Popular Bible Verses from Mark 7

Share

Get all kine bad kine stuff come out from inside peopo. Dass how erybody tink how dey can do bad kine stuff: dey not married to da one dey fool aroun wit; dey rip off da odda peopo; dey murda peopo; dey married an still yet go fool aroun; dey like grab eryting fo ony dem; dey feel good wen dey do bad kine stuff; dey like bulai da odda guy; dey no mo shame fo any kine; bodda dem wen da odda guy get someting good; dey talk bad bout odda peopo; dey get big head; dey ack stupid cuz dey no like tink. All dat bad kine stuff, dass wat come from inside. Az why peopo stay pilau inside an dey no can pray.”

Wat you guys put inside yoa mout no mean you pilau inside an no can pray cuz a dat. But wat come outa yoa mout, dass wat make you pilau inside an no can pray.

Jesus tell um, “Da guy Isaiah wen talk fo God long time befo time, an fo shua he talk bout you guys! Cuz you guys tell one ting an do anodda. Isaiah wen write dis: “ ‘God tell: Dese peopo, dey tell dey get respeck fo me, But inside dey stay far from me.

Dey go down an pray to me, But dey ony wase time. Wat dey teach, Dass ony wat some peopo tell we gotta do.’ ”

Jesus tell, “You guys no like do wat God stay tell you fo do. You guys ony do wat odda peopo from befo time pass down fo you do.”