Popular Bible Verses from MATIYE 6

Share

Yá̰á̰ ń kadə̄ ə̄ndāī kumsí gō tə́ ngá̰ý ī-sāāī ta kəga dɔ bang ní, i Ɓē ko̰o̰ yā Nə́ɓā ō, i háĺ kə́ súmūú ń ni-gḛy ní ō. Gō tə́ anī Nə́ɓā a adə̄sí yá̰a̰ gə̄ ń noō malang dɔ tə́ ɓáý.

I beé ní ī-lōōī sōl̄ tām̄ yā ndɔ̄ kə́ bírí tə́: Ndɔ̄ kə́ bírí a sōl̄ tām̄ yān nəkɔ́ tə́. Tápə̄ kə́ tām̄ yā ndɔ̄ kə́ ɓōólaā tə́ asə ta ndɔ̄ kə́ ɓōólaā tə́.

I tām̄ najə̄ ń toō tə́ n m-ə́dásí na kə ī-lōōī sōl̄ najə̄ yā yá̰a̰ kəsa kə́ yā kadə̄ ə́saī tá ī-ndiīneé kə kumsí ō, najə̄ yā kūbə̄ kə́ yā kadə̄ ō̰ō̰ī rɔ̄sí tə́ ō ní. Ndií ḭ̄ deē kə kumií i yá̰á̰ kə́ tɔȳ yá̰a̰ kəsa ō, rɔ̄í ḭ̄ deē i yá̰á̰ kə́ tɔȳ kūbə̄ kə́ yā ko̰ō̰ ō aĺ a?

Ba dan ń ā ī-gḛy ndɔ̄ȳ ní anī, údə́ kújú looí, ba ūtə̄ ta kújə dɔí tə́ tá ī-ndɔ̄ȳ Bɔbí ń ndi kem loo kə́ to loo mundə̄ tə́ ní. Anī Bɔbí ń i nge ka̰a̰ yá̰á̰ kə́ rāā loo mundə̄ tə́ jəke ní, a əndā njaí.

Adə̄ ré ā ī-ndɔ̄yī ɓáa ī-ndɔ̄yī tītə̄ ń toō beé: Bɔbə̄jí kə́ ndi dɔ rā̰ tə́, ādə̄ rīí i kə́ kɔr̄ kam̄, ādə̄ Ɓē ko̰o̰ yāí reē ugə̄ ō, ādə̄ de gə̄ rāān̄ yá̰á̰ ń kemií gḛy ní dɔ nang tə́ tītə̄ ń a rāān̄neé dɔ rā̰ tə́ ní ō.

Ādə̄jí yá̰a̰ kəsa yājí kə́ ɓōólaā.

Ī-mā̰ȳ rɔ̄í dɔjí tə́ najə̄ yá̰á̰ kə́ gōtə́ aĺ gə̄ ń jə-rāā seí ní tə́, tītə̄ ń jḭḭ kɔ́ gə̄ jə-mā̰yń rɔ̄jí dɔ ngé rāājí majaĺ gə̄ tə́ ō ní.

Ī-lōō kaw̄ sejí ta yá̰a̰ nāā gə̄ tə́, ba ɔ̄r̄jí kɔ̄ɔ́ jī nge nāājí tə́. Tɔdɔ̄ ko̰o̰ ɓē ō, tɔ́gə ō, kɔsə gɔn ō i yá̰a̰ yāí gə̄ kə́ njɔ́ḿ gə̄ tə́. Adə̄ i tītə̄ ń noō!

Yá̰á̰ kə́ majaĺ gə̄ ń madə̄sí gə̄ rāān̄ sesí ní ré ī-mā̰yī rɔ̄sí dɔdə́ tə́ najə̄n tə́ anī, Bɔbə̄sí ń ndi dɔ rā̰ tə́ ní a mā̰ȳ rɔ̄n dɔsí tə́ ō.

Á̰a̰ī yel̄ kə́ dɔɔ́ gə̄: Nin̄-dubə̄n̄ kōō aĺ ō, əjan̄ kōō aĺ ō, ɔyn̄ kōō kə̄ kem mōyō̰ó̰ aĺ ō, banī Bɔbə̄sí ń ndi dɔ rā̰ tə́ ní adə̄də́ yá̰a̰ kəsa! Sḭḭ̄ ī-tɔyī yel̄ gə̄ sa̰y ngá̰ý aĺ a?

