Popular Bible Verses from Gálatas 6

Share

Ja' yu'un mu me xijlubtsajutic ta spasel li c'usitic leque. Yu'un tsta yorail chc'ot jc'ajbetic sat, me muc xchibaj co'ntontic ta spasele.

Ja' yu'un jpastic c'usi lec ta stojol scotol cristianoetic ti c'alal ja' yoraile. Pero ja' ech'em to tsc'an ta jpastic ta stojol li boch'o co'ol jch'unojtic Dios jchi'uctique.

Tsc'an talbat chacolta abaic ta xcuchel li avocolique, yu'un jech chach'unbeic o smantal li Cristoe.

Mu me xalo'la abaic. Yu'un li Diose mu xu' chlabanat. Li c'usi tsts'un jujun cristianoe ja' chc'ot sc'aj.

Li boch'o ja' no'ox ta sts'un c'usi tsc'an sbec'tale, ja' chc'ot sc'ajbe sat li c'usi tsc'an sbec'tale, ja' li ch'ayele. Yan li boch'o ja' tsts'un c'usi tsc'an Ch'ul Espiritue, ja' chc'ot sc'ajbe sat li yabtel Ch'ul Espiritue, ja' li cuxlejal sbatel osile.

Quermanotac, me oy boch'o ich'ay ta bee, vo'oxuc ti ventainbil avo'ntonic yu'un Ch'ul Espiritue, bat coltaic ta smuc'ul avo'ntonic. Q'uelo me abaic jujunoxuc, yu'un xu' jech chtal preva ta atojolic ec.

Yu'un li boch'o tsnop lec xu' yu'un, pero me mu meleluque, tslo'la sba stuc. Ja' yu'un, jujunoxuc tsc'an chaq'uelic lec c'u x'elan avabtel atuquic. Jech xu' chanop ti lec xu' avu'unique; mu me ja'uc no'ox xaq'uelbe yabtel yan. Yu'un jujunutic ja' cu'un jtuctic li c'usi ta jpastique.