Popular Bible Verses from Ubwandilo 17

Share

Bo u Abulamu ali na maka 99, u MWENE akamubonekela nukumubuzya ukuti, “Ane ne Chala Uwamaka Ghosi. Unyivwilaye, sona bombagha chicho chigholosu.

Itabwa lyako lite likabe sona we Abulamu, loli we Abulahamu, pakuti indi pakukupela pakuba munyenya uwa inko inyinji nkani.

Ulufingo lwane ulwa bwila na bwila lukwiza pakwikala pakasi papako nane, sona napa baluko lwako ni nkulilo zyosi izya muntazi. Nkwiza pakuba ne Chala wako, sona nu Chala uwa baluko lwako.

“Ulufingo lulo indi pakufingana nawe lo ulu: Nkukulayizya ukuti ukwiza pakuba we munyenya uwa inko inyinji nkani.

Loli u Chala akamwamula akati, “Awe, umuchi wako u Sala weyuyo akwiza pakukupapila umwana umulumendo, po ukwiza pakumwita ukuti we Yisaki. Nkwiza pakusunga ulufingo lwane nawe, sona na baluko lwache. Ulufingo lunulu ulwa bwila na bwila.

Nkwiza pakukupa awe poka na baluko lwako ichisu ichi awe we muyeni. Ichisu chosi icha Kenani chikwiza pakuba cha baluko lwako bwila na bwila, sona nkwiza pakuba ne Chala wabo.”

Po u Abulahamu akafughama, akaseka nukuti, “Mwebaya mwee, nkimba chingabombiwa ukuti umwanavuli yuyo ali na maka 100, apape umwana? Nkimba u Sala yuyo ali na maka 90 angapapa umwana?”

U Chala akamubuzya Abulahamu akati, “Ukwanda ilelo utakamwitizyanjepo sona umuchi wako itabwa ilya Salayi, loli umwitizyanje ukuti we Sala.

Ukwanda ilelo umwana wesi umwanavuli asilimuliwanje. Ichi chikwiza pakuba chimanyilo icha lufingo lulo luli pakasi papane namwe.

Loli nkwiza pakusunga ulufingo lwane lulo nkafinga nu mwana wako u Yisaki, yuyo u Sala akwiza pakukupapila mumwaka uwa ndabi pakabalilo ngati kanaka.”

Umwana wesi umwanavuli asilimuliwanje, bo ghachilapo amasiku eyiti. Umwanavuli wesi munkulilo yinyu, manyi mwana yuyo apapiwa mo munyumba yako, pamo umuzya yuyo aghuliwa pakasi pa bayeni. Umwanavuli wesi asilimuliwanje, sona chinichi chikwiza pakuba chimanyilo ichakubombiwa pamabili ghinyu pakulanjizya ukuti ulufingo lulo luli pakasi papane namwe lwa bwila na bwila.