Popular Bible Verses from 1 Corinthians 13

Share

Be nékꞌetsꞌinsiꞌ-i, ꞌi gha hoonli talhódini. ꞋI gha nedzi unzoo hukwꞌunꞌa ꞌutsꞌintꞌoh. ꞋI gha ꞌaw howu lheꞌtsꞌoolhni ꞌinkꞌez ꞌaw dune ꞌuzdudilꞌi whe yalhtsꞌulhduk cha, ꞌinkꞌez ꞌaw lheꞌuzduniltiꞌ. Ndi be nékꞌetsꞌinsiꞌ-i, ꞌi gha ꞌaw ꞌuyoonne hoontsiꞌ kꞌunꞌa bubulh útsꞌootꞌeꞌ ꞌaitꞌoh. ꞋAw whenichꞌoh hukwa ꞌuzninzun te néꞌtsꞌootꞌen ꞌaítꞌoh. ꞋI gha ꞌaw ꞌa cho tsꞌonólchꞌe ꞌaítꞌoh ꞌinkꞌez ꞌaw hoontsiꞌ-un huwun nuní uznoozut ꞌaítꞌoh.

Be nékꞌetsꞌinsiꞌ-i, ꞌaw whe ꞌetsul ꞌutsꞌooneh ꞌaítꞌoh. Tsꞌiyantsuk neba ꞌalha ꞌuhoontꞌoh. Ntsꞌoh dáhoontꞌoh whe hukwa tsꞌe tsꞌúhooli, ꞌinkꞌez ꞌet tsꞌiyantsuk whúlh tsꞌúzyin.

ꞋAw tsꞌihꞌun unꞌa lheꞌítꞌoh de, ꞌaw tsꞌuhótꞌeꞌ ꞌaítꞌoh. ꞋEt hoontsꞌi ndai la khuni ꞌalhaꞌ ꞌuntꞌoh-i, ꞌi be tsꞌuhóontꞌiꞌ.

ꞋEt ndi tawh whúdidoh-un, be ꞌalha ꞌuhoontꞌoh-i, be hukwa tse hóodli-i, ꞌinkꞌez be nékꞌetsꞌinsiꞌ-i ꞌet ta whultꞌoh ꞌawhuz ꞌet njan whuzdla. ꞋInkꞌez ꞌukꞌenus díztiꞌ-i, ꞌi bé lhkꞌetsꞌusiꞌ-i, ꞌi ꞌuntꞌoh.

Be nékꞌetsꞌinsiꞌ-i ꞌaw oolatoh hooloh. ꞋEt hoontsꞌi ndi be nus tꞌeoonudzun-i ꞌet ꞌetsul ꞌuwhutánelh. ꞋEt lhelhtsꞌun unꞌa yaduk-un, ꞌet cha gak whutaleh. ꞋInkꞌez ndi be tꞌeóonudzun-i, ꞌi cha ꞌetsul ꞌutinelh.

ꞋEt dune bughuni hiye yalhduk-i ꞌinkꞌez lizasne hiye yalhduk-i cha, tsꞌiyawh be yasduk, ꞌet hoontsꞌi be nékꞌetsꞌinsiꞌ lhústꞌih de, ꞌet de luglos cho ꞌinkꞌez luglosyaz ꞌalhgoh lhendunutsꞌo leꞌ dutisnelh.

ꞋEt dune ba nus hoosꞌen de, ꞌinkꞌez buba whéꞌ hoontꞌoh hooyoh-un tsꞌiyawh tꞌeóonúszun de, ꞌinkꞌez khuni be tꞌeóonudzun-i ꞌet cha tꞌeooniszin de, ꞌinkꞌez tsꞌiyawh be ꞌalha ꞌuhoontꞌoh-i ꞌustꞌi de whe dzulh hoontsꞌi ꞌudun netísꞌalh de, whuz unꞌa ꞌet hoontsꞌi be nékꞌetsꞌinsiꞌ-i lhústꞌih de, ꞌet de ꞌaw hoonli lhúsloh.

Ndai la ookꞌedune tsinli tsꞌiyawh howa núsdla de, ꞌinkꞌez syustꞌe cha dutákꞌun huba butlꞌa yísti, ꞌinkꞌez be nékꞌetsꞌinsiꞌ-i ooyit ꞌustꞌoh de, ꞌet de ꞌaw sba kꞌelha holeꞌ ꞌaítꞌoh.

ꞋEt tsꞌoodun usdli daꞌ, ꞌet tsꞌoodun kꞌunꞌa yasduk, tsꞌoodun kꞌunꞌa nuní nuszut, ꞌinkꞌez tsꞌoodun kꞌunꞌa lhtahawhúsdle. ꞋEt dune susdliꞌ whe tsꞌoodunne kꞌúneꞌ zustꞌen-un, tsꞌiyawh ꞌudun neóonusdla.