Ruku 22

Jesu 'Ana'i Hemi Kosarame Ojajina

(Matiu 26:1-5; Maka 14:1-2; Joni 11:45-53)

1Puretia isitia pa'ana ka'ene Pasova 'wavujihuni sora 'ehuni vea roe turanana. 2'Ejume pirisitia mama'ina 'ee Sikuraipia Hu 'anae kwahuni 'unama savara. Ijihuni maijaho pu ea mapokijihi juhavara.

Jutasira Jesu Nahamahuna'e Nimaa Venajina

(Matiu 26:14-16; Maka 14:10-11)

3'Ejume Huni tisaiporu pina ka'ene Jutasi Isikariatina 'wavujaho Setanira rosamana. 4'Ejume Jutasira va'e hura ichá'ina'e Jesu nahamahuniji pirisitia mama'ina 'ee sorutia pu'úmo 'unama amairiara. 5Pu niho'o teamanavume eha monia vaja'i 'waravara. 6Jutasi puni ira hene teamavumakame 'unama ka'ene Hu nahamahuniji hami hema parajakame ea niho'o areri pahehuniji samana.

Jesura Pasova 'Iruma I'irono Amairiaramajina

(Matiu 26:17-25; Maka 14:12-21; Joni 13:21-30)

7Puretia isitia pa'ajihuni vea aneja rejumakavi'i pu sipi 'u'ua 'anae swasa vehuna. 8'Ejume Hu Pita'o Joni'o irechamie ijá 'iama Va'e Pasova ihuniji amairie nú ija 'iamana. 9'Ejume pu apoma ijá 'wava Nú va'e ichihi 'iruma amairi'eja? 'wavara. 10Hu ijá 'iama Ike heha. Ja ari va'eje ea pina toa 'ene vu'e piuni'ena. 'Ejakame ja hu 'arariha va'e sea ka'ene hu aji'amajino va'avara. 11'Ene ja ika'ina sea anesura 'wa'avara Najahi'inijara ika'ina'e a 'waramana. 'Ú 'iruma ijuri tinia ka'ene Nara Nuni tisaiporu epu'úmo Pasova ihunijaho ichine? 'waha 'iamana. 12'Ejakame hura ruha ka'ene ichuto niamairiarame namuji najahakame ijino amairiara'avara 'iamana. 13'Ejume pu va'ajime uneunecha mapoka areri Hura 'warama kaja'ina'e rejume pu Pasova ka'ene ihunijaho amairiaravara.

Natohwijara Kwamaji Vwihaji'i 'Iruma Ihunijina

(Matiu 26:26-30; Maka 14:22-26; 1 Koritia 11:23-25)

14Vea kaji apejume Hu Huni apasorua pu'úmo roe 'aijua rori asuma hijara. 15'Ejume Hu pu ijá 'iama Na ja pu'úmo Pasovakaho inareje iji'a haha hiana apehuna ura reniu. 16'Enajihuna'e Na nimai ja 'waravu Na kú'o 'iruma painu va'u'e Godoni ari jara roe nimaae rejakame iji'a ihuna 'iamana. 17'Enarena Hu kapusia apene Godiho teimani 'wa'ika'i ijá 'iama Ike apene vajúsarame iha. 18Ijihuni maijaho ajina riha ikaho Na painuva'o vea ka'ene Godoni arijara ro'amaji ihuna 'iamana. 19'Enarena Hu puretia apene Godi teimani 'wa'ika'i tuame vajihi'i ijá 'iama Ikaho Nuni haha'e jonijihuna'e vajihukúne ina veji'i Na vwihani'avara 'iamana. 20Areri puretia ija'ina'e Hu toa kapusi rukina mihi'i ijá 'iama Ike kapusia toa rukinakaho Nuni 'aa ka'ene jonijihuna'e arihuna'e maiu'inaka nahama 'waramajina 'iavi'i mihana. 21'Enakaivo heha! Ea ka'ene Naa'e nahamihunijaho iviamaa ikino nú pu'úmo 'aijua rori hinu. 22Ijihuni hahi Ema Puni Harihijaho Godira vwihana ja'ina vehuna kaivo ea ka'ene Hu nahamahunijaho niho'o eha sisea ni'ima'ura apehuna 'iamana. 23'Ejume pu pusumano ea ka'ene nahamahunijaho ea irarana 'warahuniji ka'i 'ahiume 'wamareja puni vaja kajino pira'aravara.

