Popular Bible Verses from Whakatauki 2

Share

Ma Ihowa hoki e homai te whakaaro nui; no tona mangai te matauranga me te ngakau mohio.

E taku tama, ki te tango koe i aku kupu, ki te huna i aku whakahau ki roto ki a koe; A ka tahuri tou taringa ki te whakaaro nui, ka anga ano tou ngakau ki te matauranga; Ae ra, ki te mea ka karangarangatia e koe te matauranga, a ka puaki tou reo ki te ngakau mohio; Ki te rapua hoki ia e koe ano he hiriwa, ki te kimihia ano he taonga huna; Ko reira koe matau ai ki te wehi o Ihowa, kite ai i te mohio ki te Atua.

E rongoatia ana e ia te whakaaro nui ma te hunga tika; he whakangungu rakau ia mo te hunga he tapatahi nei te haere; Kia tiakina ai e ia nga ara o te whakawa, kia tohungia ai te ara o tana hunga tapu.

Ka noho hoki te hunga tika ki te whenua; ka mau te hunga ngakau tapatahi ki reira. Ka hatepea atu ia te hunga kino i runga i te whenua; ka hutia atu i reira te hunga he kopeka ta ratou mahi.

Hei whakaora i a koe i te wahine tauhou, i te wahine tauhou e whakapati nei ki ana kupu; Kua whakarerea nei e ia te hoa o tona tamahinetanga, kua wareware ki te kawenata o tona Atua.