Popular Bible Verses from Marcos 9

Share

Entonces ojron e Jesús y che: —Pues tut tin e war ac'upseyan tamaren, tunor erer achena umener, che e Jesús.

Entonces aru e tatab'ir taca inte' nuxi nuc y che: —Inc'upseyan tamaret, tacrenen tua' inc'upseyan tamaret más, che e winic era taca inte' nuxi nuc.

Entonces ochoy e Jesús tama inte' otot taca tunor uyajcanuarob' y conda turob' ub'ajnerob' macu jaxob' taca cay uyub'iob' tua' y chenob': —¿Y tuc'a tua' machi cob'na cawajnes aloc'oy e mab'amb'an mein era? che uyajcanuarob'. Y jaxir che: —Pues inte' mab'amb'an mein cocha era machi uyub'i aloq'uesna umen inte' jay merato uyustes uyalma taca e oración y e ayuno, che e Jesús.

Y bueno e atz'am, pero jay e atz'am apaxran ut entonces mix tuc'a uc'ampib'ir inyajrer. ¿Y cocha tua' asutpa watar utzeir otronyajr? Y tamar era nox uc'ani tua' icojco ib'a tua' ixquetpa imb'utz tut e Dios y tua' ixquetpa imb'utz taca e inmojr ub'an, b'an cocha e wer conda ayan e atz'am tamar que machi asatpa. Y tamar era nox uc'ani tua' icojco e jiriar tijam inte' intiox, che e Jesús.

—Tin e uch'ami inte' yar chuchu sitz cocha era tama nic'ab'a war uch'amien nen ub'an. Y tin e war uch'amien nen, majax nen taca war uch'ami sino que war uch'ami ub'an tin e uyeb'ta tarien, che e Jesús.

Y c'ani inwareox era que tunor tin e axin utacre inte' tama nic'ab'a umen taca que jax inte' ajc'upesiaj tamaren, motor que imb'ijc ja' taca axin uyajc'u tua' ojchna, pero c'ani inwareox que jaxir san tua' uch'ami utuanib'ir tua' e Dios tamar lo que uche era, che e Jesús.

Entonces ojron e Jesús otronyajr y che: —Tin e axin uche acucrema tama e mab'amb'anir inte' chuchu cocha era xe' war ac'upseyan tamaren más ani bueno tua' acajcha inte' nuxi cha' tama unuc y tua' atob'esna axin tama e ja' tia' más intam tua' achamay macuir e ja'.

B'ajc'at war itzay ache e mab'amb'anir tamar taca lo que awira tamar ingojr unac'oit, y jay b'an entonces más ani bueno tua' alocse achoqui ingojr unac'oit. Pues más ani bueno jay iquetpa taca ingojr taca unac'oit tara tor e rum jay tamar era machi tua' i'xin b'ixir tut e c'ajc taca chagojr unac'oit.