Popular Bible Verses from Heb 11

Share

Li paab'aal a'an xtoonal li k'aru na'oyb'enimank; a'an xkawub' li ink'a' na'ilmank ru. Sa' xk'ab'a' a'an xsaho'k xch'ool li Yos chirixeb' li qaxe' qatoon.

Ab'anan wi maak'a' qapaab'aal, ink'a' naru naq li Yos taasaho'q xch'ool qik'in, xb'aan naq ani najilok chi xk'atq li Yos tento tixpaab' naq wank li Yos ut a'an naxq'ajkamuheb' li neke'sik'ok re.

Sa' xk'ab'a' li paab'aal naqanaw naq li choxach'och' kib'aanuuk rik'in raatin li Yos. Chi jo'kan li k'aru na'ilmank ru ki'uxk rik'in li moko na'ilmank ta ru.

Sa' xk'ab'a' li xpaab'aal laj Abrahán kixpaab' li Yos naq kib'oqe'k chi xik sa' li na'ajej li tixk'ul cho'q re, ut ki'elk chi ink'a' naxnaw b'ar ta yo chi xik. Sa' xk'ab'a' li xpaab'aal kiq'axonk sa' li ch'och' yeechi'inb'il chaq ut kib'eek jo' aj numel sa' ab'l aj ch'och'; kiwank sa'atqeb' li muheb'aal, jo' ajwi' ke'wank laj Isahak ut laj Jakob, a'aneb' te'reechani ajwi' li xyeechi'om li Yos.

Sa' xk'ab'a' li xpaab'aal laj Noé kirab'i resil li k'aru toj maji' na'ilmank ru; kixxiwa ru li Yos ut kixyiib' li jukub' kab'l re xkolb'al li xjunkab'al. Ut sa' xk'ab'a' li xpaab'aal kixtz'eqtaana li ruuchich'och' ut koxreechani li tiikilal li nachalk xb'aan li paab'aal.

Sa' xk'ab'a' li xpaab'aal laj Enok kik'ame'k taqe'q chi ink'a' kixyal li kamk; ut ink'a' chik kitawmank xb'aan naq kik'ame'k xb'aan li Yos. Ak rub'elaj li xq'axonik, li Santil Hu naxye chi yaal naq li Yos sa sa' xch'ool rik'in.

Sa' xk'ab'a' li xpaab'aal laj Abel kixyeechi'i re li Yos jun li mayej q'axal chaab'il chiru li kixk'e laj Kaín. Sa' xk'ab'a' a'an li Yos kixye naq tiik xch'ool laj Abel ut kixk'ulub'a li xmayej. Jo'kan naq, us ta kamenaq chik laj Abel, ab'an toj yo chi aatinak anaqwan sa' xk'ab'a' li xpaab'aal.

Sa' xk'ab'a' ajwi' li xpaab'aal lix Sara, us ta ak xnume'k xq'ehil, kixk'ul xwankil re wank chi na'b'ejil, xb'aan naq naxnaw naq paab'ajel li kiyeechi'ink re.

Xb'aan naq laj Abrahán naroyb'eni li tenamit ub'elanb'il chi us, a' li wank li Yos cho'q aj na'leb'ahom ut aj kab'lahom re.

Sa' xk'ab'a' li paab'aal laj Moisés, naq ak xwinqilo'k chik, ink'a' kiraj kixk'ab'a'in xyum xrab'in laj Parahón; a' chik li rahob'tesiik rochb'een li xtenamit li Yos kiraj chiru li wank sa' xsahil li maak li sa' junpaat nanume'k. Naxk'oxla naq q'axal chik loq' li b'ihomal nachalk sa' xk'ab'a' li xnimal xrahilal li Kriist chiru chixjunil li xb'ihomal li tenamit Ejiipt, xb'aan naq kaw xch'ool chirix li xq'ajkamunkil. Sa' xk'ab'a' li xpaab'aal laj Moisés kixkanab' Ejiipt chi ink'a' kixxiwa xjosq'il li awab'ej; ut kiwank chi kaw xch'ool chi chanchan yo chi rilb'al Li ink'a' na'ilmank ru.

Sa' xk'ab'a' li xpaab'aal laj Abrahán, li rab'ihom chik li xyeechi'om li Yos, kiyale'k rix ut kixmayeja laj Isahak, li ralal jun chirib'il

Sa' xk'ab'a' li xpaab'aal lix Rajab, laj yumb'eet, ink'a' kikamk sa' xyanqeb' laj q'etol aatin, xb'aan naq kixk'uleb' sa' usilal eb' laj k'ehol eetal.

Sa' xk'ab'a' li paab'aal ke'nume'k sa' li Kaqi Palaw chanchan nume'k sa' li chaqich'och'; ab'an eb' laj Ejiipt, naq ke'xyal xb'aanunkil a'an, ke'oso'k chi junajwa sa' li ha'.

Sa' xk'ab'a' li paab'aal ke'uq'je'k li tz'ak sutsu wi' li tenamit Jerikó, naq ak xsutimank rix chiru wuqub' kutan.

Sa' xk'ab'a' li xpaab'aal kixninq'ehi li Paswa ut kixtaqlaheb' laj Israel chi xkirkisinkil li kik' re naq laj Kamsinel ink'a' tixch'e'eb' li xb'een ralaleb'.

Sa' xk'ab'a' li xpaab'aal laj José, naq ak kamk re, kixye resil naq sa' jun kutan eb' li ralal xk'ajol laj Israel te'elq Ejiipt, ut kixk'e xchaq'rab'inkileb' chirix k'aru tkanaaq wi' li xb'aqel.

Sa' xk'ab'a' li xpaab'aal laj Jakob, naq ak kamk re, kirosob'tesi li junjunq sa' xyanqeb' li ralal xk'ajol laj José. Chirix chik a'an kixk'utzub' rib' sa' xb'een li xxuq' ut kixloq'oni li Yos.

Sa' xk'ab'a' li xpaab'aal laj Isahak kirosob'tesiheb' laj Jakob ut laj Esaú ut ki'aatinak chirix li k'a'aq re ru toj chaalel chaq chi xb'eeneb'.