Popular Bible Verses from Colosenses 2

Share

Ta sventa ti laj xa avich'ic ta muc' li Cajvaltic Jesucristoe, te me oyanic o ta stojol. Ac'o lec avibelic, ac'o lec anaclebic ta stojol ta sventa li xch'unojel avo'ntonique. Ja' me pasic o ti c'u x'elan laj avich'ic chanubtasele. Tojbeic me ta vocol scotol c'ac'al.

Q'uelo me abaic, mu me xaslo'laoxuc li boch'otic bij scuyoj sbaique, ti mu meleluc c'usi chalique, ti stalel no'ox cristianoetique, ti sventa no'ox banamile, yu'un mu ja'uc ta sventa li Cristoe.

Ac'o me chamenoxuc to'ox ta scoj li amulique xchi'uc ta sventa li c'usi tsc'an abec'talique, pero li' ta orae co'ol xa laj yac' cuxianic xchi'uc li Cristoe. La spasboxuc perdón yu'un scotol li amulique. La slajesbe sc'oplal noxtoc li mantaletic ti ja' ta sventa ep la jta o jmultic ta stojol Diose. La slajesbe yip, laj yac' ta joc'anel ta cruz.

Yu'un li Cristoe yich'ojbe scotol c'u x'elan stalel li Diose. Ja' no'ox jech li vo'oxuque avich'ojbeic xa scotol stalel ec li Diose, yu'un oyoxuc xa ta stojol li Cristo ti ja' tspas ta mantal scotol li pucujetic ti tsots tspasic mantale ti tsots svu'elique.

Ja' yu'un mu me xatuc'ulanic me oy boch'o oy c'usi chayalboxuc ta sventa li ve'liletique, ta sventa li c'usitic chcuch'tique, ta sventa li sc'ac'alil q'uinetique, ta sventa li sepet ue, xchi'uc ta sventa li cuxub o'ntonale. Yu'un scotol le'e ja' no'ox senyail laj yich' pasel ta sventa li Boch'o sc'oplal chtale, ja' mero sc'oplal li Cristoe.