Popular Bible Verses from Rum. 12

Share

Núnisrum jú̱ nuṉkanmaya̱ ana nu páchitsuk Yus winia enentáimmiarun yapajtiúrat tusarum tsaṉkatkatarum. Nu túrakrumka Yus wakera nu nekaattarme. Ni wakeramusha yajauchichuiti antsu imiá nekas péṉkeraiti.

Tuma asamtai yatsuru, atumek Yusai̱ surumaktarum. Yus ti waitnentrama asamtai nuna ti seajrume. Taṉku maar Yusan súsatniua áintsaṉ atumsha aya̱shtiuk iwiaaku árumna nui̱ṉᵏ Ni túrataj taku túrutati tusarum tuke enentáiji̱a̱i̱ Yusai̱ tsaṉkamaktarum. Yusai̱ iisam ti shiir atí tusarum túratarum. Nu túrakrumka enentáimji̱a̱i̱ Yus shiir awajmain átatrume.

Ukunam Yus tsaṉkatramkattajnia nu enentáimtusrum warastarum. Wáitiakrumsha katsuntratarum. Tuke iniaitsuk ashí túrunamuja̱i̱ Yus áujsatarum.

Yajauch nupettamka̱i̱ṉ. Antsu péṉker túrakum yajauchia nu nupetkata.

Nuamtak yachi asarum núnisrum mái̱ anenai ajatarum. Chíkich wiji̱a̱i̱ naṉkaamas úuntaiti tu enentáimtunaistarum.

Nekas enentáiji̱a̱i̱ mái̱ anenai ajatarum. Yajauch nakitrarum péṉkera nu túratarum.

Ame jeamna nuja̱i̱ ashí shuarja̱i̱ nawamnaikiam wekasata.

Yuska ni Papiri̱i̱n ju̱na áamtikramiayi “Witjiai tunaan asutiátniun. Wi yapajkiattajai” tawai Uunt Yus. Tuma asamtai aneamu yatsuru, kajertamakuisha átumka yapajkiairap. Antsu yajauch awajtamka núnaka Yus iistí. Yusa kajetáiri̱ initiusta.

Nakittsuk kakaram ajasrum ashí enentáimji̱a̱i̱ ii Uuntri̱ wakera nu túratarum.

Yus winia waitnentrak akatar akuptúku asamtai ju̱na tájarme. Atumek wíkitiajtai tu enentáimtumatsuk jeamna nuja̱i̱ métek enentáimtumasta. Yus enentáimta asakmin takastinian suramsana nuja̱i̱ apatkam nekaamata.

Shuar ámin yajauch awajtámkuisha nincha yapajkiataj tu enentáimsaip. Aents iisam péṉker áminia nu amesha tuke túrata.

Chikichik enentáiji̱a̱i̱ métekrak shiir enentáimtunaitiarum. Naṉkamantu enentáimtumasairap. Antsu péejchach ajastarum. “Ti nékajai” tu enentáimtumasairap.

Tura nu arantcha tawai “Ame nemasrum tsukamakuisha ayurata. Kitiamakuisha umartin susata. Nu túrakum péṉker ajachua nu iniatsá̱rtatme.”

Yajauch awajtámainia nu shiir awajsatarum. Yus yajauch yumiṉtsuk nu shuaran péṉker túrawarat tusarum seattiarum. Warainia nuja̱i̱ warastarum. Kúntuts pujuinia núja̱i̱sha úttiarum.

Yus shuar atsumainia nu yaiṉtarum. Irarsha péṉker itiaatarum.

Ii aya̱shi̱ chikichkitiat ii muchitmari̱ untsurínti. Tura métekrak muchitiáiniatsui. Núnisrik iisha, Yus shuarti, aya̱shí̱ muchitmari̱ya̱ áintsarik untsurítiatar chikichik aya̱shtinia áintsar takaaji. Nusha Krístuja̱i̱ tsaniṉkiu asar áitkiamuitji. Túramu asar nuamtak atsumnaiyaji.