Popular Bible Verses from Hebreos 11

Share

Jakajkukua maiamperakuesti imeri engachi erokorheni jaka; ima jimbo jánhaskorhesti eskachi jakajkusïnga iámendu ambe engachi no exejka. Diósï juchari ióntki anapuechani jaiapanheantaasti jimbokaksï jakajkusïrempka.

Jimbo, Diósïni no úsïndi jaiapanherantani enga no jakajkuaka, jimboka ne enga Diósïni andarhentaaka, urheta uétarhesïndi eska jakajkuaka eska Diósï jarhaska, ka jakajkuni eska imechani engaksï jirinhantajka sési maiamuantasïnga.

Jakajkukua jimbojkuchi míteska eska Diósï uandakua jimbo úska eska xáni ambe auandarhu jaka, ka arhikuekasïndi; eska ambe anga xarharajka, jima uérateska enga no xarharempka.

Abranijtu jakajkukua kurhandiraspti enga Diósï uandajpapka, ka uérasti nirani, jini echerirhu enga jurajkumenhapiringa, ka uéraspti, no míteparini nanisï niárani jámempki. Jakajkukua jimbosï Abrani, echerirhu enga aiamenhapka, kómu jámapti, enajki ambe ima no jima anapuepi, uapajtsïtakuarhu irekaparini, májkueni eska Isaki ka Jakobu, jimbokaksï imajtu májkueni ambe aimenhatixapka.

Jimboka Noe jakajkuspka enga Diósï aiangupka imani ambe enga nótki exempka, jimbosï ima, chérheparini teparini ma úpti ka engaksï imani jimbo imeri márkuecha no itsïrhu uarhimepka; ka jiájkani jakajkukua jimbo jánhastaraasti parhakpeni anapuechani eskaksï támisï jámaxapka ka ísï jámani újchakurakua intsïnhaspti engaksï imecha intsïnhajka engaksï jakajkujka.

Ka jakajkukua jimbo, Enoki tsípiti pánhantasti, eska no mítepiringa néneski uarhini, jimbosï nómeni xénhantapti imeri anhanhatakua, jimboka Diósï pántaska. Karakatarhu arhisïndi eska Diósïni jaiapanherantasïrempka.

Abelijtu jakajkukua jimbo Diósïni sánderu k'éri ambe aiakuntasti eska Kaini, ka imani jimbo kaxumbiti únhasti, jimboka Diósï jaiapanhekuntaska enga ima aiakuntaka; ka náuejki Abeli uarhikia Diósï útasï míantaxati.

Sárajtu jakajkukua jimbosï intsïnhapti uinhapekua eska úpiringa sapini kámani, náuejki kutsïmepkia, jimboka jakajkukuspka imani enga aiakupka.

Jimboka ima k'éri iretani enga pítsekua sési jukaka mintsikaxapka, enga Diósï úka ka eratseka néna enga jáxepiringa.

Moisesï k'éritinia, jakajkua jimbosï no jiókorhepti eska faraoniri nimakua arhinhapiringa. Sánderu sáni uékaspti eska Diósïri iretani jinguni nósesi kánhapiringa eska namoni jurhiajku k'amanharhitskueri áspekua ts'émupiringa. Sánderu sáni uékaspti Krístueri nósesi nitamakorhekuani jukaparharani, jimboka exerixapkia ambesï intsïmbenhantapirinki. Jakajkuparinisï Ejiptu uékuantapti; sési anhaxurhikorhespti eska ambe Diósïni exeni jarhani.

Abrani jakajkukua jimbosï uékapti Isakini Diósïni aiakuntani jiájkani enga ts'éjkunhapka, ka ima enga aiamenhatini jápka tsípekua jinguni uékaspti májku uájpani aiatspentani

Rajabi, uarhiti ísku jándi, jakajkukua jimbosï no márku uarhipti, imani no kurhandicha jinguni, jimboka tsípekua jinguni mintsikorheraaspka Israeli anapuechani, engaksï urhepapka erantskani.

Jakajkukua jimboksïsï k'éri japunda charhapitirhu k'arhindueni parhimepti; jiájkani engaksï Ejiptu anapuechajtu uékapka májkueni parhimeni ka jimaksï uarhimeni.

Jerikojtu jakajkukua jimbosï ótakua xerenhantati, ka urhetaksï iúmu tsimani jurhia iurhipkurhanhaspti.

Jakajkukua jimbosï páskueri k'uínchekua úntapti ka iurhiri atamutatspeni, eska ísï jámani k'amajkpiri, nómbema úkuapiringa Israeli anapu charhaku urhetichani.

Josejtu jakajkukua jimbosï Israeli anapuechani arhiapti eska méni jatsipiringa Ejiptu uéakuntani ka aiakuaspti eskaksï imeri anhanhatakuani imechani jinguni pántapiringa.

Jakobujtu, jakajkukua jimbosï újchakuraapti iámendu Jose uájpechani, jiájkani enga uarhini jámempkia ka k'ámaratini tsérhukua tenhexkorhekuarhu p'ijtsïtani.

Isaki jakajkukua jimbosï Jakobuni ka Esauni újchakurati eskaksï uánepiringa.