Popular Bible Verses from Gálatas 5

Share

Pero tin e b'ijresb'ir umen Unawalir e Dios c'ani achecta tama uyalma que war uyajta ut upiarob', y que war atzay axana, y que ayan e jiriar tamar, y que machi aq'uijna wacchetaca, y que inc'un uwirnar, y que turix tua' utacre upiarob', y que matuc'a e majresiaj tama uyalma, y que ayan e manxujresiaj tama uyalma, y que ucojco ub'a tua' machi uche e mab'amb'anir. Pues matuc'a inte' ley upater tunor era.

Pues entonces c'ani inwareox era que c'upsenic lo que war ub'ijresox Unawalir e Dios tua' iche y ira isicb'a tua' iche lo que uyusre uche iwerir.

Y cocha war caturuan tama uc'otorer Unawalir e Dios, cawactic cab'a tua' cab'ijresna umener.

Y tamar era tunoron xe' tuon e Cristo Jesús machi ixto c'ani cache e mab'amb'anir, sino que war caquetpa b'an cocha inte' chamen tut tunor lo que uyusre uche cawerir.

Y chequer lo que uyusre uche uwerir inte' xe' jax era: Conda inte' axin uyose ub'a taca tin e merato anujb'i tacar, y conda inte' axin uche lo que intuj tut e Dios, y conda inte' axin uche lo que uche asatpa ujor conda uche. Y lo que uyusre uwerir inte' jax era ub'an: Conda inte' axin uyujtz'i ut inte' chamen dios, y conda inte' axin ab'axon, y conda inte' axin uxejb'e ut otronte', y conda majax intera ub'ijnusiaj taca e inmojr, y conda axin atz'uni tut otronte', y conda inte' uyacta ub'a aq'uijna wacchetaca, y conda inte' uc'ani tua' aquetpa tunor b'an taca cocha uc'ani jaxir, y conda inte' uche uxere ub'ob' e inmojr, y conda inte' ub'ijnu que jax taca ayan uc'ampib'ir. Y lo que uyusre uche uwerir inte' jax era ub'an: Conda inte' axin ac'uxnaq'ui uwira lo que ayan tua' otronte', y conda inte' axin acaray, y conda inte' axin ub'ijnu tamar taca e nojq'uin, y conda inte' axin uyusre uche tunor e mab'amb'anir cocha era. B'an uyusre uche uwerir inte'. Pero c'ani inwareox era b'an cocha cay inwareox tama inyajr, que tunor tin e axin uche cocha era machi tua' o'choy tama uchinam e Dios.

Pues niwermanuox, nox pejcb'irox umen e Dios tua' ub'aniox tama uc'otorer uley e Moisés. Pero ira ixixin iche lo que uyusre iwerir b'an cocha uchiob' e gente tara tor e rum umen que quetpox b'amb'ir era, sino que tacrenic ib'a inte' intiox umen que war iyajta ut ib'a.

Porque tunor lo que uyusre uche cawerir majax b'an cocha uc'ani Unawalir e Dios. Y tunor lo que uc'ani Unawalir e Dios majax b'an cocha uc'ani cawerir. Y tamar era conda Unawalir e Dios war ub'ijreson war uwirsion que majax bueno tua' cache lo que uyusre uche cawerir y tamar era ma erer cache b'an taca cocha cac'ani.

Porque tunor uley e Moisés war o'jron tamar taca inte' b'ijnusiaj que che: “Yajtan ut apiarob' b'an cocha ac'ani tua' ayajtanwa oit umen apiarob' era”, xe' che tama uley e Moisés.

Entonces machix catattz'ic cab'a que otronte' cocha non matuc'a, y machix capaq'uic e q'uijnar ticajam, y machix tua' cac'uxnaq'ui cawira lo que ayan tua' otronte' ticajam.

Pues entonces c'ani inwareox era que e Cristo ixin ulocsion yeb'ar uc'otorer e onian b'ijnusiaj tua' caquetpa b'amb'ir. Y tamar era q'uec'ojsenic ib'a tua' ixquetpa b'amb'ir y ira ixc'upseyan tut e ojroner xe' che que uc'ani tua' axujra imb'ijc uq'uewerir itejromar xe' jax inte' canseyaj xe' c'ani uchiox ixquetpa cachar otronyajr yeb'ar uc'otorer.