Popular Bible Verses from Lc 3

Share

A yet junel, yet c'amto chi alay oc Juan tu' preso, lanan yak'on bautizar eb anima chi apni oc bay, max yak'on c'apax bautizar Jesús. A yet lanan txajli Jesús, cax max jakchaj satcan. Axa yayol Cham Espíritu Santo yiban tu' axca junok paloma. Caw miman txequel yet max ayol tu'. Max ablay yoc k'anej max al-lay aytek satcan, max al-lay axca ti': —Ach ton ti', in C'ajol ach, cax camc'ulnebil ach wuj; caw chin tzaloj en, ẍi.

Palta max yal bay eb masanil axca ti': Ayin ti', wal yel chex wak' bautizar yetok aej, palta ay jun mactxel tolto ok jayok. A' ok ak'on Espíritu Santo ayex, ma xin a k'ak' ok yak' ayex, tol ok ex ak'lay bautizar yuj. A jun mactxel chi wal tu', yelxac'al miman yelapnok wintak. Yuj tu' xan man in mojok wak'on serbil jabok, caxc'al yin in xuyon el tx'anil xanab, man in mojok.

Ta chi na ba e c'ul yin e yobtakil, yowalil watx' che yut e beybal, yet watx' chi txecloj elok tol yel mayal e na e ba. Manchak e yal axca ti': C'am tzet chi co na', yinatil on Abraham, man quex chiok. Yujtol chi wal ayex, ta chi yal c'ul Dios, chi je' yuten oc juntzan ch'en ti' animail, cax chi oc yinatilok Abraham e q'uexelok.

A jun miman yailal ok jayok, lajan axca junok winak watx'xa yayji yetok yechej yich junok te' yet chi k'akon ajok. Masanil te' man watx'ok sat chi yak'a', chi tzoc'ajok, cax chi yak'on tz'a'ok, ẍi Juan bay eb.

Axca ton ti' max uji, yuj yunen el tzet albilcan yuj jun chekbej Dios chi yik Isaías: Ay jun mactxel bay tz'inan tx'otx' chi awji, chi yalon axca ti': Watx'nejek junok is be Cham Yajaw. T'inek junok be bay Cham. Ak'ek noj masanil jobelak; masanil witzlak c'al tzalanlak ak'ek pananbok. Masanil be coxquiẍtak, jichlonelayokabi. Yetok juntzan amquiẍtak, muklayokab elok cax pananbokabi. Cax ok yilon eb masanil jay Cham Colwajwom chekbiltek yuj Dios, ẍi bay tz'inan tx'otx' tu', ẍi yul tx'an Un Tz'ibbilcanok.