Maki 1

Nagami folo epolo'ehina bo, Yoniu lu yege holata hu'ehina

Mt 3:1-12; Lk 3:1-18; Yn 1:19-28

1Ka lamana'a, Hu'mamofihi pana'a Yesu Kilisito kumu maga hapi fito nogobe. 2Koyapa, ka lu huto huto hu'ehina bouba Aisaiya, Yoni kumu ma luto fayahi go'ehina:

Kehelibo. Nani Hu'mau kalo lili bona'ni

ho lifinogo,

kohe toto buto

kapo hokolo hu ketalina'mu yabe.

3To ai nogo'a ka hepatogati

kehe ito ma lilibe:

Kibina bo kumu'i kapo li hokolo hubo.

Ai kumu kapo le'mo bati hubo.

Ya luto go'ehina yabe.

4To Yoniu, nagami'i folo epolo'ehina bouba, ka hepatoga huto huloto'a yafege goloto ma lu'ehibe: Komopatini i gelehe hite, nagami felelenogo, Hu'mau foipanatini pa so lepalalinagihe. 5Ya ligo, Yutia melugu bona'magi to sipi hepato Yelusale ya'ma bona'magi hiti aitoga bite foipana'animofihi lu hokolo hilago, ai Yotani nagamilugu nagami folo epolo'ehina yabe.

6To Yoniu, ai gu kata'a kameli yagamofihi oka'a naku'i hepi'ohuto, to kafa'nama gufa'a gilimi bi'ehibe. To nose'na'a kenu'i hiti upe'mofihi nogoya'a hiti nolata mino'ehibe. 7To ka'a ma luto lu yege ho'ehina: Nani nemege'i ma'asi alina bo ai lusi bo nohibe. Nani fa'mene bo nohube. Nani bati mehina bomofita, fa'mene lipito su'amofihi naga'i kisi etaluna bati menohube. 8Nani nagamitu okala hu lepolo'ohuna, to ai Sikalafu'i ho lifinogo komopatini okala huto le'mo bati hu lepalalibe.

Yoniu Yesuhi nagami folo eto'ehina

Mt 3:13–4:11; Lk 3:21-22; 4:1-13

9Ana kanagu Yesu, Galili kapoguti Nasalete hepatogati ago, Yoniu Yotani nagamilugu nagami folo eto'ehibe. 10To Yesu nagamiluguti notigo ana'asilo kokuluma'i loko higo Sikalafu'uba nama supo huto aitoga nolimigo bu go'ehibe. 11To kokulumaguti Hu'mamofihi nogo'auba ma luto lu'ehibe: Kai nigi moneko pana'ni, nebesita pana'ni nohane. Nani kofokehi gofa nolube.

12To yalo ana'asi Sikalafu'uba Yesuhi fitu foto ho lifigo, ai ka melugu bu'ehibe. 13Buto melugu nohuto'a Satau oto fibe taga ho etoba etoba nohigo, 40 yegegu mino'ehibe. To ana hepa'i ka melugu ni'igo lopi yagakafa anasi nehanaga minoto'a, agelomagi kaba nehi etago mino'ehina yabe.

Yesu pana'alobo luga'amagihi kehe i'ehina

Mt 4:12-22; Lk 4:14-15; 5:1-11

14To alihi Yonihi naga nonugu le'me mele'ahago, Yesu Galili kapogu nehetito Hu'mamofihi kapo'mu ka lamana'a lu yege nohoto ma luto lu'ehibe: 15Hu'mau molo'ehina kana abaga i'ehinagi, Hu'mamofihi kapo'a huto hilina kana'a ma'asi a'alina'mu yabe. Lenali komopatini i gelehe hitetini ka lamana'a kehelite agoya hi emilo.

16To Galili nagami beletoga kapo moloto nobuto Simoni to Atulu kogunale faya gutalafa nagamilugu li nemala'igo bu etogo'ehibe. Etali lili'na'atiti faya gutalafa fise bole neha'ibe. To Yesu bu etogoto ma lu etimi'ehina: 17Letali faya'i kefefe hilata lili'nalo nemina'ibe. Nemege'i e'inogomo, to nani bona'i kefefe hilata bomale'i letele'mo ho tiluna'mu yabe. 18Ya ligo ana'asi faya gutalafa'atiti he'milete mege'i bi'aha'ibe.

19To Yesu nesi'asi buloto, Sepetihi pana'amale'i Yemesi to Yoni bu etogo'ehibe. 20Enali ana naga'i botigu nehite faya gutalafa'ani mu netifigo Yesu bu enogoto ana'asi ana loe panate kehe igo etali afo'atitifu Sepeti to lili'nalo bona'magihi hiti botigu he'mi epelete mege'i bifa hi'aha'ibe.

Foipa fele komopa'agu mino'ehina bo yabe

Lk 4:31-37

21To enali Kapaneami kapogu bite nehetigo yalo fuli yupapogu Yesu mono nonugu tito kaga enelepilube'mu nohuto mino'ehina. 22To ka lu noepigo enali yege fite minete ma lite li'ahana: Ai keheli bati hu'ehina bomofihi supo huto ka lu nolimibe. Mono ka negana bona'magihi supo huto lu menolimibe. Ai'a amuya hiti kagamofihi hapa'a lu lelepise nohibe.

