Popular Bible Verses from మత్తయ్ 6

Share

గని పేలె అమ్నె రాజ్యం కలెక అని నీతిన్ సటీ జట్టిలూర్; అపుడ్ అదా సిమ్కన దెయ్యం ఇముంఙ్ సియాద్.

వేగెడీతదున్ బదోల్ విచార్ కన్నెర్. వేగెడీతద్ వేగెడి. ఏ జీర్తదుంఙ్ ఆజిరి తక్లిబ్ ఆజిరి ఎరాద్.

అదుంఙ్ ఎత్తి అన్ ఇడ్డెకద్‍ తానెద్ ఇంత్తె, ఇమ్మె పానం తినెకదున్‍ బదోల్ ఎక్కద్, ఇమ్మె సరిరుంఙ్ తొడెకా జుఙ్ఙెలున్ బదోల్ ఎక్కద్ విచార్ కన్నెర్. అంబలుంఙ్ ఎన కిమ్మతాద్ పానం, జుఙ్ఙెలున్ ఎన, కిమ్మతా సరీర్ ఎరెవా!

అనంఙ్ ఎరతె నీర్ నీర్ పార్తన కాలేఙ్ ఇమ్మె ఎల్లత కోలి లోప సెత్న కవాడ్ గెత్తుత్న మన్కకేరుంఙ్ కండ్కెర్సెట ఇమ్మె బానుంఙ్ పార్తన కలూర్. మల్ల మన్కకెరుంఙ్ ఒర్కి తోసెట నీర్ కత్త ఇమ్మె పనిక్లున్ ఓలుత్న ఇమ్మె బాంద్ ఇముంఙ్ కుల్కడ్ సియ్సాంద్.

మల్ల నీర్ ఇనంఙ్ పార్తన కలుర్, పరలోకముత్ అనెకా అమ్మె దెయ్యం బాంద్, ఇన్నె పేర్ పవిత్రనాడ్ మాన్ ఎక్కాద్. ఇన్నె రాజ్యం కలెక వాకత్. పరలోకముత్ ఎరెకద్ లంఙ్ బూమిత్‍నాయ్ ఇన్నె మంతా ఎక్క.

అమ్మె రోజి తా నిపట్టెన్ ఇన్నెడ్ అముంఙ్ కో.

అముంఙ్ కర్జ ఎత్న మాప్ కలెకరున్ మాప్కల్ అమ్ సుక్కితమొ అనాయ్ అమ్మె పాపులుంనయ్ సుక్కిల్తం అమ్మెనయ్ సుక్కిప్

అమున్ పరిక్సత్ రాలెంఙ్ ఇడ్నెమ్ గని దుస్మన్ తనట్ అమున్ సొడప్. తనుంఙ్ ఇనత్తి రాజ, సక్తి అని మాన్ ఎపుడి అనెకాది ఇనత్తి అన్సాద్ ఆమెన్.

మన్కకెరె గలతులున్ నీర్ మాప్కల్ కత్తిరింత్తె పరలొకముత్ అనెకా ఇమ్మె బాంద్ ఇమ్మె గలతులున్ మాప్ కల్సాంద్.

ఆబార్‍ పొయ్‍ తులెకా పిట్టలున్ ఓలుర్. అదా వితనం విత్తుత్న పంటన్ పండిపె. దానెలున్ గుమ్మిత్ వాఙుత్ ఇడే. గని అదవుఙెన ఎన పరలొకముత్ అనెకా ఇమ్మె బాంద్ అదవ్లుంఙ్ తినెంఙ్ సియ్సాద్. నీర్ అదవుంఙ్ ఎన కిమ్మతార్ ఎరెరా!

నీర్ బూమిన్ పొయ్ ఇముంఙ్ సటీ సంపదాన్ మిరపూత్ ఇడెంఙ్ తోద్. ఇత్తి సెదా తినూత్ నుస్సి తిందా, అని డొంఙ వత్ కొస్సార్. పరలోకముత్ ఇముంఙ్ సటీ సంపదాన్ ఇడుర్, అత్తి సెదాల్ తినెద్, నుస్సి తినెద్, డొంఙ్ కొసెర్. తానుంఙ్ ఇంతె ఇమ్మె సంపదాన్ ఎత్తి అండె ఎప్పుడి ఇన్నె మన్ అత్తిని అన్సాద్.

ఒక్కొంది గడియక్ ఇద్దర్ మాల్కకెరె పని కలెంఙ్ సాలెంద్. అనంఙ్ కత్తె అముదు ఒక్కొనున్ ప్రేమ్‌ కద్దాంద్ పెనొక్కొనున్ ప్రేమ్ కలెంద్. తోదింతె ఒక్కొనె పనిన్ నమిప్దాంద్ అని, ఇంక్కొకొనున్ నమిప్సెటందాన్. నీర్ దెయ్యముంఙ్‍, అని పైసెలుంఙ్ సెవాకల్సాత్ ఇన్నెకద్ సోయ్‍ తోద్.

ఇనెడ్ ఇడూత్ వెగేడ్ కిసుత్ జొపిడెకా ఈ గడ్డి దెయ్యం అంతె సోయ్‍ ఓల్‍త్తె ఇమున్ ఇంకా ఎత్తె సోయ్ ఓల్‍దంద్ ఎరా! ఇముంఙ్ ఉసుటినాయ్ విస్వాసం తొతెంద్.

గని నీర్ సియెకద్ సియెంఙ, ఇన్నె వెంట తరుంఙ్ ఒర్కి ఎరెంఙ్ తోద్. అనాయ్ నీర్ నాయ్ ఒర్కితోసెట సియెంఙ్. అపుడ్ ఎరుఙి ఒర్కితోసెట నీ కత్త పనిన్ ఓలుత్న ఇమ్మె బాంద్ ఇముంఙ్ కుల్కడ్ సియ్‍దాంద్.

ఉసారడ్ అండ్రు! దెయ్యముంఙ్ ముండట్ ఇమ్మె మన్నాడ్ నీతి పనిక్ కలెఙ మన్కకెర్ ఓలెంఙ్ ఇసా ఔరున్ ముండట్ కలెంఙ్ తోద్. ఆనంఙ్ నీర్ కత్తిరింతె, పరలోకముత్ అనెక ఇమ్మె బానత్తన ఇముంఙ్ తనయ్ కుల్కడ్ రొంబాడెద్.

కప్టిక్ ఉపాస్ కలెంఙ్ మంది ఓలెంఙ్ ఇసా తమ్మె మోకలున్‍ నారాజడ్ అప్‍దార్. నీర్ ఉపాస్ కలెంఙ ఇనంఙ్ కలుర్. ఇద్ సత్తెం, ఔరుంఙ్ పాజె అదున్ సుమ్‍త్తెర్. పేనా తనయ్ రొబాడెద్. నీ ఉపాస్ అనేఙ ఉపాస్ మన్కకెరుంఙ్‍ కన్కెర్సెట ఇమ్మె మొకమ్ ఒడుత్న, తలుత్ నూనె దీటుర్. అనంఙ్ కత్తిరింత్తె, నీర్ ఉపాస్ కలెకార్ లంఙ్ మందింఙ్ కండ్కెరెద్. గని కన్కెర్సెటా ఇమ్మె బానుంఙ్ మాత్రమ్ నీర్ ఉపాస్ సుమ్‍సార్ ఇసా ఒర్కి. అదుంఙ్ ఎత్తి కారేఓల్‍త్తె ఇమ్మె బాంద్ ఇముంఙ్ పలం సియ్దాంద్.