Popular Bible Verses from Jonɨ 15

Share

Nɨmɨ sahwainyɨ gɨraipɨwɨla kaavɨlyainyɨ. Sahwaihi gɨraipɨwɨla taanyabaraavihɨlyɨ. Pwai kuna wɨlanyɨmwaalajai gamɨnyɨ kuna wɨlamwaaimujai yɨsɨla naanga yɨ'nadengɨ. Sarɨmɨnyɨ mulamwaalyɨ yɨhyɨwɨjaihi aane pɨrɨ' kɨrɨ' nayaa mi jide'nanyɨra.

Nɨmɨnyɨ kuna dulanyɨmwaalyɨla! Sarɨmɨnyɨ kuna wɨlayɨhɨmwaalɨma! Taanya pɨbaai gɨraipɨwɨla kaavɨlyavɨ kuna mwari yajavaai yɨsɨla gamɨ sabaai myɨ'nyɨ yadevaaibɨ' nɨmɨnyɨ kuna mulamwaalyɨ nyɨpɨjaihi yɨsɨla myɨ'nyɨ jideihɨlyɨ.

Nɨmɨnyɨ kuna wɨlanyɨmwaaibɨzaihi nabaai sarɨmɨnyɨ nɨmɨre yagaalya yɨhwarajaihi yawɨ'na ‘Sa'na maarɨma!’ yawɨ'na yapɨjɨ Gotɨyarɨ sara kyɨwaaravapɨjɨ sarɨmɨnyɨna yɨma'nadesɨra.

Nɨmɨnyɨ manyɨdahɨlakyesaihɨlyɨ. Aawa. Sarɨmɨnyɨ yɨhɨthahɨlakeinyɨ. Yɨhɨthahɨlakena dara yɨhɨthakɨwa. Wawapɨjɨ gɨraipɨwɨlyabaai sɨla naanga yadevaaibɨ' sarɨmɨ sara jɨla! Nabaai sɨla sa yuyagaa' kuna waragwona! Nɨmɨrebwi yawɨramaa'na yadɨvɨ' nɨmɨre yayavɨna Nɨmwarɨ yuya sara kyɨwaaravapɨjɨ ‘Nɨmwai yɨhɨzaavana!’ dena yɨhɨthakɨwa.

A'mwe pware kware wɨvu'nyabwi gya'mweraavɨna wiadaa'nyɨ gamɨre gaalyabwi wakaja' naangebulyɨ. Naangebwi pɨbwi aane pwai kwarɨ mwarika!

Sahwai nɨmɨnyɨ taanya gazabaaizabaai sɨla myɨ'nyadevaai pɨdalasɨ'na yadelyɨ. Nabaai gazabaaizabaai sɨla yɨ'nadevaai ‘Sabaai sɨla pɨnɨ yɨ'nana!’ dada nayaa pɨdaaina. Gamɨ dɨna ‘Taanya savɨ buwɨta yuya sedala waryaanya yuya pɨdaalɨma! Taanya sa' tewaanya' yɨma'nana! Yɨsɨla naanga yɨ'nadevaalyɨ.’ Dɨna yaka nayaa pɨdaaina yadelyɨ.

Nɨmɨre kɨwɨnya da' yɨhɨthɨma! Nɨmɨnyɨ gɨmɨnyɨna tewaanya nyɨvu'nɨwakabaaibɨ' nɨmɨre pwaraavɨna tewaanya gɨvu'nana!

Sarɨmɨ yɨsɨla yɨ'nɨpɨja'na a'mwera tɨnna yɨhwanganapɨjɨ dɨna ‘A'mwe sara Jizaazarerera,’ dɨpɨ'desɨ. Sarɨmɨ tewaanna sara yapɨjɨya'na a'mwera Nɨmaamaangerɨna dɨnyɨna ‘Byaannakelyɨ. Dɨragɨnyalyɨ,’ dɨnyɨna yɨpɨ'de'nanyɨ.

Jizaazai gannyaraavɨ wɨdɨna “Nɨmɨ sahwainyɨ gɨraipɨwɨla nebulyainyɨra. Nɨmaamaangei gɨraipɨwawɨnya' nayaa maremwaaidelyɨ.

Pwai nɨmɨnyɨ mulamwaalyɨ nyajai taanyabaaibɨsarɨ mwasɨlaa wasɨ'na ya'nelyɨ. Taanya sabara wasɨ'nɨkebara yawaka baihɨ'na yɨnɨkebara, sabara mari'bwarakɨna yɨnɨkebara dɨkevɨ marira'na ya'nengɨ.

Sa yɨhɨthɨwa. ‘Nɨmɨre wɨvu'nyabwi sarɨmɨnyɨ yɨhwarana! Sarɨmɨre yɨlaayabwi yuneba yɨhyeku'nana!’ dena sa yɨhɨthɨwa.

Nɨmɨre kɨwɨnya kuna mɨdɨbɨza' nɨmɨre wɨvu'nyaburɨ yɨnahu dɨmwaalyideihɨlyɨ. Nɨmɨ sainyɨ Nɨmaamaangere kɨwɨnya mɨdɨnena gamɨre wɨvu'nyaburɨ yɨnahu mwaaiheinyɨ. Sara yɨgevaaibɨ' sara dɨmwaalyideihɨlyɨra.

Sare' kɨwɨnya' dara yɨhɨthɨvanɨge. Pwaigɨ pwarɨna gɨvu'nana! Pwaigɨ pwarɨna gɨvu'nana! Yuyaihi sara jɨla!

Kwaakevakɨ mwaalyaraavɨreihi mwaaibɨzɨ kwajɨ Kwaakevakɨyara ‘Nennya avaalyarera,’ dɨpɨjɨ kwajɨ sarɨmɨnyɨna tewaanya kuvu'nadɨka! Sarɨmɨ Kwaakevakɨ mwaalyarajɨ mamwaalyɨgasaihɨlyɨ. Aawa. Dahaa' nɨmɨ Kwaakevakɨ mwaalyaraavɨdaa'nyaihɨrɨ yɨhɨthahɨlakeihɨlyɨ. Sarevɨ Kwaakevakɨ mwaalyara sarɨmɨnyɨna sɨnna tɨka wɨda'manɨkeihɨlyɨ.