hangkapii shiinyiisii, samhang ai kasang manii mahkupo sii sating kata kabi rasam tei tiigatpii fiile. 12Teijangpii ahnyii kak kito mei hangkanii ninado adzyii ka-nrou Grikki sapwimei ninado sapfiimei hangteinii malum wotakle. 13Nlenii Thesolonika kito kalei Jehudimei teinii Polnii Beriya ki kado Saraa mah kabi rasam ai tam ralipyii takle katu tei tiwosek-kii, ahnyiinii gong sanii teiki todo meihang go tiirampou pyiisii sam kamoi tii mpatle. 14Teito kangsana- mei teinii manoisekkii, Polgo dwijai ki katang tat matutang karam jangpii lang mpat aitakle, sateichii Sailas nei Timothi teinii teiki teito bamtu takle. 15Nlenii Polgo pang kapou katumei teinii Polgo Athens ki katang pang mangpyii takle, satei- chii Sailas nei Timothinii mpouda kalangsii gong matutang karam jangpii ahnyiinii kakhatsam tei dou wosanii tat n-noutu takle.

Athens kito

16Sateichii Polnii Athens kito Sailas nei Timothi go koileibangpii namdi kitei tingtu param piinii tokryiisii kalei tei mpounii ngou wosanii mpou lung hangkapii kamage takle. 17Teijangpiinii mpounii Jehu- dimei mah ndwi kiteito Jehudimei, Saraago kamaning lui kakimei ninado salikijangto sating kata mpougo kadou kaleimeigo kaswisii karashii njoile. 18Sateichii Ipikoriya ninado stoik ki kati kahaimei mei kangkanii mpougo kajyiitu takle, sateichii mei kangkanii tamle, “Sampei katipii ainii kadapei tamleziikhe?” Kakimei teinii tamle, “Mpounii sazyii kakimah sara hang mah sam tam rali kapyiimei hangniniigo reile, kadaponii mpounii Jisu mah sateichii ringkakhii mah kabi rasam tei tam rali pyiile. 19Sateichii ahnyiinii mpougo jum wosii Areyopagasda pang gongsii tamle, nangnii kasatai rali kapyii ai kadapeipo nyiinii tikaile? 20Kada- pochiinii nangnii nyii koi kikii mah kaki katwum sam mashii pyiile, teijangpiinii sam hang ai kadapeipo katu nyiinii tinyiile.” 21Kadaponii Athens kito kalei mei ninado sazyii kaki kito gong lung kaleimei hang teinii mah kasatai kasatai sam katam mak-kii kashii teisupiinii, samah kaki hangninii kado tiisupiinii tinglang tei bamtoi aitakle.

22Teito Polnii Areyopagas mah asum teito sat tosii tamle, “He Athens kito kalei mei, amahlyii hang kito gonyii ai hangkapiinii kanat kabimeile katu tei Inii ngoule. 23Kadapokii Inii aitiisii tatpatsii gonyii mah Saraa kamaningki kitei jukii, ‘juti kasu sara dakii’ sii rakuibam hangninii phyiiryiikii ryii- kabam teido ngoutakle. Teijangpiinii gonyiinii juti kasu sarago mata kajyii ai Inii gonyii dakii tam leile. 24Sazyii pouryiigo ninado teilungto kalei mahlyii hang go tiikapyiipii teinii sating ninado sazyii pouryii mah Bangpii katu taiswisii bahpiinii tiikamakhii Saraa kamaningki teito bam makle, 25sateichii mpoumah tang kalak leisii meinah bahpiinii mpou nga kanga gale, kadapokii mpounii mahlyiihang go karing, chyiingai ninado mahlyii hang pyiile. 26Sateichii mei hangninii gamto mpounii sazyii pouryii lui hang go tiipyii takle sateichii ahnyiigo sazyii pouryii bamlyii hangki lung matu takle; sateichii mpounii ahnyii mah tingkum tinglang ninado lung tang karam ating-azyii hangtei arei ret- pyiibam takle, 27katunii, ahnyiinii Saraago fiitang karam jangpii, ahnyiinii mpou dato kamalum kiteito titang karam ninado doutang karam jangpii, nlenii mpounii nyii mei nsang nsang dato dhiimakle. 28Kadapokii

‘mpou dato nyiimah karing,

ka-nlai ninado kalung ai dousii bamle.’

Gonyii kak kito sampok kapokmei kangkanii tam kabam takumpiinii,

‘kadapochiinii nyii ai kasangpiinii mpounah mpoutaa meile.’

29Teijangpiinii nyii ai Saraa mah taa nahmei katu taiswisii, Saraa katu teinii meinahnii kamaning ninado gek kalu mah hangninii sana mak-kii sana raguiba mak-kii kuitu takum- lesii nyiinii maning kajyii makle. 30Teijangpii tikasu tinglang gotei Saraanii ju majupyii takle, nlenii aitoinii bamlyii hang kito meihangnii lung kali matutang karam jangpii mpounii mwija pyii leile. 31Kada- pochiinii mpounii kalai kalu sapfii mpou hangninanii sazyii pouryiigo kasang kito samtak tiitang karam leimik hangninii retbam takle. Mpou gotei kataimei kak kito tiimaring kapyii aipiinii meihang dakii malum kabui tei mpounii pyiibam takle.”

32Teito kataimeinii ringkakhii kaang tei ahnyiinii shii wosek-kii kangkanii hoksii nuitu takle. “Nlenii kangkananii aikaang kito nyiinii nlai loisii godato shiitangle.” 33Aitiisii Polnii ahnyii kak kito tatpat takle. 34Nlenii sapfiimei kangkanii mpou- go tiigatpii kaswisii malum wotakle. Kamalum mei kak kito Areyopagas ki Diyonusiyas, Damaris sii kalat sapwi mpei hangninii sateichii ahnyiigo kaswisii kaki kakimei hangdo haile.

Currently Selected:

THA 17: NAG2

Highlight

Copy