Popular Bible Verses from Israelítalachi 11

Share

Diosica quereiminlayoe tito, ¿tica tsantino jun? Yari itsanque joe: Diosica quereiminlari, ticatiya cachun mératori, canola joyoeque miralarayoe. Quirano podeitutonan miralarayoe. Matu tote Diosichi tsachilari yaca quereilainan, Diosi yalaca se tinaminue.

Diosica quereitunari, numanan sen joe tituchunae. Diosibe cayaichi timinlari casaleri Diosi joeque quereinola joe. Junsi Diosica miichi timinlabe Diosi sen jochunaequenan quereinola joe.

Diosiri fiqui pacachiri toca quinue. Jera quiranun cosa quinato, quiratununcanan quinue. Diosica quereito, junca tsan joeque miralarayoe.

Diosi Abrahanchi to cuwanae tinue yape ya toca tsacumin josa. Junni yaca jun toca jisa mantanue. Junni Abraham jun toca miitotonan, Diosica quereimin joto, jiniinue. Diosi cuwano joyoe tinun tobi féto, Abraham tsacumin ino jotonan, moora chubi jamin cuwentari chuminue. Quidoca quica yabiri epele chuminue. Yachi nao Isaac, Isaachi nao Jacobo, yalanan Abrahanbe jun tobi tsanque chuminlanue.

Noé Diosica quereimin joto barco quinue. Diosi mapiya caeretuminnan yabe panue mapiya erechinayoeque. Junni Noeri Diosica quereito barco quinue yachi sonaca, naolaca, nasolaca se larichun. Junni Diosica tennatuminlari junca quirato miintsan jominlanue seitonla joyoeque. Junni Noeri Diosica quereito, sen tsachi inue.

Enoc Diosica quereimin jonan, Diosi yaca soncanan jamochi tanjinue yape puyatusa. Tsachila yaca neyanaminnan manfetulajonue Diosi yaca jamochi tanloca jonan. Diosi yaca jamochi catanlotusanan, tsachila yaca tenhica jominlanue Diosibe sen joeque.

Abélinan, Caínnan matu tote acola jominlanue. Junni yala palunan Diosichi ticatiya epe cuwalaquinue. Junni Abéliri Diosica quereimin josa, ya epe cuwanacaca fe sen joe tinue yape jeralela miralarasa Abélica sen joeque. Junni Abel puyaca josanan, ya Diosica quereimin jonun tenchi yabe camiiminlayoe.

Abrahanchi sona Sárari duque sinuca jominnan, Diosica quereito, na wino podeinue. Diosinan yabe paca jominue na wichunaeque. Junni na winue Diosi tsa pamin jonan.

Junni Abraham jun tobi tsanque chutonan, manca tobi chunoca méraminue. Jun manca tobi duque sen pueblobi chunoca méraminue. Ya pueblori Diosi quica jun pueblo joto, numatotiya joto poleno joe.

Junni Egipto to miyachi nama Moiseca uwa suwaca josanan, Moiseri Diosica quereimin joto, Ya sonachi nao itoyoe tinue. Moisés wenteno jominue. O Diosichi tsachilabe pejoyoe tino jominue, o Egipto to mantamin joyoe tino jominue. Egipto to tsachi joyoe timanpari, jutsa quito nenamin jototiya, moora fecáriri jutsabe pansi chumin jono jomin jonhoe. Junni yari Diosichi tsachilabe pejoyoe tito, yalabe pepadeseinue. Egipto to tsachiyoe timanpari, duque mica sen jominca tsacumin ino jomin jonhoe. Junni juncari munaratuto, Diosichi tsachi ito, duque padeseino jominue. Junni Moiseri Crístochi tenchi padeseino fe sen joeque tenca cato, Egipto to cosalaca jera telaqueponue. Egipto to cosalaca munaratuto, Diosi cuwano jonunca fe munarayoe tinue. Diosica quereimin joto, Egipto to miyari pa josanan yari jeleratuto, junbi nechi manloniinue. Quiraitunun Diosica quiramin cuwenta, Moiseri peleituto wantainiinue.

Diosi Abrahanca miichun yachi naoca toteto Diosichi cuwasa mantanue. Junni Diosinan paca jominue Abrahanchi alicalachi tenchi se quino joyoeque. Junni Abrahanchi alicala tito, Isaac tinun naochi alicalacari tsantica jominue. Abrahanbe tsantica jotonan, jun naoca toteto cuwadeque mantanue. Junni Abraham mantimini Diosica duque quereimin joto, toteniquechinaminue.

Junni Jericobi niyan unilalabetiya seiton imin sona jominue. Rahab mumun jominue. Israelita soldadola Jericoca nosa quirabi jinaminlaca Rahábiri tsanue yape Jericobi mantaminla yalaca felaitusa. Junni weyan Jericobi chuminlari Diosica merátuchi tito puyalainasanan, Rahábiri Diosica quereimin joto pepuyatunue.

Diosica duque quereiminla joto, israelítalari Mar Rojo tinun wa pise polenato, pi itonse cuwenta polelainue. Egipto to soldadolari junsenan polelainasa, pi jera mandoinan, jadito jera puyalainue.

Junni manca mate israelítalari Diosica duque quereiminla joto, siete ma fecári Jericó pueblo awinta nenaminlanue. Yala Diosica duque quereiminla jonan, Jericó awinta wa serica jominnan jera darapatiniinue.

Junnasa Diosiri totemin anjelica erenue yape caque naica jun unila nalalaca jera totesa. Junni Moiseri Diosica quereimin joto, yaca meráto, opisa náca toteto fimiyanue caque casa mate. Junni opisa nachi asanca tamolante jera aralenue yape totemin anjeli israelítalaca totetusa.

Junsi Joseman Diosica quereimin joto, cuenta quinue israelítala Egipto tobi nechi jera manlolaiichunaeque. Yari puyachinaminnan mantanue ya puyacaca Egíptobi nechi mantanloto, uyanchi manmenalaquinaque.

Junsi Jacóbonan Diosica quereimin joto, yachi nietolaca bendesiquinue. Yachi nao Josechi nalalaca bendesiquinue. Puyachinaminnan yachi tolabe sonbaito wiruito, Diosica se tito, bendesiquinue.

Junsi Isaaman uwaito, Diosica quereimin joto, yachi nalalachi tenchi Diosibe rocainue. Jacóbobe Esaúbeca seque quinaque rocainue.