Matiu 11
11
Yoniu koko pana'a Yesutoga enoho lifi'ehina
Lk 7:18-35
1Yesu nayaha'ni su hago nigigusaga loemo leheko malago koko pana'amagi lili'na lilana kaga alu epi su holoto ana hepa'i he'mito ana kegi'a hepa'i nila nila hu'ehinalo bula ola huto boana'i kaga lu enelepito to hetofa kaga lu yege homofa'na hu'ehina yabe.
2To Yoniu ai nagami folo epolose bo naga'i emi'ahago nohuto asaga lili'na Yesu nolinamofihi ka'a keheliloto koko pana'a enoho lifigo Yesutoga e'ahana. 3Ya hilete ma lite Yesuhi loka he'ahana: Kaiba Yoniu alane luto lu'ehina bomo nohapi, fato bo geba hiluta ni'ibe? 4Ya lago Yesu ka'anilo lu epi'ehina: Lenali i behe hite bite Yonihi sipi lili'na li huto nohugo be enaganamofihi hapa'a lu emilo. 5Enali enubu pisi lina bona'i aku'i enubu'ani i gili higo asaga'na bu negabe. To enigi enayahi sibina hu'ehina bona'i kapo malabe. To ililogo bona'i enele'mo gololo tugo babe. To enekesa hekini lana bona'i enekesa li hokolo hugo kaga kehelite babe. To fili'ahana bona'i aku'i ho ti kosaba habe. To fe'noha'ani menina boana'i ka lamana'a kehelibe. 6To bo moneuba nani kumu'i ekesa yigi yigi huto Hu'mamofihi pana'a nohifi fato bo nohifi ya'ma meluse aku'i nanitoga komopa'a nimilina bo ai gelo bino.
7Ya luto Yesu kaga lu su holago Yonihi koko pana'a abilago Yesu Yoni kumu kaga babu boana'i lu epi'ehina: Koyapa'i lenali bona'i menehana kamelugu bi'ahana henana bu galune lite bi'ahanabe? To lenali akepa mone'mofihi habafahuba li pisi hu'ehina bu galune litefihe? 8To lenali henana bu galune lite bi'ahanabe? To lenali bo moneuba hetofa gukete li hekoloto nohinogo bu galune lite bi'ahanafihe? Nani lu nolepube. Enali bona'i hetofa gukete li hekelete to hetofana enugufalo li melete neminana bona'iya enali sipi kibina bomofihi noha'agu minelata nehabe. 9Ya hu'ehina lenali hena hibe lite bi'ahanabe? Lenali henana bu galune lite bi'ahanabe? To lu huto huto bo bu galune lite bi'ahanafihe? O'yo nani lu nolepube. Ai lusi mono bo yabe. To ai asaga mono bona'i luga'a enohoto nohibe. 10Ya'mana bo Yoni kumu luto mono kagu ma luto lulata nohina yabe: Mono ka'ni leli'ali bo'ni ya'ma nohibe luto Hu'ma lu'ehina yabe. To nani yata'a ale'mo he'minogo'ni ai buto kapo li hokolo hu ketalibe. 11Yesu kaga molo emito lu'ehina: Nani ma'naka luto lu nolepube. Yoni ai nagami folo epolose bouba asaga bona'i ma melugu nehana enohoto nohibe. Ya hu'ehina bo mone Hu'mamofihi kapolo lagaso huto nohilinauba ai Yonihi be ligito nohibe. 12Yoni huto hina kanaloti minomo tito yalo'i kana'alo ago luba nehana bona'magi kokulumamofihi kapo'a li he'milune'mu nehite luba hiba hiba hi'ahana. 13Asaga lu yege hose bona'i kaga hiti keya ka hite Hu'mamofihi Kapo'amofihi ka'a Yoniu huto hina kana'aloti moneka huto hi'ahana yabe. 14To lenali keheli bati hilunemo'mu keheli bati hilo. Yoniu ai'ya Elaiyau yabe, ai ya'mana bo alibe luto lu'ohuta bo yabe. 15Ai ekesa'a ni'ilina bouba keheli bati hino.
