Popular Bible Verses from Romanos 10

Share

Coo hajxy mejtstuꞌu ngudiúuṉämät, mänit hajxy nnähwáatsämät. Jeꞌec̈h jaduhṉ nnänøøm̱by mejtstuꞌu, coo hajxy nnägápxämät cuꞌughagujc coo Jesucristo hajxy nWiindsøṉhájtäm, møød coo hajxy nmäbǿjcämät hamuumduꞌjoot coo Dios jaꞌa Jesucristo yagjujypiøjtägajch mänaabä hänajty tøø yhoꞌoguiän. Coo Dios jaꞌa Jesucristo jaduhṉ yagjujypiøjtägajch, jaduhṉ hajxy nnajuǿøyyäm coo Dios jaꞌa Jesucristo quiumay, møød pønjaty jaꞌa Diosmädiaꞌagy mäbøjp jaꞌa Jesucristocøxpä.

Coo hajxy jaduhṉ nnäꞌägä mäbǿjcämät hamuumduꞌjoot, jaduhṉä Dios hajxy xquiumáayyämät. Y coo Jesucristo hajxy nmädiáacämät cuꞌughagujc coo hajxy nWiindsøṉhájtäm, mänit hajxy nnähwáatsämät.

Mayhagajptä Diosmädiaꞌagy tøø wiaꞌxy jaꞌa Jesucristocøxpä. Tøø jäyaꞌayhajxy may miädoonä. Näjeꞌe hajxy hoy tøø wyiinjuøꞌøy. Jeꞌeds hajxy jaduhṉ tøø miäbøcy. Coo hajxy quiaꞌa mädów̱ät, cab hajxy jaduhṉ miäbǿgät.

Jaduhṉä Diosmädiaꞌagy miänaꞌañ: “Pøṉ jaduhṉ jaanc̈h mäbøjp jaꞌa Jesucristocøxpä, jeꞌeds jaduhṉ pädaꞌagáaṉäp hodiuum jaꞌa Diósäm.” Hix̱, tuꞌcuhdujt højtsä Jesucristo xyhíjxäm, møødä judíoshajxy, møødä caꞌa judíoshajxypä. Tuꞌcuhdujt højtsä Jesucristo jaduhṉ xyhuunghájtäm. Coo højtsä Jesucristo nbaꞌyáax̱ämät coo nbojpä ngädieey hajxy xyajnähwáatsämät, tsipcøxp højts jaduhṉ xñäxúuꞌtsämät, tsipcøxpä mayhajt jaduhṉ tiúnät maa højtscøxphájtäm. Jaduhṉä Diosmädiaꞌagy miänáaṉgumbä: “Pøṉä Jesucristo paꞌyaax̱p, hodiuum jeꞌeduhṉ piädaꞌagaꞌañii jaꞌa Diósäm.”

Jaꞌa Diósädsä cugapxy quejx coo jaꞌa miädiaꞌagy yajwáꞌxäxät maa jäyaꞌayhajxiän, jaꞌa cahnä hajxy hänajty miädoybä. Jaduhṉ jim̱ myiṉ̃ cujaay maa Diosmädiaꞌaguiän: “Pønjatiä Diosmädiaꞌagy tøø miädoy coogä Dios yajnähwaꞌac̈h pønjatiä Dios paꞌyaax̱p, paady hajxy xiooṉdaꞌagy coo hajxy jaduhṉ tøø miädoonä. Jaanc̈h tehm̱ yhoy jaduhṉ coo Diosmädiaꞌagy jaduhṉ wiaꞌxy.”

Pønjaty caꞌa mädoobnä jaꞌa Jesucristocøxpä, cabä Jesucristo hajxy jaduhṉ hoy miänuuꞌxtaꞌagaꞌañ. Tøyhajt jaduhṉ. Pø cahnä hajxy jaduhṉ miädoyhaty coogä Jesucristo hajxy tøø xñähhoꞌtúutäm, cab hajxy hoy miäbøgaꞌañ. Pø cahnä hajxy yajwiingapxøꞌøyii jaꞌa Jesucristocøxpä, cab hajxy hoy miädow̱aꞌañ.

Pønjaty mäbøjp coo hajxy tøø ñähhoꞌtuꞌudyii jaꞌa Jesucrístäm, jeꞌedsä Dios ñäxuuꞌchp. Coo Jesucristo hajxy cu xquiaꞌa nähhoꞌtúutäm, ngumädow̱áaṉäm hajxy hijty, jeꞌeguiøxpä coo jecymiädiaꞌagy hajxy tøø ngaꞌa cudiúuṉäm, jaꞌa Moisés jecy quiujáhyyäbä. Jaꞌa Jesucristo mäbøcypiä, caꞌxiä jecymiädiaꞌagy quiudiuuṉ̃, jaꞌa Moisés jecy quiujáhyyäbä, nebiä Dios hänajty tøø yhaneꞌemiän. Jaanc̈h tehm̱ yhoyyä Jesucristo jaduhṉ yhänaꞌc‑hajty. Cabä pojpä cädieey hänajty ñäꞌägädä møødä ni weeṉ̃tiä. Paady hijty jaduhṉ quiaꞌa hahixøꞌøy coo jaduhṉ cu yhoꞌcy. Pero coo jaꞌa Jesucristo hajxy hoy xñähhoꞌtúutäm, paady yøꞌø jecymiädiaꞌagy hajxy jaduhṉ xquiaꞌa hanéhm̱änä, jaꞌa Moisés jecy quiujáhyyäbä.