23To yalo ana mono nonugu bo mone komopa'agu foipa felemo limi'ehina bouba nehetito sipi nogo moloto ma lu'ehibe: 24Ahi. Yesuo. Nasalete naga'ise. Lalitoga hena'mu noane? Lali lahalube'mu nohuto noapiye? Nani kaimo keheli'ohube. Kai Hu'mamofihi pana'a, foipa mehuse bo nohane. 25Ya ligo Yesu kele'na ka lu emito ma lu'ehina: Kaga meluse nohutoka komopa'aguti toto he'mi etobo. 26Ya ligo foipa feleuba ana bomofihi le'mo igo kesepu kesepu ito sipi nogo nomoloto moha tuto he'mi etoto komopa'aguti tito bufa hu'ehibe. Ya higo asaga bona'magi topa nehete: Ya'ma hena hu'ehibe? lite, ai loka hago ai loka hago nehite ma lite li'ahana: 27Ya'ma yuhufa mono'i ahuto hu'ehina ni'ifihe? Ai foipa felemagi kumu ka epekinogo ka'a keheli emilata nehabe. 28To yalo mele'isi Yesu kumu ka leli'ali hite bite asaga hepatoga Galili kapogu ni'ina hepatoga bite kaga beto hite lu epi'ehina yabe.

Yesu babu bona'magihi enugufa le'mo bati hu'ehina

Mt 8:14-17; Lk 4:38-41

29To Yesu ana mono nonuguti limito, Yemesi hiti Yoni hiti limite bite Simoni Atulu kogunale etali noha'atitigu ti'ahabe. 30To ana nonugu, Simonihi yami'afu mukohona nobesigo nebelusalo ko'ehigo enali mele'isi Yesuhi ka lu emi'ahabe. 31Ka lu emilago ai buto yato lito ana a'mo le'mo ho tigo nobesinana ana'asi fa hu etago, ai nose'na huto gabu ito epi'ehina yabe.

32To utehi yege nolimigo, asaga noepesina bona'i hiti to foipa fele komopa'anigu neminana bona'i hiti aitoga enele'mete e'ahabe. 33Asaga ana hepato bona'magi aitoga ete kasito li gehesa nehago ai fato fato epesi'ehina bona'i babu lite enele'mo bati hu'ehibe. 34To foipa fele komopa'anigu nemina bona'magihi foipa felemagi li he'mi epolo'ehibe. To enali foipa felemagi aimo Hu'mamofihi pana'a nohibe lite keheli'ahanaya nigi'ni mehalabe luto Yesu kaga lu laga hu epolo'ehina yabe.

Yesu Galili kapogu kaga lu yege ho epolo'ehina

Lk 4:42-44

35To yalo'i, etehi folugu'i ho tito buto bona'i menemina hepatoga buto nohuto Hu'mamofitoga kaga luto mino'ehina yabe. 36To ya higo Simonigi mege'i lifite sa sa hite bite ai nohinalo nehetite ma luto lu emi'ahana: 37Asaga bona'magi kai kumu sa nehabe. 38Ya lago Yesu ma lu epi'ehina: Ana, lali ka'muya nina hepatoga buloto nani ana huto ka lu epilube. Nani ana lili'nalo ao'ohuna yabe. 39Ya luloto buto asaga Galili kapogu bego bego huto mono noha'anigu tito ka lu noepito, to foipa fele li he'mi epololata huto mino'ehina yabe.

Yesu hehe bo mone'mofihi le'mo ye ko'ehina

Mt 8:1-4; Lk 5:12-16

40To yalo'i hehe bo hepuha'a gofana hu'ehina bo moneuba aitoga lahupa nohi fito amuya moloto ma luto loka ho'ehina: Oho. Nele'mo bati hilapiye? Keheli'ahata bo nohatagi, nele'mo bati hilapiye? lu'ehina. 41Ya ligo Yesu sipi keke'i nolu etoto yahi li su toto bako huto ma lu emi'ehina: Ana hu ketalube. Gufa hu bati hino. 42Ya ligo ana'asi gufalo hehe nobesinana i gololo tigo gufa'a gulu gulu lu'ehina yabe. 43To Yesu amuya ka lu emito ma lu'ehina: 44Kehelibo. Kai ya'ma hu keto'ohunana ka lu meepise minotoka buto sipi mono nonugu tito mono bo kugufaka lepitogo to Moseu koyapa lu molo'ehinana emiletogo, asaga bona'magi bu kegelete kugufaka gulu gulu lu'ehinaya kehelilabe. 45Ya luto ho lififa hu eto'ehigo ai aku'i kaga beto huto luba luba higo, asaga bona'i kehelite Yesutoga li gehesa sipi hilune'mu nehago Yesu fa'mene enubu'anilo olopa hepatoga metise nohuto holupagu nohigo bona'magi yege yege hepatogati aitoga e'ahana yabe.

Currently Selected:

Maki 1: bef

Highlight

Copy