Popular Bible Verses from الرِّسَالَة لْلْعِبْرَانِيِّينْ 5

Share

أَمَّا الْمَاكْلَة دْ الْكْبَارْ، رَاهَا لْلِّي نَاضْجِينْ، عْلَاحْقَّاشْ تْدَرّْبُو مْزْيَانْ عْلَى كِيفَاشْ يْفَرّْقُو بِينْ الْخِيرْ وْالشَّرّْ.

رَاهْ كَانْ خَاصّْكُمْ تْكُونُو مُعَلِّمِينْ حِيتْ كَانْ عَنْدْكُمْ الْوَقْتْ الْكَافِي، وَلَكِنْ نْتُمَ بَاقِي خَاصّْ اللِّي يْعَلّْمْكُمْ الدُّرُوسْ اللّْوّْلِينْ فْكْلَامْ اللَّهْ، وْمَازَالْ مْحْتَاجِينْ لْلْحْلِيبْ مَاشِي لْلْمَاكْلَة دْيَالْ الْكْبَارْ. حِيتْ اللِّي كَيْعِيشْ بْالْحْلِيبْ، مَا كَيْفْهَمْشْ كْلَامْ الْحَقّْ، حِيتْ مَازَالْ دْرِّي صْغِيرْ فْالْإِيمَانْ.

وْوَاخَّا كَانْ وَلْدْ اللَّهْ، تْعَلّْمْ الطَّاعَة بْالْعْدَابْ اللِّي قَاسَاهْ. وْمْلِّي وْلَّى مْكْمُولْ، وْلَّى هُوَ سْبَابْ النّْجَا الدَّايْمْ لْݣَاعْ النَّاسْ اللِّي كَيْطِيعُوهْ.

وْرَاهْ فْالْوَقْتْ اللِّي كَانْ عَايْشْ فِيهْ الْمَسِيحْ عْلَى الْأَرْضْ، كَانْ كَيْصَلِّي بْصُوتْ عَالِي وْبْالدّْمُوعْ وْكَيْطْلَبْ اللَّهْ اللِّي قَادْرْ يْنَجِّيهْ مْنْ الْمُوتْ، وْسْتَاجْبْ اللَّهْ لْصْلَاتُه عْلَى حْسَابْ التَّقْوَى دْيَالُه.