Popular Bible Verses from Tito 3

Share

Eh noq re' Dios i qaj Ko'loom xuyeew i rotob'il, xuyeew wo' i ruk'axb'al chikinaah i tinamit wach ak'al. Xojruko'leej i ma' ruum ta chi wilik taj i holohik xqa a'n, xa ruum la' chi xuketelaaj qawach. Ruuk' i ruqahteesjiik qahaa' xb'aan, xk'utinik chi xojruko'leej. Eh re' Dios xuyeew q'ab' qeh chi ruuk' i rajaawriik i Santolaj Uxlab'al xujal qawach, xuyeew qeh i jinaj ak' laj k'acharik. Parub'ihnaal i Jesucristo, i qaj Ko'loom, xuyeew cho qeh i Dios chi manlik i Santolaj Uxlab'al. Je' re' xub'an i Dios, re' xraaj i reh, noq hoj chik ruko'leem chuwach i qamahk ruuk' i rotob'il, naa ruye'em qeh i juneliik k'acharik re' i k'ahchi' quy-eem.

Re' hat Tito, cha q'or keh aj nimaneel chi kinimanoq chikiwach taqe ajaab'ees, chikiwach i xa reh reh wach kajaawriik chi taaq'anik. Eh kian i holohik laj na'ojb'al. Mo'-oq awach ineenkitz'aq k'utaaj chi riij. Kik'acharoq parukorkiil, xa atoob'-oq taqe. Kik'uhtaaj ruch'ub'kiil wach i kánima chikiwach chu'nchel i tinamit.

Xa re' la', maayeew q'ab' chi neenb'aan i xa memil laj wech'inik, re' ruk'uhtjiik i xa nkiyejaa' wach chikiij i qamaam qati't, je' wo' taqe k'ahinik iib', i peletohinik iib', choqinik iib' chi riij i najtir k'uhb'aal. Re' taqe re' xama' xta rutiq wach.

Wila' awach imb'anik reh i yojoj k'uxliis, chaq'il junriim oon ka'pech-oq, eh wi ma' xnimanik, chawesaj cho chi kixilak i aj nimaneel.