Popular Bible Verses from Matyu 5

Share

Nobadi no lait lamp an kova it op anda wan boul — nuo sa! Lamp pudong we it kyan lait op di uol ous. A siem so unu fi shain unu lait mek evribadi si, da wie de dem kyan si di gud sitn we unu du an big op unu Faada we de a evn.

“Unu a laik lait we di uol worl niid. Wan siti we de pan di il tap, it kyaahn aid.

Aal a uu onggl waahn fi du di sitn dem we mek Gad api, Gad bles unu, kaaz wan die, wan die, unu a-go get fi si Gad.

Uu waahn du wa rait iina Gad yai so bad, dat it komiin laik se a ded dem a ded fi onggri an dem chuot jrai laik se dem no jringk waata ou lang, Gad bles unu, kaa unu a-go get unu beli ful

Bot dis a wa mi a se, lov unu enimi dem an prie fi di piipl dem we chriit unu bad an mek unu sofa.

“Aal a unu we nuo se unu niid Gad iina evri wie, Gad bles unu, kaa di gud sitn dem we Gad gi wen im ruul piipl laif iina evri wie, a unu a-go get dem.

Gad bles aal a uu elp piipl fi liv iina piis, kaaz a piipl laik dem de Gad a-go kaal fi im pikni dem.

Aal a uu a baal nou, Gad bles dem, kaaz di taim a-go kom wen Gad a-go osh dem an mek dem api agen.

Di piipl dem we ada piipl mek sofa jos kaaz dem liv ou Gad waahn piipl fi liv, Gad bles unu, kaa di gud sitn dem we Gad gi wen im ron piipl laif ou im waahn ron it, a dem sitn de unu a-go get.

Unu we paadn piipl, Gad bles unu, kaaz im a-go paadn unu tu.

Gad bles unu wen piipl shiem unu, wen dem mek unu sofa an wen dem se aal kain-a wikid sitn bout unu we no chuu — bot se it jos kaaz unu fala mi. Mek unuself api wen dem sitn de apm tu unu; jomp op an dong wid jai iina unu aat, kaa nof gud sitn pudong iina evn fi unu. A siem so dem yuus tu chriit Gad prafit dem we did de ya bifuo unu kom.

Aal a uu ombl demself, Gad bles dem, kaa yu si di ort, a dem piipl de a-go kom get it.

“Unu a laik saalt fi di uol worl yu no. Bot ef di ties gaan outa di saalt, ou it fi ties bak laik saalt? It no wot notn nou. It fi jos dash we an tep tep op pan.

So ier mi nou, unu no fi gud onggl somtaim an onggl tu som piipl; nobadi no fi av notn bad fi se bout unu, tan jos laik unu faada we iina evn — im gud aal di wail, tu evribadi, an nobadi kyaahn se notn bad bout im an a taak chuut.”

Ef a ‘yes’ unu a se, se ‘yes’ an don, ef a ‘nuo’ — den se ‘nuo’ an don. Ef unu put notn muo pan dat, a siek-a di wikid wan.

“Unu did ier se Gad se, ‘Ef sumadi juk out yu yai, yu kyan juk out fi dem uon, an ef dem lik out yu tiit, yu kyan tomp out bak fi dem uon.’ Bot ier wa mi a tel unu se, di piipl dem we du aal saat a wikidnis tu unu, lou dem mek dem gwaan. Ef sumadi baks unu kraas unu fies, pan di rait an said, ton di neks said gi dem.

Ef unu rait yai a mek unu sin, tier it out an dash it we! Aftaraal it beta fi luuz onggl wan badi paat, dan di wol a di badi get fling dong a el. Ef unu rait an mek unu sin, chap it aaf man an dash it we! Aftaraal it beta fi luuz onggl wan badi paat, dan di wol badi get fling dong a el.