THA 14
14
Pol nei Barnabas nii Ikoniam ki katat
1Toinii Ikoniam ki teito mpou- piinanii kaswisii Jehudimei mah ndwiki nitei liit takle sateichii samtei tam katu kito Jehudimeido Grikmeido mei hangkii malum wotakle. 2Nlenii malum kasu Jehudimei teinii lui kakimei lungtei riiteikai pyiisanii, kangsanamei phyiiryii teikii karyiitu takle. 3Teijangpiinii ahnyiinii Bangpii paikito kahing gasii karashii sii teikito tinglang kathangkii bam takle, ahnyii bahpiinii tiikamangou ninado kamadat kamadat tiimangou pyiisii mpoumah kalungset mah samtam kito mpounii sakchyii pyii takle. 4Nlenii teiki namdiki meihang teinii tat n-noutakle sateichii mei chengniikanii Jehudimei doi ninado mei kangkanii Tiilamlwi kapyiimei doi sat takle.
5Sateichii ahnyii mah apum katii- meigo kaswisii lui kakimei sateichii Jehudimei hangteinii ahnyiigo tii nroutang karam jangpii ninado kuitupii rot tang karam jangpii koi nrung tei pat sek-kii, 6ahnyiinii teitei tigong wosanii, Lukaonia kito kalei Lustra ninado Derbe namdiki sateichii teiki pungbang hangki pak gong takle; 7sateichii teikito ahnyiinii kabi rasam tei tam ralipyiile.
Lustra kito kabam ninado Antiyok ki nlai kagong
8Sateichii Lustra kito api lui lung kama, pwi moilungto pi tuisii lung ka m-mang, tatsang tatpei kalak sa- pfiimei hangninii kadoutakle. 9Sapfii mpou aipou ainii Polnii tam kalei tei shiileibangpii, Polnii mpougo tiigat- pii jusii, tii-mbipyii matu tang karam jangpiinii mpoumah kalei kamalum tei ngou wosek-kii, 10lat sagoisii tamle, “Gopi gamto sat majyiitok wolo.” Teito mpounii nkung tusii tat tutakle. 11Sateichii Polnii tiikalei hangtei meimoinii ngou wosek-kii Lukounianmei latpii, “Sara hangnii meijai talui poisii nyiida gongpyii takle!” sii lat sagoisii saale. 12Sa- teichii ahnyiinii Barnabas go Zeus, sateichii Pol go, mpounii sam katam aphyii kasat taiswisii Markuri sii latle. 13Sateichii teinamdi ki leimik kapat lamto kalei Zeus mei mah Saraa kamaning ki kanat kajum Atingpii teinii twom madang hang ninado hiipa tiipok tei takam kamwiku poigongsii, kakarat pyiika- toi tei meihang go kaswisii tiilesii tam takle.
14Nlenii Tiilamlwi kapyiimei tei, katunii, Barnabas ninado Polnii teitei shiiwo sek-kii, ahnyii-pei mani hetriit tosii meihang kak ki ntoi liitsii saasii tamle, 15“Gonyiinii tha aihang ai kada tiisii tiileipo? Nyiido mei- nahle, gonyiigo njoi katumeile; gonyiinii kakadak tha hangkito ringkalei aiki aito Saraada nryiigong wokabui jangpiinii kabi rasam ai nyiinii gonyii dakii pung gong leile. Mpounii Sating, sazyii, dwijai ninado matum madum ailung aito kalei hang ai tiipyii takle. 16Tukalei ha kareiki mpounii luihang go ahnyiinii kamaning kamarei pwidi hangki tat matutakle. 17Nlenii mpoumah sak- chyii gasanii kaibam makle, katunii mpounii kabi tiipyiisii sating gamto tingryii ninado ati kamati tingkum tinglang hang tiipyiisii gonyii lung ai kachii kasakpii ninado kasamou teipii kasaat pyiile.” 18Sateichii ai ai tamsii ahnyii dakii pyiitoi tang karam pyiikatoi kakarat hangtei ahnyiinii kamagesii namtakle.
19Nlenii Antiyok ninado Ikoniam kito Jehudimei hangteinii teiki tei gongtakle; sateichii ahnyiinii mei- hang go katwikai pyiisanii, Polgo kuitupii rotsii, mpou taitakle katupii maningsii namdi kiteito sabakii mpougo chyiipat toi aitakle. 20Nlenii Boumei teinii mpou kuto gong ndwiwo sek-kii, mpounii gungtu sat tosii namdi kitei liit takle sateichii supounei kakum kiteito Barnabas go kaswisii Derbe sazyiiki tat tutakle.
Sairiya kito kalei Antiyok ki nlai kagong
21Sateichii ahnyiinii teiki namdi ki teito kabi rasam tam ralipyiisii meihang kago boumei tiiwosii Lustra, Ikoniam ninado Antiyok ki nlaigong takle. 22Bamlyii hang ki teito boumei lung tiisangting pyiisii kamalum kiteito taksupiinii bam matutang karam jangpii katwisii kamage kalak hangkago kaswisii nyiinii Saraa mah sating sazyiiki liit tang karamlesii tam ralipyiile. 23Sateichii ahnyiinii malot karyii ninado kariita njasii Charsh hang kito ahnyii jangpii katingmei hang kalai mpatpyii kaleitai, ahnyiinii kamalum Bangpii dakii ahnyiinii ahnyiigo pyii aitakle.
24Teito ahnyiinii Pisidiya tat majupatsii Pamphaliya ki gongtakle. 25Sateichii ahnyiinii Perga kikii kabi rasam tei tampyii sanii, Attaliya ki tat hum takle. 26Teito ahnyiinii tiimasang kalu atha jangteipii Saraa mah kalungset kito ahnyiigo pyiika- bam Antiyok sazyii ki tei malyii hoisii gongtakle.
27Sateichii ahnyiinii gongtang wosek-kii, Charsh hang go lat ndwi wosii, Saraanii ahnyiigo kaswisii tiikapyii tha hang mah ninado lui kakimei hang dakii mpounii kama- lum mah takam laatpyii takle katu tei ahnyiinii ahnyii dakii tampyii takle. 28Sateichii ahnyiinii boumei hang go kaswisii tinglang kathangkii bam takle.
Currently Selected:
THA 14: NAG2
Highlight
Share
Copy

Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.