Ruku 18

Napara Amunijaho 'Ee 'Otua Heji'inijihuni Haa

1'Enarena Hu ike haakaho 'waramana. Ijihuni maijaho Hu ura renajaho pu majamano hine siporua pasena'eje 'o'avarono 'waramana. 2Ara natohwa pini ea 'otua heji'ina pina Godiho pajuhame 'ee ea 'ahopuni hura paveji'i hinuna. 3'Ena'omo amuna pina 'u'o ijí ara kajino hinuna'omo hu na'ia mapoka'e va'e 'otua ve'i 'ahau'e pasonananamuna. Napara kajara hu ijá 'wamune Ea pini na hine sisei 'ahiukúne ni'ajiha 'wamuna. 4'Enaka'i nitama rene hu hine napara kajaho pataarohana kaivo na'ia kwino hu ijá rona Na Godiho pajuhame 'ee ea 'ahopuni hura pavejura. 5'Enakaivo amunakaho majama roe 'warimu jihuna'e hura ura renuji na vehuna. Ijihuni maijaho hura pasonanavakame na siseranihuni jihuna'e na ni'ajahuna ronana. 6'Enarena Natohwijara ijá 'iama Ea ka'ene 'otua heji'ina siseijara iraka ka'ene 'waramaji heha! 7'Ú Godiho Huni ehija ka'ene Hura iji pijihajipo iraka ka'ene veiri'a na'ia ijikano siheria pave'i kaivo jarivi'i navujaho Hu arimaa pamihuna raka? 'Ú Hu hine tetamu va'u'e iji'a vajihuna raka? 8Na nimai ja 'waravu. Iraka ka'ene arira maijino Hu pu marako vajihuna. 'Enakaivo vea ka'ene Emaa Puni Harihijara ro'amajaho ea vi icharo iki mwe'i nimaa roji'ina hihuna 'iamana.

Parasia 'Ee Takisia 'Eki'ina Puni Haa

9'Enarena Hu haa ike 'u'o ea ka'ene pu pusumano arira maa ro'ika'i ea 'aho'a senavujihi 'waramana. 10Na'ia pini ea no'o kahi Temiporu vaji siporua'e 'o'i 'ahiume va'ara. Ea pina Parasia 'ee ea pinijaho takisia'e apeji'ina. 11Ea ka'ene Parasi ijaho huhusu namiji'i siporua ika'ina'e 'onana. Godi teimani 'wavujaho na ea 'aho'a ka'ene pu pusumano vwihane 'ee ira'ata apene 'ee napara hurichavu ja'ina pana. Na A teimani 'wavu. Ijihuni maijaho na ea ka'ene takisia'e apeji'ina ka'ene kame naminu kaji vare'ina pana. 12Na hura kwino vaji 'aha no'o 'aura areme 'ee uneunecha ka'ene na 'ekujaho 'aho'a taisia veji'i hijura 'uáme 'onana. 13'Enakaivo ea ka'ene takisia apeji'inijaho karori namine huni niura akúpa 'aha paniri'i kaivo túra 'ahi 'anai'i ijá 'wama Godi na ea siseakúne numirima 'wamana. 14'Enajihuna'e Na ja nimaa 'waravu. Ea kajaho arira rena huni sei va'ana kaivo pinijaho pana. 'Ena'omo ea irara ori'ini huni pinana ahasiri'amajaho Godira vetie hu ajuarana ohuna. 'Enakaivo ea irara ori'ini ajuara'amajaho Hu vetie huni pinana 'urihuna 'iamana.

Jesura Sesamaa Merajihajina

(Matiu 19:13-15; Maka 10:13-16)

15'Enakaivo ea 'aho'apo kasimaa aherame 'eka roume Hu Huni ija puni húmata 'ahi irechami'amarono roajivara kaivo Huni tisaiporuepo eaka mapoka kajija 'urarahara. 16'Enakaivo Jesura ijá 'iama Kasima kajija maki'eje Nuni roajiva kaivo ja patanu'uriha. Ijihuni maijaho Godoni arijaho kasimaa ikipo vejuja'ina'e vejujihipuni ara. 17Na nimaa nimai ja 'waravu. Ea irara sesamapo Godoni ara apeju ja'ina'e paape'amajaho Godoni ara pavahuna 'iamana.

