TENYARTEM MAPA 17

Tesalonika Nung Rongrongba

1Parnoki Amfipoli aser Apolonia ajanga or külen, Tesalonika kong Yihuda nunger sinagog ka liasü ajagi aru. 2Pauli pei yimya ama sinagogi atu. Idakji Amungnü asemnü tashi pai parnok den Laishiba nungi bushia langzütepa liasü. 3Aser Laishiba nungi tuyua, Khristaji tim atemtsüla aser tasü nungi shia arutsü tenüngdaktsü liasü ta kuli agüja, pai ashi, “Yisu shiba ni nenok dang sangoktsür paji Khrista lir.” 4Parnok kar amangdakja, yimsü nung keta asenba Grik nunger telok tulu ka, aser tongtitsür aika Paul aser Sila den aden.

5Saka Yihuda nungertemi mokokaji aser nisung tamajung kar anitener telok ka kümteta parnoki yimtiji rongrongdaktsü aser Yasoner ki makbanga yimkong lokti dangi parnok anitettsü bushi. 6Saka kodang parnoki Paul aser medemertemji mangu, parnoki Yason aser adianutem kar yimti yimsüsürtem dangi atsür oa ayimtena ashi, “Item yagi alima meyipshidaktsür, aser tang parnok asen yimti-i arua lir; aser Yasoni parnok aniok. 7Aser parnoki Yisu ta ajaba tangar chuba ka lir ta shia Kaisar chubatiba ozüngtem anema benshir.” 8Aser ya angashia nisungtem aser yimti tata-sosangtem tipmetemdaktsü. 9Parnoki Yason aser tamangertem nungi talangzükba sen agizüker külen parnok chiok.

Tenyartem Berea Nung

10Idangyongji tamangertemi Paul aser Sila ammang nung Bereai yok; parnok tonger parnoki Yihuda nunger sinagogi atu. 11Tang Tesalonika nung alirtem dang nungi idaki alirtem tajungba liasü, kechiaser parnoki kanga jangrabangra mulungso agi oji agizük, aser itemji shitak asü masü ta anogo shia Laishiba nungi bushi. 12Anungji parnok aikati aser Grik nunger tulutsür aikati aser tebura aikati amang. 13Saka kodang Pauli Berea nunga Tsüngrem O sangoktsüogo ta Tesalonika nung alir Yihuda nungertemi meteta aküm, parnok ajagi arur teloktemji arimesoa rongrongdaktsü. 14Idangyongji adianutemi Paul tzüyimküm tashi yokadok; saka Sila o Timoti nabo idakji ata. 15Saka Paul meinoktsürtemi pa Athen tashi anir aru, aser Sila o Timoti na dang pa dangi takok tashi yakta arung ta shir parnok pila.

Paul Athen Nung

16Tang Pauli parnok Athen nung ata-a alidang, yimtiji süngyanglutem agi sünga aliba angu nung pa kanga jashi. 17Anungji sinagog nung Yihuda nungertem aser yimsü nung keta asenertem den aser ano kenüamati watidak pa den ajurutepertem den pai kuli süa o toktepa langzütep. 18Epikurion aser Stoik tesayurtem kari pa den ajurutep. Kari ashi, “Iba tebang liliba memetetba nisungi kechi shinür?” Tangar kari ashi, “Pa Bendanger tsüngremtem tesayur ka südi; kechiaser pai Yisu aser shia aruba indang sayutsüngir.” 19Anungji parnoki pa Areopaga ta ajaba tenemi yimti mungdang tsüngdangi anir atu aser asüngdang, “Nai jembiba tesayuba tasen ya kechiar onoki metetnür, 20kechiaser tesüngmangtsü o kar nai onok dangi bener arur. Anungji itemi kechi tetezüar onoki metetnür.” 21Kechiyong Athen nungertem aser idakji munga alir aenertem ajak anogo tepiyong kecha mapa meinyak, saka o tasen ka jembitsü mesüra angashitsü dang bilema aser yongyaseta amung. 22Pauli Areopaga tenem mungdang madang noktak aser ashi, “Athen nüburtem, nenok yimsü nung kanga dang takang ta ni ajiteter. 23Kechiaser ni nenok tekülemba osettem repranga senzüdang, ‘MEMETETBA TSÜNGREM KA ATEMA’ ta zülur tenladak ni angu. Anungji nenoki kechi memeteti külemer, ibaji ni nenok dang sangoktsür. 24Alima aser idakji aliba ajak yangluba Tsüngrem, pa anüng aser alima madak Kibuba asünung teka agi yangluba tenla kitem nung pa malir. 25#1 Ch. 8.27; Isa. 42.5; TMa. 7.48 Mesüra pa langka tenüngdaktsü aka ama, nisung teka agi pa metenzüker, kechiaser paiang ajak nem taküm tangula, aser oset ajak agütsür. 26Alima ajak nung lidaktsütsü asoshi meimchir kin shiaji Pai nisung ka ajanga adokdaktsü, aser parnok asoshi tim mapangtem aser talidaktem pai lateta yutsüogo, 27Tsüngremi item ajak ya meimchiri pa bushitsü aser ngudaktsütsü asoshi inyak. Aji saka paji asenok shia nungi talangka nung pilaa oa mali. 28Kechiaser ‘pa dak asenok alir, arakzür, aser taküm alir.’ Nenok pei ken mejemer kari ashi ama: ‘Kechiaser atangji asenoka pa chirtem lir.’ 29Anungji asenok Tsüngrem chirtem asünung Tsüngremji hon, taribi mesüra lung, oda nisung tesangra teka agi angentetba ama asenoki mebilemtsüla. 30Anungji memetetba mapangji Tsüngremi odang toktsü, saka tangbo ajaklen nisung ajaki temulung meyiptsüla ta pai ozüng agütsür. 31Kechiaser pai shimtetba nisung ka agi temeshiba nung alima ajonga o bendangtsü asoshi pai anogo ka atemzükogo aser iba indang pai tasü nungi shia arutsü nung nisung ajak dang kuli agütsüogo.” 32Saka tasü nungi shia aruba indang kodang parnoki angashia, kari atala-a menütsü, saka tangar kari ashi, “Iba indang na nungi ano khen onoki angatsü.” 33Anungji Pauli parnok rongnungi pila-a ao. 34Saka nisung kari pa den asem aser amang. Parnok rongnung Areopaga Mungdang züngsem ka Dionusia aser tetsür ka tenüng agi Damari, aser parnok den tangara liasü.

Currently Selected:

TENYARTEM MAPA 17: AONAGABSI

Highlight

Copy