Popular Bible Verses from Ohabolana 3

Share

Matokia an'i Jehovah amin'ny fonao rehetra, Fa aza miankina amin'ny fahalalanao; Maneke Azy amin'ny alehanao rehetra, Fa Izy handamina ny lalanao

Aza manao anao ho hendry; Matahora an'i Jehovah, ka mifadia ny ratsy.

Mankalazà an'i Jehovah amin'ny fanananao Sy amin'izay voaloham-bokatrao rehetra; Ka dia ho feno mitafotafo ny fitoeram-barinao, Ary hihoatra ny ranom-boaloboka eo amin'ny vata fanantazanao.

Aoka tsy handao anao ny famindram-po sy ny fahamarinana; Afehezo eo am-bozonao izany, Ary soraty ao amin'ny fonao tahaka ny amin'ny vato fisaka

Anaka, aza manamavo ny famaizan'i Jehovah, Ary aza tofoka amin'ny fananarany; Fa izay tian'i Jehovah no anariny, Dia tahaka ny ataon'ny ray amin'ny zanaka tiany.

Anaka, aza manadino ny lalàko; Fa aoka ny fonao hitandrina ny didiko; Fa andro maro sy taona ela iainana Ary fiadanana no hanampiny ho anao.

Sambatra izay olona mahita fahendrena Sy izay olona mahazo fahalalana. Fa ny fandrantoana azy dia tsara noho ny fandrantoana volafotsy, Ary ny tombom-barotra aminy dia mihoatra noho ny volamena tsara. Sarobidy noho ny voahangy izy; Ary izay rehetra irinao tsy misy azo ampitahaina aminy.

Aza mamihina ny soa amin'izay tokony homena azy, Raha azon'ny tananao atao ihany

Fahendrena no nanorenan'i Jehovah ny tany, Ary fahalalana no nampitoerany ny lanitra.