Popular Bible Verses from Joon 21

Share

Wosamujuko tov me'no nopino sumaveyokwe Jisasol Saimoon Pitallu aro kuudokaikono. “Joonolluro muugunyo Saimoonoloo, gumoro mino kalo buuropino gujunodowodo tov a'mwo pworavuro mino kalo buuropino winodupudo tovi dukuuwolo'mwallo?” Kuudoganokaikono. Toro kuudoganoka tovi Pital kuudokaikono. “Agutoloo, tade. Nuu gumino kalo buuropino nyunodowodo tovino guu kuudo me'no youronuma'dumdekugono.” Toro kuudoka tovi Jisasol kuudokaikono. “Guu moro sipsip taiyo tobuurobusuko tonyu wosamujuko neya javogawono.” Kuudokaikono. Aki lukomgu Jisasol aiko te aro kuudoganokaikono. “Joonolluro muugunyo Saimoonoloo, guu mino kalo buuropino gujunodowodekudeyo?” Toro kuudoganoka tovi Pital kuudokaikono. “Agutoloo, tade. Nuvu gumino kalo buuropino nyunodowodo tovino guu kuudo me'no youronuma'dumdekugono.” Toro kuudoka tovi Jisasol kuudokaikono. “Guu moro sipsip tobuurai domoduvomwalogawono.” Kuudokaikono. Aki lukomgu Jisasol pugasal puga toga aiko te aro kuudoganokaikono. “Joonolluro muugunyo Saimoonoloo, guu mino kalo buuropino gujunodowodekudeyo?” Kuudoganokaikono. Toro kuudoganoka toga'no'gwowi Pital jul'nyo subwosunokaikono. Su tov aro tovinokwono. Jisasolluro aro kuudoka tov, “Guu mino kalo buuropino gujunodowodekudeyo,” pugasal puga kuudoganoka su tovino Pital jul'nyo subwosunokaikono. Toro ibwosunyuno sumaiyokwe aro kuudokaikono. “Agutoloo, guu yiuwi'nokai noonyumwonyu tonyuno kuudo me'no youroma'dumdekugono. Toro tooku moro gumino kalo buuropino nyunodowodo su tovino kuudo me'no yanuu'dumdekugono.” Kuudokaikono. Toro kuudoka toollu Jisasol aro kuudokaikono. “Guu moro sipsip tobuurai wosamujuko neya duuwiyogawono.” Kuudokaikono.

Jisasol toro wuujuno sumaiyokwe aki aro kuudokaikono. “Nuu nebal'no kuunodo aro gudumo'mokwono. Guu muugunyo mwalodumdo toga guvnokwe tooku youro tov iro'nodum gumi kuudo yau'dore tomuu yomollodumdekugono. Toro kuvi kuruv guu yadaiyo sumo'nubi toga'no'gwowi gumoro ato tovallu wuulo galogulloso'moneyokwe noruuguusapibinekugono. Aki su toga a'mwo pworo gumi youro tov nomollagubwepinekugono. Toro mollagubweyopi guu novlaiyo'mo magujunodowo'jure tomuu nogumokavlapinekugono.” Kuudokaikono.

Toro toonollu Jisasol anekudokaikono. “Kevu domwoga kuurowabwollo'moneyokwe kuto tov boot tovuro anato tomgu'aro wonyo buugo tovi doolowopiyoulo. Toro kwolowopiyapi toga domwoga pworai kuvinono luve'nomapinorekikono.” Anekudokaikono. Toro te uumjunyokwe toonol Jisasolluro anekudoka tomgu'aro nemi domwoga kuurowabwollo'moneyokwe kuto tov wonyo buugo tovi kwolowopiyawonogano. Toro kwolopiyawo togasuro to'gwowi domwoga bwotonyago tooro awaroporogano. Toro pwa'dopure toga kuto tov jul'nyo bwotonyo soka tovino tov ku'nono maluve'nomarowonogano.

Toro toonol mwalno sumawoneyokwe Saimoon Pital uumjunyokwe gabovo toorai aro kuudokaikono. “Nuvu domwoga kuurowabwollo'moneyokwe pla'mo'monyugono.” Toro kuudoka toollu uumjunyokwe gabovo su tooro kuudoporogano. “Oo nevu domwoga kuurowabwollo'mo guuge novlawanonogano.” Kuudoporogano. Toro wuujuno sumaveyokwe yiuwi'nokai toonol plavowono boot puvi ilomwalno sumawoneyokwe wonyo buugo tovi kuuwowonogano. Toro kuvi kuruv surakuuto su toga domwoga pwolnodo kwol kuruv maluvomarowonogano.