Popular Bible Verses from Songs 18

Share

Da One In Charge, he make shua notting bad happen to me, Jalike he one solid rock mountain an one strong wall. He jalike one big solid rock, Fo me go by him fo hide me. He real strong, Jalike he one shield dat no let nobody touch me. He jalike one big wall.

I like talk bout da One dass da God fo me: Da way he do tings, come out how suppose to be. Eryting dat Da One In Charge promise fo do, Garans he goin do um. Fo all da peopo dat let Da One In Charge take kea dem, He jalike one shield dat no let dem get hurt.

Da One In Charge, he good, An az good fo erybody tell dat he good! An wen I yell fo him help me, He da One get me outa trouble From da peopo dat stay agains me!

Wen me get plenny trouble, I yell fo my God, Da One In Charge, help me. Up dea inside God temple inside da sky, He hear me yell to him.

Eh! You Da One In Charge! Jalike you da One dat open da light fo me, Fo see how fo me live fo real kine. You da God fo me! You make me come alive inside, Jalike you open da light, No matta was dark inside me befo time.

Dass da God dat make me strong fo fight. Ery place I go, God make eryting come okay fo me.

Da One In Charge, he alive fo real kine! An I like erybody tell how plenny good tings he do. He jalike one big solid rock fo me hide dea! He da God dat get me outa trouble An I like erybody tell, “God, he awesome!”