Popular Bible Verses from Santiago 1

Share

Alak nu hermanos, lic qui'cota alak echiri' quic'ow alak chupa tak uq'uiyal uwach c'axc'obic. Ma eta'am chi alak we cach'ij alak ri c'ambal upa ri cubulibal c'u'x alak ruc' ri Dios, wa' cuc'am lo unimal c'u'xaj che alak.

We c'o c'u junok che alak cajawax sakil una'oj, chutz'onoj che ri Dios y wa' caya'taj lo che, ma ri Dios na cuxu'yaj ta ri catz'onox che y na cuc'ak tane bi quik'ij ri ticawex c'o caquitz'onoj che.

Alak nu hermanos ri c'ax canna' alak, mic'ow chic'u'x alak wa': Lic chirajawaxic che alak caya xiquin alak che ri caquibi'ij ri jujun chic, no'j lic ch'obo na alak rakan chi utz sa' ri cabi'ij alak, yey mu'an ne ri lic xa ch'itil alak che ri oyowal.

Lic c'ola c'u unimal c'u'x alak pa sakil wi cha' jela' cac'oji' alak jusuc' y cacowir alak chi utz, jec'uri'la' na jinta chi c'o cajawax che ri binic silabic alak chwach ri Dios.

E lic 'ana alak janipa ri cubi'ij Ruch'a'tem ri Dios y na xew ta alak tanel re; ma we xa alak tanel re, casoc ib alak we cach'ob alak ruma wa' cacolobetaj alak.

Nim uk'ij ralaxic ri ticawex cuch'ij uchuk'ab ri c'ambal upa, ma echiri' uch'ijom chi uchuk'ab wa', cuc'ul ri sipanic re ri c'aslemal ubi'tisim lo ri Dios chique ri c'ax quena'w re Rire.

Ma ronoje chomilaj sipanic y ri utz caya'taj chike, ruc' ri Dios petinak wi. Rire e 'anayom re tak ri cawon che ruwa caj. Yey tak wa' xa cajalc'atitaj uwach, no'j ri Dios na cajalc'atitaj ta uwach y ri k'ijsak re Rire na coc ta k'eku'm chwach.

Ma e junok xa tanel re Ruch'a'tem ri Dios y na cu'an ta janipa ri cubi'ij, e pacha' junok caril rupalaj chupa juna spej. Yey echiri' xril bi rupalaj, que'ec y xa pa jok'otaj cumesc'utaj sa' ri catzu'nic.

Ma ri sakil ulok'nimaxic uk'ij ri Kakaw Dios e ri quekato' ri niba'ib y ri malca'nib chupa tak ri c'ax e c'o wi, yey e ri cakachajij kib cha' na cojtzak ta chupa ri ch'ulilaj mac re ruwachulew.

Echiri' c'o junok cuna'o c'o caminow uwach pa mac, mubi'ij e ri Dios ri ca'anaw wa' che. Ma ri Dios na cacha ta c'ana uc'u'x che ri mac yey na cumin tane junok chupa. Ma echiri' c'o junok cuna'o c'o caminow uwach pa mac, ri' e rurayibal ri cac'amaw bi re chupa.

E juna hermano lic na il ta co uwach, lic qui'cota che ri yacbal uk'ij cuya ri Dios.