Ea Irá Natohwiji Ka'i'ahiume Vahacharavajina

24Ea irara natohwa'e rehuniji puni vaja kajino hine pira'aravara. 25'Ejume Hu pu ijá 'iama Jenitaru puni kinia ka'ene iki mwe'i hijujija ea 'ajohahuna harura rukina. 'Ee 'ajohi'ina kajija swara rukinijina 'wavura. 26'Enakaivo ja ija'ina parehuna kaivo ea irara joni vaji natohwa'e re'i 'aha'amajaho hu areri sesamaa puna'i rene 'ee areri pwea sa'ina'e re'amana. 27'Ú ea icharo natohwane? Ea ka'ene asuma hine 'iruma inujarana ho ea ka'ene namine 'iruma'e 'eka roe vajahujarane? Ea ka'ene asuma hine 'iruma'e inujaho natohwa kaivo Na ea ka'ene arini namine jaae 'iruma vajihujina. 28Vea ka'ene Na sisei hijujaho ja nú pu'úmo Nuni rori namijara. 29Nuni omijara Na Nuni kwaa 'ajohuna mihaja'ina'e Na 'u'o ja mihu. 30'Enajihuna'e Nara ja pijihakame ja Nú pu'úmo Nuni ari 'aijua 'ahi ahuma toa 'iruma ine 'ee ja Isureri puni amuja ka'ene iropu ropu no'o ruha ka'ene pua'e 'otua vetihunijino hine 'otua vetihuna 'iamana.

Jesu Pitara Hemahuniji Rona 'Waramajina

(Matiu 26:31-35; Maka 4:27-31; Joni 13:36-38)

31'Ejume Hu Saimani ijá 'wama Saimani hena! Setani aa'e apena'e areri 'witia ruarahu ja'ina'e ruara'i 'ahau'e ura reju'e ro 'ejahie 'warimana. 32'Enakaivo Na oni siporua 'ojura'omo ara nimaa ronujaho pa'ohuna. 'Enareje a kú'o 'uname Nuni ro'amajaho ara Nuni ehijakija najahakame pura nimaa rojujaho ija kisi apena puni una'i saname vehuna 'wamana. 33'Ejume Pitara ijá 'wama Natohwe na niareri rena hijura'omo A tipurai va'amajaho na A hu'úmo vahuna. 'Ee A kwa'amajaho na A hu'úmo kwahuna 'wamana. 34'Ejume Hu ijá 'wama Pita Na nimaa aa'e 'waravu. 'U'ora iviasa mai'o pa'ume'eje a 'aha no'opisu Na pakimuna 'ia'eje iji'a 'u'ora 'umehuna 'wamana.

Pausia Tuja 'Ee So'wa

35'Enarena Hu pu ijá 'iama Vea ka'ene Na ja irechamiume pausia 'ee tuja 'ee mumora sisa pa'a va'ajaho ja vi pivusahara raka? 'iamana. Pu ijá 'wava Niho'o pana 'wavara. 36'Enakaivo Hu pu ijá 'iama 'Enakúne iviamaa ea irahuni pausia 'ee tuja na'amajaho 'eka va'amana. 'Ene ea irara so'wa pa'ana'e re'amajaho huni ateha 'eka va'e 'imenareje monia 'eke huni so'wa 'ime'amana. 37Ijihuni maijaho heha vaji venareje Naa'e ronarena 'waramajaho rehuna. Hu 'u'o ea sisea veji'ina pu'úmo tahuna 'úmajaho iviamai Nuni vaji nimaa roe rehuna 'iamana. 38'Ejume pu ijá 'wava Natohwe kama! So'wa no'ohe'i ikenakúne kima! 'wavara. 'Ejume Hu pu ijá 'iama Ijaho arerina 'iamana.

Jesura Arivi Huri'a 'Ahi Siporua 'Onajina

(Matiu 26:36-46; Maka 14:32-42)

39'Enarena ru'e'une nikú'o Hu venuja'ina'e huri'a Arivi va'ume Huni tisaiporu Hu 'ararihae va'ara. 40Hu va'e ruha kajino 'e'unarena Hu pu ijá 'iama Ja Godoni siporua 'oji'i hijakame ja pavena ki'avara 'iamana. 41'E'ika'i Hu pu irechami'ika'i va'e karokaro muna pi'onave va'e 'ohune sa'inijakaru nitupari same hiji'i siporua 'onana. 42Hu ijá 'wama Amo A ura rena'ipisa kapusiakaho Nuni rora apena ruvaa'a. 'Enakaivo Nuni ura pana kaivo Oni ura ija'ina'e ve'amana 'wamana. 43'E'eme 'ona oji'ina akúpa 'ahi rena roe Hu harura mahana. 44Hu hine oja hia'eme siporua 'ojumakame haha natohwa'e hiame huni piropa 'aa muka sa'ina'e mwe'a 'ahi arihana. 45Hu siporua 'onuva'o 'urine Huni tisaiporu puni va'i kimajaho pu hine temuki 'aninamiume notuara. 46'Ejume Hu pu sie ijá 'iama Ja iraka vene notui'i navo? 'Urine siporua 'o'irakúne ja pavena ki'avara 'iamana.

