Popular Bible Verses from Pidipos 2

Share

Utsibon mibi chieshënquin nacpaden nainda. Ubiuidtsëqui bëdamboshë iquebique. Cunauidtsëqui nanu, quec mibiuidtsëqui tantiadec tabadenda. Adec tabadenquio yec: Ubi bëdapabi icnuc utsibo bëdamboshëcquido neque. Nashunnu, quec bëdambuec tabadta. Mimbi tantiacpadombuenuidi nainquio icquin utsin tantiacpadombuentsen nata. Mitsanauidi tantienquio icquin utsibo nashuntetsen tantiata.

Esuquidistubëd daëdash abentsëc yacbimbuec tabadquid icquin aidën nanëdacpadombuen naic mibitedi bëdambo ictsiac.

Nadquid Esus icpanëdash: Nuquin Papa padquidquiobidi Esuquidistu nepanëdash. Adquid yec: Mibëtambi namec bëdambo iquebi, quenquio icquin Nuquin Papan chiacpadombuen napanëdash. Adquid icbuedi atonatedi nianec nidaidën chopanëdash. Adec iuabimbuecquid yanec matsesash nuquipadquidquio yampanëdash. Matses iuabimbuecquid yampanëdash. Adash aton Papan chiacpadombuen nabanequi uënëspanëdash. Cueste napotiaidën dectanquin uënës uapanëdash.

Nuquin Papan: Ma bëdambuec tabadnu, quequin ambi tantiacpaden bëdambuec tabadte bunmequin mibitedi bëdambuen namendac.

Adec ambi chiampicpadec uënësacsho issun aton Papan bëdambuen ispanëdash. Adoshombic abitedishun Icbombo icmequin bëdamboshëcquid icmepanëdash. Aden Nuquin Papan bëdamboshëcquid Esus icmiac, quequin tantiec aid ismec ma nëidtedi dannëshën tinquebudcuedednu, abuc tabadquido yec, nidaidën tabadquido yec, nidaid ëquëduc tabadquido yec quequido. Ma abitedishunquio: Esuquidistu Nuquin Icbombo nec, quequin tantiaquin: Nuquin Papatsen bëdamboshë iquec, ma canu, quequin adopanëdash.

Adoac bëdambuec tabadec chushcananenda. Adecbidi: Bëdambuen nanuna, cac chieshec icsambuec onquenda. Esus tantiaquido icsambo iquec, utsibo quenushe. Adenda. Nuquin Papan: Cun mado nec, cun champi nec, caido yec bëdambuec tabadta. Matses dadpenquio abi icsate bunacpadequi icsamboshëcquido icnubi adequi bëdambuec tabadta. Adec tabadquin icsambo icquido mimbi Esus tantiametsiac paposhquiacbimbuecnuc. Aden nabanec mibitedi bëdambuec tabadendac.

Cun utsibo, umbi tantiaido mibitedi neque. Tantia. Chuinu. Ubëd tabadquin umbi chiacpadombuen mimbi nadedniondacpadombuen ubi uanno nidan adembidi bëdambuen nata. Nuquin Papa dacuëdampambo icquidën chiaid niacmane, quiash aidën chiacpadombuen naic aidbëd tabadnush bëdambuec tabadta.