DANIELA 6
6
Daniela kâmkeibaknei khura an inthâk
1Daria ram optu khan thunei hrang mi irzakhat sômhni, ram pumpuia siahai, a sa a tia. 2Anni laia mi inthum an kunghai nôka, an laia inkhat chu Daniela a ni, hi thuneituhai hin an thurchi inhriat an irhlet maiin, Daria’n ite siatna a nei loina hrang sikin. 3Daniela hi lungrîl diktak irput a ni sikin hruaitu le thuneituhai nêkin an lâr uala; rêng khomin ram pumpuia hruaitu ni hrangin an sâpa. 4Khanchu hruaitu le thuneituhaiin an inhriatin chu zoro’nchum an zonga, khannisian zoro inchum hmu thei loiin, a dik loina lak hmu loiin; a iamomzoi sikin, dik loina le sualna mi ni loi a nia. 5Kha tena chu hi mihai hin, “An Pathian dân thua hin ei hmu ta no’n chu, hi Daniela chunga hin zoro inchum hmu ta no ih,” an irtia.
6Khanchu hruaitu le thuneituhaiin rêng kuanga irbukin hiang hin an hrila. “Rêng Daria, kumkhua’n damin lân. 7Ram hruaituhai, thuneitu, ar fûktirtu le optu murdihai chu sûn sômthum sûnga, o inlaltak nang ti no’n chu pathian mo, mihriamhai kuanga zongna nei murdi chu kâmkeibaknei khura pai hrang, tiin rêng hin dân siamin khap sianlân, an irtia. 8Atûn hin, o inlaltak, khapna indetin lân, Media le Persia dân danglam loi ang khan irhming irziakin lân,” tiin. 9Khanchu rêng Daria khan a lekha irziaka khan ar hming a’rziak tâka. 10Daniela’n a thu irziak kha irhming irziak a ni tah ti an hriatin in sûnga a lûta, a itho ngai angin sûn khata voithum a khûksadela, a chongchaia, a Pathian kuang lômthu a hrila.
11Khanchu hi mihai hi an inkhôma, Daniela’n a Pathian kuang zongna le ngênna a nei ngai ti an hmusuak tâka. 12Rêng kuang khan, rêng dân a ikhapna thu kha an hrila; “Sûn sômthum sûnga, o inlaltak, nangma kuang ti no’n chu pathian mo mihriam laia ite zongna nei loi hrang, a neitu chu kâmkeibaknei khura pai hrang tia dâna khan nir hming ni’rziak mo ni ma?” an tia.
Rengin “Kha thil kha chu a det a ni, Media le Persia dân danglam ngai loi angin,” tiin a sâmhaia. 13Kha tena chu rêng kuanga khan, an tia. “Daniela Juda sala om nâihai laia mi khan, ni dân hi ite bêin bê maka, nir hming irziaknahai kha, a sûna voithum khûksadelin a chongchaia, a Pathian kuang,” an tia. 14Hi thu hi, rêngin an hriatin chu a poi a ti tak taka, Daniela chu sansuak hrangin sûn sôt a tuma. 15Hi mihai hin an hong irbuk nôka, rêng kuang khan, o inlaltak Media le Persia dânin khapna indanglam thei ni mah ti nin hriat, an tia. 16Khanchu rêng khan thu a pêkhaia, Daniela chu an hong hruaia, kâmkeibaknei khura an paia. Rêngin Daniela kuang, “Ni Pathian a sin ni itho pe maipu khan nang saninzôk a ti,” a tia. 17Khanchu lung an hong lâka, khur kotbâi kha an khâra; rêngin Daniela chungchâng hi a danglam loina hrangin ama kutsabi, a mi lianhai kutsabi leh irsin a pêka. 18Rêng kha a ina a fea, bu ngheiin zânkhua an vâra, thil irhâi nei om loiin, zâlna khom do loiin.
19Zînga chu rêng kha a thoia irhnot takin kâmkeibaknei khur tiang khan a fea. 20Daniela omna khur a hong nâiin chu chap irhâiin an hriata, rêngin Daniela kuang khan, “O Daniela Pathian hring siahlo, ni Pathian a sin ni itho ngai khan kâmkeibaknei khur ata nang a inzôk thei mo?” a tia.
21Daniela’n rêng kuang khan, “O inlaltak, kumtuangin dam ro; 22ki Pathianin a vântirtôn a zuang tîra, kâmkeibaknei hmûr ar chîptira, ite ni ti mahai, a mithmua hrilsiatna boiin ki oma, ni chunga khom ite insiat ual ma unga,” a tia.
23Khanchu rêng kha a lôm tak taka, Daniela kha khur ata kêlsua hrangin thu a pêka, khanchu an lâksuaka, natna tuang viat loiin, Pathian a iamzoi sikin. 24Khanchu rêngin thu a pêka, Daniela sêlhai kha an hong hruaihaia. Kâmkeibaknei khura khan an paihaia; an nâi le dôngmahai le kâmkeibakneihai khan an inthikhaia, inpet inpetin khur mong pha loiin an inhekpaihai ta.
25Khanchu reng Daria’n, mi tin, nam tin, chong tin hmanga irnênga omhai laia khan lekha a’rziaka, “Nin chunga irngeina inpungin om ri se. 26Ki ram op sûnga hin Daniela Pathian hi biakhai sian chi ri sehai, tiin thupêk ki siam.
Ama chu Pathian hring a nia, a det kumkhuaa,
a ram chu insiat thei ni no nia,
a op khom a hek tenin op a ti.
27Ama’n a saninzôka, a saninhringa,
irnêng le irvâna irsinsiana le thil irkhêl a tho theia;
ama hi kâmkeibaknei sinthotheina ata Daniela sansuaktu chu a ni,’ tiin.
28Kha tena chu Daniela hi Daria roirêl lai le Persia mi Kura roirêl lai chu lam tinrênga a inchumtir tâk a ni.
Currently Selected:
DANIELA 6: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