Jesu Kamovajina

(Matiu 26:47-56; Maka 14:43-50; Joni 18:3-11)

47Hu mai'o hine ijí 'wara'eme ni'aha kwinu Jutasi ka'ene iropu ropu no'o pinijara ea mapoka'e aherame roe hu Jesu ura mina ve'i 'ahaume roana. 48'Ejume Jesura hu ijá 'wama 'Ú Jutasi a Na Emaa Puni Hariha nahamahare'e ura mina vena avano? 'wamana. 49'Ejume ea ka'ene pu pu'úmo namijajipo uneka ka'ene re'i venaji kimareja pu ijá 'wava 'Ú Natohwe nú núni so'wi piji'eja? 'wavara. 50'Enarena ea pini huni so'wi mavane 'urine pirisiti ni'inijihuni pwea pinijihuni ataa ka'ene mana'inijaho 'anaume 'uhu'usahana. 51'Enakaivo Jesura eha vene ijá 'wama Ijá kajaho arema 'wa'ika'i Hu huni ataa iji 'unavume maranana. 52'Enarena Jesura pirisitia mama'ina 'ee sorutia Temiporu 'ajohi'inijija 'ee emakina ka'ene Hua ape'i roajihi ijá 'iama 'Ú Na ea nesa apeji'ina'omo ja so'wa hajaa 'eke Naa'e apeni'i 'ahiume roare? 53Na veku veku ja pu'úmo Temiporu vaji hijura kaivo ja Na paapeniura. 'Enakaivo iviamaa ike vea mukakaho 'ee mwe'a ike nutuvi'ina kehuni harurijaho jona 'iamana.

Pitara Jesu Hemahajina

(Matiu 26:57-58, 69-75; Maka 14:53-54, 66-72; Joni 18:12-18, 25-27)

54Pu Hu kamome apene pirisitia ni'inijihuni sei va'ume Pitaho ma kameri naminakivi'i 'arariha va'ana. 55'E'eme vena nú'úha riri jaumakame Pitaho pu pu'úmo asuma hinana. 56'E'eme hu ijino asuma hijume napara pwei pini Pita nia kanavi'i ijá 'iama Ea ike 'u'o Hu hu'úmo onuna 'iamana. 57'Ejume hu heme ijá 'wama Napare niho'o na Hu pahene pakavi'ina 'wamana. 58Hu 'aha josu pare'eme emai pini kamarena ijá 'wama A 'u'o Huni ea pina 'wamana kaivo Pitara ijá 'wama Parue na niho'o pana 'wamana. 59Hu vea muka kwinu pa'are'eme ea pini roe pasonananavi'i ijá 'iama Na nimaa 'waravu. Ea ika 'u'o Hu hu'úmo 'urahe onuna. Ijihuhi maijaho hu Karari ora 'iamana. 60'Enakaivo Pitara ija 'wama Parue ara iraka ka'ene 'warimujaho na mai'o suja 'wamana. Hu ijí 'wara'eme ni'aha kwino 'u'ora 'umenana. 61-62'E'eme Natohwijara aroma Pita ka'eme Pitaho iji'a Natohwijara iraka ka'ene 'waramajaho vwihanana 'U'ora mai'o 'ume'i 'ahae ve'eje a 'aha no'opisu Na pakimuna 'i'ena 'wamana. 'Ejume Pitaho ijí vwihanarena samai va'e'une niho'o natohwa'e niramana.

Jesu 'Ijahe 'Ee Hijahajina

(Matiu 26:67-68; Maka 14:65)

63Ea ka'ene Jesu 'ajoha hijajipo apene 'ijahe 'ee hijahara. 64Pu Hu apene nia hwamahe 'anai'i ijá 'wava A unenu'u 'aho'a ka'ene vaji navujija hena kimuna 'úmunakúne ea irara A 'anaajaho 'waruva nú heja 'wavara. 65'Ene pu uneunecha niho'o mapoka'e Hu niname 'ee 'urarahe ira sisea 'waravara.

Jesu Aheme Kanisoru Puni Una'i Roajina

(Matiu 26:59-66; Maka 14:55-64; Joni 18:19-24)

66Vea nituvume emaa puni mama'ina 'ee pirisitia mama'ina 'ee Sikuraipia roe kanisoru puni nú'úhi ahuma hi'eme Jesuho puni una'i aheme roajivara. 67Pu apoma ijá 'wava 'Ú A Keriso re'amajaho 'waruma 'wavara. Hu ijá 'iama Na ja 'wara'ujaho ja panimaa rohuna. 68'Ene Na jaa'e apora'ujaho ja eha pavene 'wari'eja. 69'Enakaivo iviamaa rene Emaa Puni Harihijaho ija mana'ina ka'ene Godoni harurija'i asuma hihuna 'iamana. 70Pu Hu apome ijá 'wava 'Ú A Godoni Harihe? 'wavara. 'Ejume Hu pu ijá 'iama Ja Na 'warivu kajaho Na nimaa ijina 'iamana. 71'Ejume pu ijá 'wava Nú ea 'ahopo Hua'e ronareje namahuji hehuna pana. Ijihuni maijaho nú onúno Huni irijaho núni ataa ikino hejara 'wavara.

Currently Selected:

Ruku 22: mcq

Highlight

Copy