Popular Bible Verses from Isaya 53

Share

Pele wakayaswa nkaambo kamilandu yesu, wakaumwa nkaambo kazibi zyesu. Kutugwasya iswe nciceeco ncaakakwabbawidwa, amibunda yakwe niiituponya.

Toonse twapambuka mbuli imbelele ziswekede, twatola umwi aumwi inzila njayanda mwini, lino Jehova walemezya nguwe milandu yesu toonse.

Ncobeni wakalemenwa maciswe esu, wakatola mapenzi esu. Iswe twakayeeya kuti ijanza lya-Leza ndelyamuletela mapenzi ayo ngaaumwa.

Wakasampaulwa akukakigwa kubantu, muntu wamapenzi uubwene maciswe­. Kali mbuli muntu uusesemya meso; wakasampaulwa; teetwakamulemeka pe.

Wakapenzegwa akufwiinsigwa, nekubaboobo taakwe naakabbanuna mulomo wakwe abuniini. Wakeenzegwa mbuli kabelele kaya kukujayigwa, ambuli imbelele iiumuna mumaanza aasikugela, mbubonya alakwe takajulidwe mulomo wakwe.

Pele lukanze lwa-Jehova ndolwakamuuma. Ngonguwe iwakamupenzya. Naazoolituula mbuli cipaizyo cakumanya milandu yabantu, uyoobona lunyungu lwakwe, uyoongola mubuumi bwakwe, nkabela makanze aa-Jehova ayooya kunembo mumaanza aakwe.

Wakakula kumeso aakwe mbuli intengantenga ambuli muyanda uuzwa munyika injumu. Katajisi ciwa cibotu nibuba bwiime bweebesi kuti tumweebele. Katajisi bweebesi bucita kuti tumuyande.

Nkaambo kako njoomupa caabilo antoomwe abapati, uyooabilwa imbono antoomwe abasintaze, nkaambo wakazumina akutala buumi bwakwe, wakabalwa antoomwe abasikusotoka mulao, wakatola zibi zya bantu banji, akukombela basimilandu.

Uyoobona micelo moyo wakwe njiwakapengela, uyookuta. Kuluzibo lwakwe mulanda wangu uululeme uyoolulamika bantu banji. Uyootola milandu yabo.

Wakakasigwa kubetekwa kabotu, aboobo wakatolwa. Nguni akati kabasanyina wakabika moyo wakwe kumakani aya aakuti, naakagwisigwa munyika yabaumi njimilandu yabantu bangu njaakauminwa.

Wakabikwa mukabanda antoomwe abasizibi, wakazikwa amuvubi, nekuba kuti taakwe bubi mbwaakacitide, alimwi taakwe naakaamba calweeno abuniini.