Popular Bible Verses from Taga-Colosas 2

Share

Yantangay ta inawatyon ni Cristo Jesus a kas Apo, agbiagkayo koma a mainaig kenkuana. Mairamut ken maipasdek koma ti biagyo kenkuana, ken pumigsa ti pammatiyo kenkuana kas naisuro kadakayo. Ken kanayonkayo nga agyaman.

Ngarud, agannadkayo tapno dinakay adipenen ti kinasirib nga aggapu kadagiti sursuro nga impatawid dagiti tattao ken dagiti espiritu nga agturay iti lubong. Awan serserbi ken mangallilaw dagitoy a pampanunot ket saanda nga aggapu ken Cristo.

Adda idi panawen a naibilangkayo a natay iti espiritu gapu ta managbasolkayo ken gapu ta saankayo a Judio, kayatna a sawen, awan ti linteg ni Moises kadakayo. Ngem ita, pinagungarnakayo ti Dios kas iti pinangpagungarna ken ni Cristo. Pinakawan ti Dios ti amin a basoltayo. Pinunasna ti listaan dagiti basbasoltayo agraman dagiti kakuykuyogna a paglintegan, ket dinadaelna ti kaipapanan daytoy babaen ti panangilansana iti krus.

Ngamin, agtaeng ken Cristo a kas tao ti amin a galad ti Dios, ket iti pannakikaysayo kenkuana, inawatyo met ti pudno a biag. Ta nangatngato ni Cristo ngem ti amin turay ken pannakabalin.

Isut' gapuna a manipud ita, diyo itulok nga adda mangikeddeng iti kanen ken inumenyo, wenno ti aldaw a rambakanyo, wenno ti Fiesta ti Baro a Bulan, wenno ti maipapan iti Aldaw a Panaginana. Amin dagitoy, anniniwan laeng dagiti umayto; ngem ti pudpudno ket isu ni Cristo.