Popular Bible Verses from Iruka 11

Share

Pyno yt nakuaria i eiperia pykai wakuaria yn ewetum eimepytꞌin me. Miꞌi hawyi eiꞌywot atipy piat wakuat sese toineꞌen. Miꞌi ti wakuat sese yn tutum tomepytꞌin me. Pywo Tupana Paꞌãu ehẽtup ikaipyi pote meremo tutum ehepe eimiẽtup hap ewy e temiitꞌin me.

Miꞌi Iesui toꞌe i -Waku ehẽtup hẽtup Tupana kape eimikyꞌesat ewy hawyi putꞌok e ehepe emikyꞌesat ewy. Iꞌewyte eweikat ikaipyi eimikyꞌesat ewy hawyi eweipuẽti raꞌyn. Pywo eweikupteꞌen aikotã okenꞌypy ete teg teg eweiꞌe hamo hap ewy waku putꞌok eweiꞌe Tupana ete eimikyꞌesat ewy puẽti hamo e.

Katupono hẽtup haria iꞌatumiẽtup putꞌok e iꞌatuepe. Mekewaria iꞌatumikyꞌesat kat haria taꞌatupuẽti raꞌyn. Iꞌewyte okenꞌypy ete gupteꞌen haria teg teg e haria kape iꞌokenhypꞌok taꞌyn.

Mio tã tohẽtup hawyi Iesui henoi raꞌyn -Ehẽtup Tupana kape turan mio tã waku eweiꞌe. --Uruꞌywot Atipy piat waku kahato En waku eweiꞌe e. Uruimotypot kahato En waku eweiꞌe e. Uruikyꞌesat En ereineꞌen no mesuwat yi tote Wuatꞌi miitꞌin potypot nuat Waku miitꞌin mesuwat rotiat emikyꞌesat ewywuat nug haria wo tukupteꞌen aikotã atipy piaria emikyꞌesat oktan nug haria ewy waku eweiꞌe e.

Uruiꞌaparap kahato ewowi Tupana miꞌi pote uruhẽtup kahato ewowi waure wo ereineꞌen uruminug saꞌag koꞌi ete hap waku eweiꞌe e. Tukupteꞌen kahato urumaꞌat haria uruetiat iꞌaparap haria. Miꞌi hap saꞌag koꞌi ete waure wo teran urutukupteꞌen haype aikotã En ereineꞌen waure wo eetiat uruꞌaparap hap koꞌi kai hap ewy waku eweiꞌe. Mesuwat eꞌat pe iꞌatu kahato uruiãꞌãg ahiag ehay wo yt naku i nug hamo miꞌi pote uruporeroto uruiãꞌãg hap sakpuo urukosap hamo waku eweiꞌe e.

Tupana mesuwat eꞌat uruihẽtup epe urueꞌuꞌi mesuwarotiat urumiꞌu hap uruhẽtup epe waku watoꞌe e.

Eheha ihatꞌok pote eweiꞌakasa kuap yne raꞌyn e. Miꞌi pote eheha koꞌi ariãty ewywuat eipiit piat moẽtyhot hamo e. Maꞌato eheha yt naku i pote eipiit puo iꞌypyryp we sese topyhuꞌat e.

Miꞌi hawyi poꞌog Iesui henoi -Yt uwe i migꞌi wo hytmoĩ ariãty hot hap e. Yt taꞌatupag hin i kamuti kaꞌa pe maꞌato ipytyp sese pe yn taꞌatupag ariãty hot hamo e. Miꞌi hawyi wehytꞌok haria teꞌeraꞌakasa raꞌyn hawyi tehaꞌat kuap heremo hawyi e.