Ruku 15

Sipia Raname Savajina

(Matiu 18:12-14)

1Na'ia kwino ea ka'ene takisia apeji'ina 'ee ea sisea maho'o roe Huni rori vu'a he'i roara. 2'Ejume Parasia 'ee Sikuraipi niho'o hine sui'i ijá 'wava Ea ikaho ea sisea aherame pu pu'úmo 'iruma inuna. 3'Ejumakame Hu ike haakaho 'waramana. 4'Ena'omo ja ichá'ina vwihajo? Ei pini sipia mapoka mapoka (100) nami'ira'omo kwinu paka'ipisa hu ichá veja'e? 'Ú hu 'aho'a ka'ene (99) ijija huri'i irechami'i kaivo va'e kwinu'wi sava'a raka? 5-6Vea ka'ene hu piunamujaho teamavu'e apene twaitoi raname rouna. Vea ka'ene ari roujaho napuhwaha 'ee ea ka'ene huni ara rori hijujija ijá 'iama Na nuni sipia ka'ene ranama savujaho nipiunavutakúne nú pu'úmo mari'uha 'iamana. 7Ea arira ka'ene (99) ijija pana kaivo ea kwinu'wi huni sisea nahama 'warame ta'arohujaho akúpa 'aha niho'o ni'ima'ura mari'uvura.

Monia Ranama Savajina

8'Enaho napara pina monia siriva iropu ropu na'ira'omo oma kwino 'o'ipisa hu ichá'ina'e veja'e? Hu ira 'ene túa anasavi'i masuanu'wi sea vajaka mapoka kajino tinuva'o kame apeja'a. 9Hu ijí kama ape'ama jihuna'e huni napuhija 'ee ehwaha 'umenae roajima ahuma hijakivi'i hu pu ijá 'iava Nú pu'úmo mari'uha! Ijihuni maijaho na nuni monia kwinu ranavujaho na nikame apejuta. 10'Unama nikwinu'ina kajino Na ja 'waravu. Ea sisea kwinu huni sisea vwihane temuvume nahama 'warama jihuna'e niho'o Godoni ona'oji'ina puni una'i teamarasahe mari'uvura 'iamana.

Hariha Ranama Savajina

11'Ejume Hu ijá 'iama Ea pina harihwaha no'ohe'ina. 12'Ena'omo 'u'uijara omaha ijá 'wama Amo nuni aachi'ijaho iviamai vajiha 'wavume omahi aachia punijaho ahaame pwina'a 'u'ua'e vajahe 'ee pwina poka'e vajahana. 13'Ejume na'ia josua pa'are'eme 'u'uijara 'urinajaho huni kukua mapoka kajaho 'eke kwaa jori va'e hine huni kukua mapoka kajaho majikarino hine ato'aruvume paranana. 14Hu monia mapoka ka'ene hununa'i navajaho niho'o ato'aruma paranana. 'E'eme kwaa ara kajaho ora vea ni'ima'ura rejumakame matuna'e hijara. 'Ejume hu matupuna'e pivunanamana. 15'Ejume hu va'e aea pihuni kaukara'e ve'i 'ahaume 'waravume hu ranavume va'e huni maha mapoka 'ajoha'i va'ana. 16'Ejume hu ijí asuna ka'ene maha'e vajihaji kimajaho niho'o mamaa'e rejume i'i 'ahaana. Ijihuni maijaho ea hu 'iruma ihuna pavajahara. 17'Ejumakame hu hine vwihanu va'o ijá rona Ea ka'ene nuni omijihuni kaukara'e vejujija 'iruma mapoka'e i'eju'e na iviamai ike matupuna'e kwa'i 'ahiu'e veju. 18'Ena'omo na iviamaa 'urina va'e amoho ijá 'wahune Amo na Godiho sise'i 'aha'e 'ee A sise'i 'ahauta. 19'Enakúne na oni hariha pa'wi'amana kaivo ara ea ka'ene oni kaukara'e vejujihi 'ahiu ja'ina'e 'ahi'amana 'wahuna ronana. 20'Enarena hu 'urine omahoni 'unama va'ana. Hu mai'o kwaa jori ro'eme omahi kamarena natohwa'e temuvume ariha ninuma va'e hariaha aharu 'oname ura mina vene nirisamana. 21'Ejume hariahi ijá 'wama Amo na Godiho sise'i 'ahae 'ee a sise'i 'ahauta. 'Ena'omo na oni hariha 'wihunijaho mai'o areri parenu 'wamana. 22'Enaka'i omahi pwehwaha ijá 'iama Mamako va'e ateha mavarasa'inijino apena roe apúsamaha. 'Ene rinia apena roe arinamahe 'ee mumora hwana hwanamaha. 23'Enareje purumakau 'u'ua poma paraji'inijino 'anae iji'i temarasaha. 24Ijihuni maijaho hariha nunakaho nikwamana kaivo 'urina roana 'ee hu niranavuma va'e paranana vo vukú'o piunavuta 'iamana. 'Ejume pu aneja vene ahaja iji'i niho'o temarasaha parajara. 25Pu hine 'iruma'e i'eme hariha ka'ene pokijaho juasi'i 'urahonana. 'Ena'omo hu 'uname ara rori roi'i chaja irumuna ka'ene javavajaho henana. 26'Ejume hu pwea pina 'umejume roume apoma ijá 'wama Kahaho iraka'e vejo? 'wamana. 27'Ejume pwea kajara ijá 'wama Oni 'u'uijara unenu'u pina pare'eme 'unama roajihuna'e omuni purumakau 'u'ua poma paraji'ina 'anae inare'e ijihuna'e irano'a apeju 'wamana. 28'Ejumakame hariaha pokijaho niho'o ajima parajume sei vahuna ura parejume omahi ariha roe pokijara va'e sea vaji aji'amarono 'ejahaana. 29'Ejume hu omaha eha vene ijá 'wama Na juara mapoka'e ikino a hu'úmo hine oni pwea puna'i kaukaraa vejura. 'Ene mai'o na'ia kwinu a papataarorahuta. 'Enakaivo a iraka'e na mihane? A niho'o kotia kwinu'wi pamihume na napuhu nú pu'úmo 'iruma vene ijuta. 30'Enakaivo ike oni hariha kajaho ara kukua ka'ene vajahajaho 'eka va'e paranaha'e saravi'i ato'aruma parane kú'o 'unama rou'e a purumakau 'u'ua povi'inakaho huna'e 'anaana 'wamana. 31'Enakaivo omahi ijá 'wama Nuni harihe a ikino nú pu'úmo hinujihuna'e uneunecha mapokakija nunijaho ona. 32'Enakaivo nú iviamaa 'iruma ine teamanuhuni jihuni maijaho oni 'u'uijaho nikwamana kaivo vukú'o 'urine 'ee niranavuma va'e paranana vo iviamaa kú'o kavara 'wamana 'iamana.

Currently Selected:

Ruku 15: mcq

Highlight

Copy