Popular Bible Verses from Marcos 13

Share

Ja cꞌa rixix xa itzel nixtzꞌat na cumal canojel ja winak pro mwal anin ja tok xtiban queriꞌ chewe. Pro canojel ja xtiquecochꞌ quewach chipan ja rpokonal in ni matiqueyaꞌ can wiꞌ ja yukulbal quecꞌuꞌx wqꞌuin ejeꞌeꞌ riꞌ nquewil na ja totajem xin Dios.

Kas tebanaꞌ cuenta, quixcꞌascꞌoti in chijutij temajaꞌ rbanic ja roración como ma ewotak ta nak kꞌij tok xquinmelojpi chic jutij chwachꞌulew.

Ja cꞌa tok xquixcꞌamarel chiquewach chi nixjach pa quekꞌaꞌ maxta quixoclaꞌ il tre ja nebij ja netobej ewiꞌ chiquewach. Pro como chipan ariꞌ hora cꞌoli xtiyataj chewe ja xtebij chique, ja ta cꞌariꞌ xtebij chique. Queriꞌ nbij chewe como ma ixix ta ja nixtzijoni triꞌ pro ja rEspíritu Santo arjaꞌ nyoꞌ chewe nak ja xtebij chique.

Ja caj in rwachꞌulew jariꞌ xa nchu̱p na rwach pro ja ntzobal anin jariꞌ ni matichup wiꞌ rwach, mta ariꞌ ja maquita nbantaj cumplir.

Pro majun winak otakyon ja mero kꞌij in ja mero hora ja xtibantaji in nixtacꞌa ángel ta chakajaꞌ ja recꞌo chilaꞌ chicaj in nixtacꞌa ja Ralcꞌwalaxel ta chakajaꞌ pro ja nataꞌ Dios xa ruyon arjaꞌ ja rotakyon.

Cꞌo nimak tak chꞌaꞌoj xtiban na nojel nat nakaj pro ja tok xtekaj rbixic ewqꞌuin maxta texbej ewiꞌ rmal como ni rjawaxic wiꞌ chi nbantaj cumplir nojel awaꞌ wariꞌ pro jariꞌ ma qꞌuisbal rwachꞌulew ta.

In queriꞌ cꞌa chewe ixix chakajaꞌ, quixcꞌascꞌoti como anin in junan ruqꞌuin ja rajaw jay in ma ewotak ta nak hora tok xquinmelojpi chic jutij, maxla pa rocbal akꞌaꞌ, maxla pa ncꞌajakꞌaꞌ, maxla pa rsakaric owi tok nsakari. Ja tok chaka jalal xquinpi chic jutij maxta ixwarnak triꞌ. In ma ruyon ta chewe ixix nbij wiꞌ chi nixcꞌascꞌoti pro queriꞌ nbij chique canojelal chi necꞌascꞌoti, neꞌe ja Jesús chique.

Queriꞌ nbij chewe como cꞌo jeꞌe tinamit xtiyictaj na trij juleꞌ chic tinamit in chakajaꞌ ja gobierno jeꞌe nyictaj trij juleꞌ chic gobierno. In chakajaꞌ cꞌo nimak tak cubarkan nbantaj na in nimak tak waꞌal in caniꞌ chique winak neyojtaj na in neyictaji rmal ja quiyewal. Nojel awaꞌ wariꞌ xa majbal rxin ja nimak tak rpokonal.

Ja tok majaꞌn tipeti ja qꞌuisbal rwachꞌulew rjawaxic nabey chi ja utzlaj tzij ja ncꞌamonto nekaj na rbixic cuqꞌuin ja winak ja recꞌo nojel tak nación. Cꞌa tokocꞌariꞌ xtipeti ja qꞌuisbal rwachꞌulew.

Queriꞌ nbij chewe como e qꞌuiy ja winak nepi na jeꞌe in xa queyon nquecoj quiꞌ chi e Cristo, quewaꞌ nquibij chique ja winak riꞌ: —Anin in Cristo, necheꞌ na chique, in e qꞌuiy ja winak xquequeban engañar.

Pro tebanaꞌ jutzꞌit cuenta ewiꞌ chiquewach ja winak como ejeꞌeꞌ nixquecꞌamel na pa tak kꞌetbaltzij in nixquirapaj chakajaꞌ pa tak jay xin molbal riꞌil. Nixquecꞌamel chiquewach gobernador, nixquecꞌamel chiquewach rey pro mwal anin tok xtiban queriꞌ chewe. Queriꞌ xtiban chewe utzcꞌa chi nel ntzijoxic chiquewach.

Queriꞌ nbij chewe como ecꞌoli winak ja nepi na, juleꞌ xtiquecoj quiꞌ chi e Cristo in juleꞌ xtiquecoj quiꞌ chi e profeta xin Dios pro ma katzij ta ja nquibij. Ejeꞌeꞌ cꞌo nimak tak milagro xtiqueban, jutzꞌit laj nequeban engañar ja winak ja rechaꞌon rmal ja Dios pro jariꞌ mta moda xquequechꞌec ta.

Ja tok chaka maril xtocꞌowi jawaꞌ nimlaj rpokonal riꞌ cꞌacꞌariꞌ maticaꞌy chic ja kꞌij, nkꞌekumiri in maticaꞌy chic ja icꞌ chakajaꞌ. Ja cꞌa chꞌumil jariꞌ netzakto in ja nimak tak poder rxin ja caj nsi̱l na.