Popular Bible Verses from Heb 11

Share

A yet chi jaon oc junok tzet yetal yin co c'ul, chi yal elapnok tol caw chi jaoc yipok co c'ul tol ok co cha' tzet lanan jechbaneni, cax tol jojtak sic'libil, tol a juntzan tzet manchak jiloc yin, ay ton ec'ok. A eb jichmam, ocnak eb watx'il satak Dios, yujtol yanak oc eb c'ul yin Cham.

Ta c'am chi jaoc co c'ul yin Dios, c'am chi je' tzaloj jetok. Yujtol a mac chi jay bay Dios, yowalil chi yaoc yin c'ul, tol ay ton Dios. Cax chi yaon c'apax oc yin c'ul, tol chi paktzej Cham bay eb chi yochej chi jayoc bay.

Yujtol chi jaoc co c'ul yin Dios, xan jojtak tol asan yetok is k'anej max watx'nej Cham yulyibank'inal ti', c'al juntzan tzet chi ec' satcan. A juntzan tzet chi jil tinani', man yinok tzet txequel tinani' max tita.

A Abraham, yanak oc Dios yin c'ul. Yuj tu' xan a yet max awtelay yuj Cham max yikej, cax max toj bay jun lugar yak'nak Cham is sataknej. Caxc'al man yojtakok bay chi toji, palta max bekcan is tx'otx'al cax max toji. Yujtol yanak oc yin c'ul, xan ec'lejnak cajan bay jun lugar yak'nak Dios is ti' yak'on bay tu'. Mantiado max oc is yatutok. Axca tu' yutnak c'apax ba Isaac yetok Jacob, yujtol ay yalon yet eb chaon jun tzet yak'nak Dios ti' yak'oni.

A Noé, yanak oc Dios yin c'ul. Yuj tu' xan a yet max yalon Dios bay tol ok jay tzet c'amto chi il-layi, caw wal max xiwi, xan max yikej watx'nen jun arca bay ok col ba yetok is yuninal yetok yetbi eb. Yuj jun tu' xan max lowcan camich yiban masanil anima. Max yalon Dios tol watx' Noé tu' yul sat, asan yuj max yaoc c'ul yin.

A Enoc, yanak oc Dios yin c'ul; yuj tu' xan max ilaytok yuj Dios yin yiquisal. Majxa ilchajok, yujtol max ilaytok yuj Dios. Chi yaltek yabixal yul tx'an Un, tol a yet c'amto chi ilaytok tu', max tzaloj Dios yetok.

A Abel, yanak oc Dios yin c'ul. Yuj tu' xan a is xajanbal yak'nak bay, ec'ban watx'il yintak yet Caín, xan yalnak Dios tol watx' Abel tu' yul sat; yuj tu' max cha' is xajanbal. Caxc'al camnakxa Abel tu', palta axca tol ac'ala' k'anjab ayon, yujtol yanak oc yin c'ul.

A xal Sara, yanak oc Dios yin c'ul. Yuj tu', caxc'al man uniwomixok, palta maxto ak'lay yip yet ixnamxa, maxto jay yune'. Yuj tu', ay jun yune' maxto alji, yujtol yanak oc yin c'ul, tol a Cham yak'nak ti' bay, chic'al yun bay chi yala'.

A Abraham tu', chi yechbanej jun conob cimiento yich ayayok. A Dios max naon watx'jubal jun conob tu', cax max watx'neni.

A Moisés tu', yanak c'apax oc Dios yin is c'ul. Yuj tu' xan a yet icham winakxa, c'amxa chi yochej chi al-lay oc yuneok ix cutz'in cham reyal Egipto. Maj yochej max yak' tzalojbok c'ul yin yobtakil, yujtol a tzalojc'ulal tu' chi eq'uelok. A ti yet, tol max cha c'ul yaben yail yetok eb conob Dios. Max naon c'apaxok, tol caxc'al chi yab yail buchlay yuj Cristo, palta watx' yet. A masanil beyomal Egipto tu', c'am yelapnok yul sat, yujtol yanaktok is nabal yin is paktzebal ok yak' Dios. Max yaoc c'ul yin Dios. Yuj tu' xan max el bay Egipto tu'. Maj xiw jabok yuj yowal c'ul cham rey tu'. Caw tec'an max yut is nabal, axca tol chi yiloc yin Cham c'am chi je' jilon oc yin, a ton Dios.

A Abraham, yanak oc Dios yin c'ul. Yuj tu' xan a yet max ak'lay porobal yuj Dios, max yitok Isaac, cax t'inan bet yak'on yin xajanbalil yaloni. Caxc'al yak'nak Dios is ti' yuj Isaac tu', palta bekanxa c'ul Abraham tu' yak'on jun c'otan is c'ajol yin xajanbalil.

A ix Rahab, ix ajmul ix, max yaoc Dios yin c'ul. Yuj tu' xan maj cam ix yetok eb pit max yut ba, yujtol watx' max yut chaon ix eb israel max beytzen jun conob tu'.

A eb israel tu', yanak oc eb Dios yin c'ul. Yuj tu' xan max ec'tok eb nan a' chi yik Cakyin Mar, axca co bey bay c'am aej. A yet max yochej eb aj Egipto max ec'tok axca eb tu', max jik'bi eb yuj a'.

Yuj max yaoc eb jichmam Dios yin c'ul, xan a yet max xew yoyon ba eb ukeb c'u yinlak murallail conob Jericó, max ayc'ay bulnaj yuj eb.

A Moisés tu', yujtol max yaoc Dios yin c'ul, xan max yikej chaon el yich jun k'in chi yik Pascua. Yalnak bay eb yet israelal, tol chi txij oc eb chic' yinlak is puerta, yet watx' c'am chi mak'lay cam eb is babel unin eb yuj jun ángel ay yopiso yin mak'oj cam anima.

A José, yanak oc Dios yin c'ul. Yuj tu' xan a yet toxa chi cami, max yaloncanok tol t'inan ok el eb israel bay Egipto. Max yalon c'apax canok, tzet yowalil ok yut eb is bakil.

A Jacob, yanak oc Dios yin c'ul. Yuj tu' xan a yet toxa chi cami, max yaloncan tzetak watx'ilal t'inan chaon junjun eb yuninal José. Maxto yak' ayilal bay Dios, max ay nojan yiban jolom is k'okoch.

A Isaac, yanak oc Dios yin c'ul. Yuj tu' xan yin ayokto max yaloncanok, tzetak watx'ilal t'inan chaon Jacob yetok Esaú.