Popular Bible Verses from Matyu 7

Share

Ipe' pihali' God nambimb nese'epa amamaga amama. Amama ipe' pegolopami nambimb pitolom. Ipe' peha uta, nambimb God nusi'amepana uta.

Dei' main, emi egafis sohali' Godi, nambimb sofa' amamaga. Emi egafis segolopa amamaga, nambimb seatolom. Ea' emi egafis soha uta, nambimb God nusi'amanasa uta.

Emi egafis seme' basef ae'ami ma sielami, esis si'i epen gawainai nala' ipat ananinai netawa etap anama otambaiguma la'ifiguma.

Maina waf ipe' pa'i esis sanda'mepana ipe'i, ipe' penda'masana na'ama etin. Basef amama ofagema ma mi'uli Godi na'ipa Mosesanai naloma basef God fowa' na'ipa amam profet manda'ami.

Ea' uta ma eaf nafe' nawis wambel sape namisagoma ina alihina, owa'etin. Uta wapa'mona. Wambel anama sape bo'wes andeande' la'ela'ef. Eaf anama ahifina endilisi ma seafe'. Amam nematawa atona etin esis ea' amama atom sati eaf anama sailana.

Ipe' pefe' piowis uta sa'unai. Dei' main, anona eaf nafe' nawis wambel aonai hel alihina endilisi uta wapoti' alihina. Ea' amam nematawa hiesi safe' saila eaf anama.

Ea' ipe' amam nematawa aopei pase'asa amamaga bu'wami atoma awasi ipe'isi. Ea' endilisi Ahalomepa ipe'inai nape heven nikila' ipe' epes. Anan wapoti' nambimb i save nose'asa amamaga bu'wambu'wami amama sahali' anan emi.

Ipe' ina pewaloga enis epes si'i anona jas dembinai nawaloga basef kot lu'unai, owa'. Ama anona nemaf God ina nowalogepa, owa'. Waf ipe' panda'ana pawaloga enis epesanai, anona nemaf waf anama atona God nonda'mepana ipe' wapoti'. Ikwaf anama atona ipe' panda'ana pawalogas God nogwamepana ipe'.

Ea' emi egafis seme' basef ae'ami owa' silam, esis si'i anona aman nahaga nagaoli. Anan nala' ipat ananinai natoma ilifa wesan atona.

Dei' maina ipe' pati usan sa'unai nape naep sahin owan ipe'isi, ea' ipe' owa' pegawa hapataf lu'unai nape naep ipe'imi? Dei' maina ipe' ata' pali' pa'ipa sahin owan ipe'isi pa'i, ‘Owalome, ae' a'i iwafamena usan sa'unai nape naem ine'inai.’ Ea' hapataf lu'unai nape naep ine'imi. Na'ama owa'.

Ipe' pindumafuma andeande'ma amam profet mambaso'mami ma'i mawalipasa basef Godi. Amam mafi'i mambaso'mepa manda' ufunufeni mataga patolom ande' atogon mape bo'om sa'umbilim si'i sipsip. Ea' ukup amamumi nomon aom endilisi ma ipe' ma'i mohambombagepa mohepa si'i nombagw wandafumi. Ea' ipe' ina peme'am, owa'. Ipe' piti waf amamunai netaga nendawalap si'i su'utip pail lawah ea' pegawa waf amamunai bo'ona o aona. Epes ina sola su'utip wainim mandelef amama higatagumi, owa'. Ea' esis ina sola su'utip fik si'i ahip anona mandof higatagunai, amama wapoti' owa'. Ea' waf aonai amamunai nataga nandawalap aona si'i su'utip awami.

Ea' na'ama etin lawah hiami anom bu'wami mola su'utip bu'wami gwa'aimi, ea' lawah awami mail mola su'utip awami numbutimi.

Lawah bu'wami ina mail mola su'utip awami ea' lawah awami ina mail mola su'utip bu'wami, owa'.

Lawah hiami owa' mieil mola su'utip bu'wami, amama esis salam saofam nif.