TENYARTEM MAPA 18

Paul Korint Nung

1Ajiser külen Pauli Athen toktsü aser Korinti aru. 2Ponta nunger Akula tenüng agi Yihuda nunger ka pai ajuru. Klaudiai Yihuda nungertem ajak Rom nungi aenshiang ta ozüng agütsü nung, pa aser tebutsü Priskila tena Itali nungi tawa-ang arua liasü, aser Pauli parnok dangi aru. 3Aser parnok ama Paula süki yanglur ka asünung, pai parnok den anen. 4Amungnü shia sinagog nung pai kuli agüja sayu, aser Yihuda nunger aser Grik nungertem anaprongla pai mesüzük.

5Saka kodang Sila o Timoti na Makedonia nungi alu, Pauli sayutsüngiba nung bendanga agütsü, aser Yihuda nunger dang Yisuji Khrista ta kuli asü. 6Kodang parnoki pa anema noktak aser pa atala, pai pa sü ajatoka parnok dang ashi, “Nenok zü nenok pei kolak manung liang. Ni merüka lir. Tang nungibo ni Bendangertem dangi aotsü.” 7Idangji pai idak nungjagi pila aser Tsüngrem külemba nisung ka tenüng Tita Yustar kidangi atu, koba sinagog kidanger süa liasü. 8Aser sinagog kibur, Krispa aser par kidang alir ajaki Kibuba dak amang, aser Korint nunger aikati aji angashia amang aser baptitsü.

9Aser aonung mangdang ka nung Kibubai Paul dang ashi, “Tetsübu, ajemajema meli-i jembijen jembiang, 10Kechiaser ni ne den lir, shingaia ne dak mazüktsü aser ne dak tamajung mebenshitsü, kechiyong iba yimti nung kü nübur jenti lir.” 11Anungji pai idakji küm ka sür ita trok renteta parnok rongnung Tsüngrem O sayua amung.

12Galilio Akaia nung governor alidang, Yihuda nungertemi lungjemer Paul anema apuso, aser obendangdaki pa anir arua, 13ashi, “Ozüng anema Tsüngrem külemtsü, iba nisung yagi mesüzükdagi,”

14Saka kodang Pauli jembitsü tenzük, Galilioi Yihuda nungertem dang ashi, “Oh Yihuda nungertem, ibai atangji tai mapa mesüra ashikülakba ka indang süra ni nenok dang angala, 15saka iba otem aser tenüngtem aser nenok pei Ozüng indang asüngdangtepba süra, ibajibo nenoki nenok sasa reprangang. Item indang obendanger ka ama ni mekümnür.” 16Aser pai parnok obendangdak nungi aridok. 17Idangji parnok ajaki Sostena sinagog kibur ka apu aser obendangdak kima nung pa dak azük, saka Galilioi item indang kecha temulung magütsüi liasü.

Paul Antioki Shilangba

18Paul Korint nung ainü amung aser adianutem nungi pilar Priskila aser Akula den Siriai rong nung ao. Aser Kenkerea nungi mapusodang pai azüngashiba#18.18: Azüngashiba mapang nung tekolak sütokbaji Yihuda nunger yimya ka liasü. ama tekolak sütok. 19Parnoki Efesa atong, aser idakji Pauli parnok toktsü, saka pai pa kija sinagogi atu aser Yihuda nungertem den o toktepa langzütep. 20Parnoki pa dang anogo tali amungtsü asüngdang, saka pai songtem. 21Saka piladang pai parnok dang ashi, “Tsüngremi mulungra ni nenok dangi tanaben arutsü.” Aser pai Efesa nungi rong nung pila-a ao. 22Pai Kaisaria tonger külen arogo nem salem agütsü aser Antioki alu. 23Idakji mapang tatsüka endoker külen pai pila aser Galatia o Frugia lima ajanga tatongi sema ao aser nütsüngtem ajak tashi itdaktsü.

Apolo Efesa Nung

24Tang Yihuda nunger ka Alexandria yimer tenüng agi Apolo Efesai aru. Pa tsüngro songa jembiba aser Lai kanga junga metetba nisung ka liasü. 25Iba nisung Kibuba tesayuba lenmang nung sayuteta liasü, aser pai Yohani baptitsüba indang dang metetaka, tanela tejangraba agi Yisu indang shitak pai sayua liasü. 26Pai tasü ita sinagog nung jembitsü tenzük. Kodang Priskila aser Akulai pa o jembiba angashi, parnoki pa anir aru aser Kibuba tesayuba lenmang indang tali tejangjaba pa dang rateta sayu. 27Kodang pai Akaiai aotsü bilema liasü adianutemi pa tasü itdakja ajungshi, aser pa agizükang ta nütsüngtem dangi shiti zülu. Kodang pa atong, Tsüngremer taochi ajanga amangba purtem atema paji teyari tulu ka liasü. 28Kechiyong Lai ajanga Yisuji Khrista lir ta kuli agütsüteta pai Yihuda nungertemji yimjak nung o toktepba jembiba nung koka liasü.

Currently Selected:

TENYARTEM MAPA 18: AONAGABSI

Highlight

Copy