Popular Bible Verses from Génesis 17

Share

Apran iscon shonca iscon piꞌipitasoꞌ, Siniorori yaꞌnotahuaton, itapon: —Caso Yosëco, yaꞌipi nanitaparahuë. Natëtonco, nohuantërahuësoráchin niquëꞌ.

Naporahuaton, co huachi Apran itaponënhuëꞌ. Ipora quëran huarëꞌ Apraan itaponën. Ca nohuanto naꞌa nacionoꞌsa quëmá quëran pipipona niꞌton, ina pochin nohuitaponën.

Quëmarëꞌco ipora nani anoyatërahuë. Shiparinpitarëꞌconta aꞌna tahuëri anoyatarahuë. Yosënënco niꞌto, catahuaráponquën. Shiparinpitanta inapotápo.

—Niꞌquëꞌ, iso pochin quëmarëꞌco anoyatarahuë. Quëmá quëran naꞌa nacionoꞌsa pipiarin.

Yosëriso nipirinhuëꞌ, itapon: —Saꞌanquë chachin huiꞌnahuanaran taꞌto, napotaranquën. Huiꞌnan nasitohuachin, Isaco itaran. Quëmarëꞌco anoyatërahuësoꞌ, inanta shaꞌhuitarahuë. Shaꞌhuitërahuëso chachin, shinpitanta catahuamiatarahuë.

Yaꞌipi Canaan noꞌpaꞌ ipora yaꞌhuëranquë, huaꞌanëntacaso marëꞌ quëtaranquën. Shiparinpitanta iso noꞌpa chachin huaꞌanëntomiataponaꞌ. Inapitantaꞌ, casáchin chinotaponaco, itërin.

Napotohuachina, Apraanso isonin. Isonin quëran noꞌpaquë huarëꞌ monshorahuaton tëhuarin. Tëhuapon pochin yonquirin: “¡Pasa piꞌipitohuachinara, co huachi huiꞌnahuanpihuëꞌ! ¡Saranta iscon shonca piꞌipitaton, co huachi onporonta nanitërinhuë huaꞌhuanacasoꞌ!” tënin yonquinënquë.

Naporo chachin, Yosëri Apraan itaantarin: —Saꞌaontaꞌ Sarai itopiramahuëꞌ, co huachi inapochin nohuitaramahuëꞌ. Ipora quëran huarëꞌ Sara itapomaꞌ.

Taparonëmaquë, shaꞌhuëchin imorayatërinsoꞌ, niyashitëtocoꞌ. Inaporamasoꞌ, ayonquiarinquëma carëꞌquëma anoyatëramasoꞌ.

Napoaponahuëꞌ quëmaroꞌco anoyatato shaꞌhuitëranquënsopitasoꞌ, Sara huaꞌhuinquën nisarin. Aꞌna piꞌi quëran, ipora tahuëriꞌsa pochin, Isaco nasitapon, itërin.

Ipora quëran huarëꞌ yaꞌipi quëmapinquëma ninamasopita, nasitërin quëran posa tahuëritapasoꞌ, marcanën acotocoꞌ. Huiꞌnamantaꞌ, inapotocoꞌ. Piyapinëma nisharoꞌsa paꞌantëramasonta inapotocoꞌ. Yaꞌipinquëma niacotacaso yaꞌhuërin. Co aꞌnaya tëranta topinan nicamaso yaꞌhuërinhuëꞌ. Inapohuatamaꞌ, canpitarëꞌco anoyatërahuësoꞌ, nonëmaquë chachin chiminamaquë huarëꞌ yaꞌhuëápon.