Ea Uneunecha Rukima'urijina

(Matiu 19:16-30; Maka 10:17-31)

18Jua puni ea natohwi Hu apoma ijá 'wama Najuhi'ina mavarasa'ine na unenu'u pina maa ichá'ina'e venareje majama hihunijaho ape'ejo? 'wamana. 19'Ejume Jesura ijá 'wama Irakijihuna'e a Na mamaa 'wimo? Godira nikwinu'wi Huhuri mamaana. 20A Godoni tamana nihenuna. A napara patura'amane 'ee ea pa'anaa kwa'amane 'ee nesa paape'amane 'ee a ea pina sisea panama'amana. 'Ene omuna 'ee ohuna ijihipuni ira hena ve'amana 'wamana. 21'Ejume hu ijá 'wama Na nitama sesamu'uru rene tamana kajaho hami venapena routa 'wamana. 22'Enakaivo Jesu ijí henarena Hu ijá 'wama A unenu'u pina kwinu mai'o areri pa'ana. A va'e oni uneunecha mapoka 'eke 'imenareja'e monia ona 'eka ea uneunecha pa'aji vaji'amaji'a oni uneunecha mamaa akúpa 'aha nahuna. 'E'eje iji'a roe Na 'ararihi'amana 'wamana. 23Ea kajaho ijí henarena temumana. Ijihuni maijaho hu niho'o kukua mapoka rukini jihuna'e avanana. 24'E'eme Jesura ea kajaho kavi'i ijá 'iama Ea ka'ene uneunecha mapoka rukinijipo Godoni 'unami vahunijaho niho'o kisina. 25'Enakaivo mahi nitirua huni titi vaji aruma vahuna samaa kaivo ea kukua uneunecha rukima'urijara Godoni ari vahunijaho kikisima'ura 'iamana. 26Ea 'aho'a ijí henareja ijá 'wava Ea irahipo majama hihuna ape'eja 'wavara. 27'Enakaivo Hu ijá 'iama Emapo ija'ina vehuna niho'o areria pana kaivo Godira Huhuso ijá kajaho vehuna 'iamana. 28'Ejume Pitara ijá 'wama Hena! Nú núni ara are'i kaivo A 'ararihae oju 'wamana. 29'Ejume Hu ijá 'iama Na nimaa nimai ja 'waravu. Ea pina mai'o huni ara napara vwehwaha emahwaha 'ee sesahwaha Godoni arijihuna'e irechamiajara 30hu niho'o iviamaa iki 'aha mapoka 'ekareje túna'i majama hihuna apehuna 'iamana.

Jesura Kwahuni Vu'a No'opisuji Rona 'Waramajina

(Matiu 20:17-19)

31'Enarena Hu ea iropu ropu no'o aherame ani va'arame ijá 'iama Heha! Nú Jerusaremi va'iro vejura'omo poropeti nitama Ema Puni Harihiji uneunecha ka'ene rehunaka vejajaho nimaa'e rehuna. 32'Ene pu Hu apene Jenitaru mihe pu apene sipana asutie 'ee sise'i 'ahae 'ee chera pisotihuna. 33'Ee hisi vene hijahe 'ee pu Hu 'anae kwahuna kaivo vea no'opisu mwe'i vaji namareje iji'a kú'o 'urihuna 'iamana. 34'Ene pu niho'o ma'uako pina pahejara. Ijihuni maijaho iraka ka'ene 'waramajaho ijihuni maa vaji navumakame pu pahejara.

Jesura Nisira Rukina Ka'ene Nia Pa'aji Vejume Maranajina

(Matiu 20:29-34; Maka 10:46-52)

35Hu Jeriko rori ro'eme ea pina nia supavi'ina 'unamutoi asuma hine ea jariravi'i hinana. 36Hu hejume ea mapoka'e ruva'ume henarame aporame ijá 'iama Ikaho iraka'e vejo? 'iamana. 37'Ejume pu ijá 'wava Jesu ka'ene Nasareti orijara roa ruva'u 'wavara. 38'Ejume hu ijá 'umena Jesu ka'ene Teviti oni Harihakere numirima 'umenana. 39Ea ka'ene urasahe va'ajipo 'urarahe irano'a are'amarono 'waravara. 'Enakaivo hu ira ajira'e ijá 'umena Teviti oni Harihe numirima 'umenana. 40'Ejume Jesuho areme nami'ika'i 'waravume pu ahema apene Huni ro'avarono 'waramana. Hu Jesuni rori ro'eme Hu apoma ijá 'wama 41Na iraka'e a veta'urono a ura renao? 'wamana. 'Ejume hu ijá 'wama Natohwe na ura kú'o nia niri'i 'ahiu 'wamana. 42'Ejume Jesura ijá 'wama Ara nimaa ronujara veju'e maranaukúne nia niria 'wamana. 43Hu ni'aha kwinu nia nirie Jesu 'ararihae oji'i Godiho teimani 'wamana. 'Ejume ea mapoka kajija ijí kamareja Godiho ta'arohara.

Currently Selected:

Ruku 18: mcq

Highlight

Copy