Popular Bible Verses from 2 Tesalonicenses 2

Share

Mach cheyakꞌ subchaho heba, yuto yet yalan̈ato maẍto chihul Comam, ay huneꞌ tiempohal bay tzetcꞌa mac chipaqꞌuico yin̈ Comam Dios, cat isyenican̈ isba huneꞌ naj yahawil istxꞌojal. Haꞌ huneꞌ naj tuꞌ yilal yalaxto naj yin̈ isyaꞌtajil xol kꞌa kꞌaꞌ.

Hex wuẍtaj hex wanab, caw xahan ayex yu Comam Jesucristo. Yilal jakꞌnihan̈ yuchꞌandiosal teyin̈, yuto yet yalan̈tocanoj quexissicꞌnilo Comam yun̈e hecolchacano yu Comam Espíritu Santo, Comam quexpohnicanilo yeto Comam Dios, yeb yu heyanayto yul heyanma yin̈ isyelal.

Haꞌ ton huneꞌ naj tuꞌ chiyican̈ isba cat yoc naj howal yin̈ huntekꞌan chihallax diosal, maca huntekꞌan bay chiyiyo isba anma. Chanicꞌto isba naj yul yatut Comam Dios cat yalni naj tato haꞌ naj caw dioscanoj.

Caw xahan ayon̈ yu Comam Jesucristo, yeb yu Comam Dios Mame, haꞌ chiakꞌni yakꞌlobal janma yin̈ sunilbal tiempo. Chakꞌnipaxo huneꞌ iscꞌulchꞌanil jet bay chicawxi cocꞌul. Haꞌojab Comam Dios chiakꞌni yip heyanma cat quexislin̈bani, haxinwal cꞌul tzet chewatxꞌe yul sat Comam yeb tzet cheyala.

Yu mach chischah anma isyelal Comam Dios, yuxin ton̈e chil Comam chiakꞌlax somchahoto isnabal cat yanito isba xol huntekꞌan lekꞌtiꞌal tuꞌ.

Naj Yahawil Istxꞌojal tuꞌ, haꞌ yip naj matzwalil ayco yin̈ naj. Can̈ chute isba naj, caw ay tzet chi-la-iswatxꞌe naj, chicꞌay iscꞌul anma yilni. Chisyenipaxo naj huntekꞌan cꞌaybalcꞌule yun̈e issubcha anma yu naj. Sunil yip ej istxꞌojal chimunla yu naj yahawil istxꞌojal tuꞌ, yun̈e yakꞌni subchaho naj anma cat cam yetanto isba, cat istocano yin̈ isyaꞌtajil. Yuto huntekꞌan anma tuꞌ matxaticꞌa choche iscꞌul ischab isyelal tzet chal Comam Dios, yuxin mach chischah iscolbanil tet Comam.

Wal xin, chimunla naj yahawil istxꞌojal yin̈ ewantajil xol anma tinan̈, cachanxan̈e xin chechma naj yilaxilo huneꞌ mac mach chichahniti naj, cat yul lemna naj.