16Yatai kanalo boana'i henanalo lu malalube? Enali yagapana'i hepa'i folagaha'agu luga filete nehite luga'a yagapana'i kehe ite ma lite lu epilata nehana suhi lite nehabe: 17Lali folonemeyahi fu lu lepolotamo lenali nama lilana suhi hite melekehi ite memine'ahabe. To lali eniginaga fise suhi huto yibi nama hutamo enali yibi hilana suhi hite memine'ahabe. 18Yoniu o'ehina ai nose'na nola to bai nagami'i nola mehu'ehina yabe. Ya nohigo lenali ma lite li'ahana yabe: Foipa fele ai komopa'agu ni'ibe lite li'ahana yabe. 19To yatai Kokulumaguti limi'ehina Bouba oloto nose'na noto nagami'i noto nohigo to lenali ma lite neli etabe: Bu galo. Ai nose'na lau'i iba iba bo yabe nelabe. To bai nagami'i ana huto babu luto noba noba bo yabe lite nelabe. To ai takisi nelina bo to foipa bona'magihi enalalu'anifu yabe lite lilata nehabe. To ya'mananalo bu golototi Hu'mamofihi keheli bati huse'na'a ma'naka ni'ibe luto liluta'mu yabe.
Ke, komopa'ani i gelehe mehi'ahana bona'ise
Lk 10:13-15
20Hepa'i luga'aga Yesu topa hose'na li hu enebe li'ehinalo bona'magi komopa'ani i gelehe mehi'ahana yabe. Ya hi'ahago ya'ma kanalo Yesu ka epekito mino'ehina yabe. 21Ai lu'ehina: Ke, Kolasini bona'ise. Ke, lenali Betesaita bona'ise. Lenalitoga babeyafana li huto nohunana enali Taiya bona'i hiti Saitoni bona'i hiti enalitoga li huto hutita enali mele'isi melugu mino laba hite gebona gukete li hekelete lahi enugufalo felete eniginaga foipana'animu'i finogo nehinogo ya bu goto foipana'animo'mu nehabe luto huto hulata nohinagi lenali komopatini i gelehe mehi'ahana. 22Lenali kehelilo. Me'i su halina kana'a to ka foya lilina yupahi Hu'mau Taiya bona'i hiti Saitoni bona'i hiti enalitoga babu lito keta mehu etalinaya lenalitoga sipi keta besilina'mu yabe, luto Yesu lu epi'ehina yabe. 23To lenali Kapaneami bona'ise. Lenalitini kokulumalugu li saga hite tilana ni'ifihe? Logo kapogu limilana'mu yabe. To topa hose'na lenalilugu li huto hu'ohunana Sotomu hepalugu li huto hutita yatai hiti analo huto huba huba nohitita'mu yabe. 24To ka foya sipina yupahi Hu'mau Sotomu bona'i babu luto keke'i lu epalalinaya to lenali'i loe'asi keke'i lu lepalalina'mu yabe.
Lenali nanitoga ete lenabasu bilo, Yesu lu'ehina
25Ya'mana yupahi Yesu ma luto lu'ehina: Oho. Afo'niga, kokuluma'i hiti me'i hiti sipi kaba bo'a nohane. Kai ana'inaka kehelise bona'magihi enubulo li fala nokito to kai lagaso yagapana'magihi enubulo li huto hulata nohata'mu nani kofokehi lito bati huto yabe luto kegepohi nolube. 26O'yo, Afo'niga kaika lu'ahatalo ana suhi ana suhi fato fato'i huto hulata nohibe.
27Nani afo'nifu asaga'na nani nayanuguko molo'ehibe. Bo moneuba Hu'mamofihi pana'a nohibe luto mekeheli'ehina. Afo'nifu aisigo keheli'ehibe. To bo moneuba Hu'mamofihi ai nohibe luto mekeheli'ehina, Pana'a aisigo keheli'ohuto ai Pana'auba Afo'afihi enelepito kaga lu epina bona'i enali ana hite Hu'ma nohibe lite kehelilata nehabe lu'ehina.
28Lenali ketana kofilete ketatini'mu kosele'ise bona'i nanitoga ete lenabasu bilo. 29Ya'ma yafa nani nigi'nagu nina lenali lite lenali lenigi'nagu malalo. Lenali nani hapa'ni lilo. Hena'mugope nani fulu fulu kaga bona'i lu noepuna bo nohube. To koyone huto legeso huto nominona bo nohube. To lenali komopatinimofihi nanitoga ete le'mo basu bilo. 30Ya'ma ketana lenigi'nagu nomolo lepolonanaya hetofana ni'ibe. To ana'ina kofilabe luto nani nolepunanaya keta mehina baba hana ni'ibe, luto Yesu lu epi'ehina yabe.
Currently Selected:
Matiu 11: bef
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 1982, Wycliffe Bible Translators, Inc. All rights reserved.