Ī-lōōī kɔsə dɔ dūbə̄ yá̰a̰ kənge yāsí gə̄ kə̄ naā tə́ dɔ nang tə́ laā. Tām̄ dɔ nang tə́ laā kārā a əhɔ ō, yō̰ gə̄ a o̰o̰n̄ kɔ̄ɔ́ ō, ngé ɓogə gə̄ a mbútə̄n̄ kum ndogə̄ mbal̄ yā kɔyń ō. Ba ī-kánī yá̰a̰ kənge yāsí gə̄ dɔ naā tə́ dɔ rā̰ tə́. Tām̄ dɔ rā̰ tə́ ní a əhɔn̄ kārā aĺ ō, yō̰ gə̄ a o̰o̰n̄ aĺ ō, ngé ɓogə gə̄ a mbútə̄n̄ loo yā kɔyń aĺ ō. Tɔdɔ̄ loo ń yá̰a̰ kənge yāí i tū tə́ ní, kemií i tū tə́ ō.

De kə́ asə rāā kəla yā kɔ́ɔ̄n gə̄ jōó mbak gətóo. Ré ni a im̄ kə́ kógə̄ḿ ba a táŕ kə́rēý, aĺ ɓáa a əhɔ gō nge kə́ kógə̄ḿ ba a kídə̄ kə́rēý. Sḭḭ̄ ásiī rāā kəla yā Nə́ɓā ō, yā nar ō, naā tə́ mbak alé.

Sḭḭ̄ ngé taā kem kə́ mámák aĺ gə̄ ń toō, ré Nə́ɓā əla kūbə̄ kə́ majə tītə̄ ń noō rɔ̄ mu ń ra bembeé ɓōólaā ba bírí anī ənīnən̄ kum hor tə́ kɔ̄ɔ́ ní anī, sḭḭ̄ tá Nə́ɓā a adə̄sí kadə̄ tɔȳ loo ń noō aĺ a?

Ba ḭ̄ ré ā ādə̄ de kə́ nge rɔ̄ to ndoō yá̰á̰ ní a, ādə̄ madí kə́ ngɔr ngá̰ý rɔ̄í tə́ gə̄gē ger̄ gō alé, yā kadə̄ yá̰á̰ ń ādə̄n ní toń loo mundə̄ tə́ jəke. Anī Bɔbí ń i nge ka̰a̰ yá̰á̰ kə́ rāā loo mundə̄ tə́ jəke ní a əndā njaí.

Yá̰a̰ gə̄ kə́ kadə̄ ī-rāāī tá sḭḭ̄ i de kə́ súmūú gə̄ ta kum Nə́ɓā tə́ ní, ī-lōōī rāādə́ ta kum de gə̄ tə́ kadə̄ a̰a̰n̄sí. Ré ī-rāāī yá̰a̰ gə̄ ní i kadə̄ de gə̄ a̰a̰n̄sí anī, Bɔbə̄sí kə́ dɔ rā̰ tə́ a əndā njasí alé.

Dan ń ā ī-*ndiī ɓō tām̄ yā Nə́ɓā tə́ anī, ī-lōōī rāā dɔ kumsí kadə̄ síndə̄rī tītə̄ ń ngé gól̄ loo gə̄ a rāān̄neé ní. Nin̄-əhɔn̄ ndoō ngá̰ý kadə̄ de gə̄ gerə̄n̄neé kadə̄ na n-ndin̄ ɓō tām̄ yā Nə́ɓā tə́. Ādə̄ m-ə́dásí najə̄ kə́ bo ngá̰ý, nin̄-əngen̄ yá̰a̰ kəndā nja yādə́ kɔ̄ɔ́ ɓá. Ba ḭ̄, dan ń ā ī-*ndi ɓō tām̄ yā Nə́ɓā tə́ ní a, ī-rāā ítər dɔí tə́ ō, ī-tə́go kumií kɔ̄ɔ́ ō, kadə̄ de gə̄ gerə̄n̄neé na ī-*ndi ɓō tām̄ yā Nə́ɓā tə́ alé. I Bɔbí ń ndi kem loo kə́ to loo mundə̄ tə́ ní ngóy n a ger̄ ní. Loo ń noō tə́ Bɔbí ń i nge ka̰a̰ yá̰á̰ kə́ rāā loo mundə̄ tə́ jəke ní, a əndā njaí.