Popular Bible Verses from Genesis 39

Share

Midumahan te NENGAZEN si Jose umbe mid-iseg mebmeupiya is kebpekesavuk din. Diyà sikandin med-ubpà te valey te egalen din he tig-Ehipto he si Potifar.

Ne tenged dutun, insarig ni Potifar ki Jose is langun he azen din su emun iyan si Jose edumala ne kenè en sikandin egkesamuk gawas te kegkaan. Metaid si Jose wey meupiya is kedlelawa zin.

Ne tenged dutun, insarig duen te ebantey te pinirisu ki Jose is kebayàbayà te langun he menge pirisu ziyà te pirisuwan ne iyan impezumala sikandin te langun he menge vaal zutun.

Ne tenged dutun, impezakep din si Jose ne inseled duen te pirisuan te menge pirisu te hadì. Piru minsan pa te ziyà si Jose te pirisuwan, midumahan ded si Jose te NENGAZEN. Tenged te tuvad te NENGAZEN, nehizuwan duen te ebantey zuen te pirisuwan si Jose.

Ne wazà meuǥet, neimahan sikandin te esawa te egalen din. Ne midhinggat din si Jose he ebpehulizè dan. Ne si Jose, wazè din pemineǥa, kekenà, migkeǥiyan din te, “Sikan is egalen ku, wazà igkesamuk din he minsan hengkey tenged te insarig din kediey is langun he menge azen din. Henduen be te nekedrepeng key kayi te valey, su insarig din is langun kediey kayi ǥawas kenikew su esawa ke zin man. Kenà egkehimu he edlimbungan ku is egalen ku wey ebaal a te salà diyà te Megbevayà.”

Sevaha zutun he andew, midseled si Jose ziyà te valey su zuen din ebeelan, ne wazà dutun is menge zuma zin he menge suluǥuen. Migewezan duen te esawa zuen te egalen ni Jose bisti zin ne migkeǥiyan din te, “Hulid ka kedì.” Piru mibpelaǥuy si Jose pehendiyà te ǥawas, piru netaǥak din is samput din dutun te vahi.