Popular Bible Verses from Apostel isht Anumpa 20

Share

Yakohmit toksahanli hosh ilbʋsha puta ka hʋsh apelʋcha he tuk, micha Chitokaka Chisʋs im anumpa puta, yʋmmak okʋt, Ima kak osh na yukpa kʋt habena ka, i̱ shahli hoke, achi tok a̱ hʋsh ithaiyana chi̱ ka mominchit hʋchim anohonli li chatuk oke; im ahanchi tok.

Yohmi kia nan ilʋppa puta kʋt achʋfona kia ik sa folulechoshke, micha na yukpa hosh a̱ nitak ma, micha nan isht ʋtta Chihowa achukma ka anoli, ʋbanumpa im abʋchi la he, Chitokaka Chisʋs a̱ ai im ishi li tuk ʋt atahli la chi̱ kʋt, ʋm ilhfiopak a̱ a̱ holitopa ak ai ahnoshke.

Yʋmohmi hoka hʋchishno akinli, micha nan iaka̱ya ʋhleha moma, Shilombish Holitopa yʋt mihi yo̱ apesʋchi puta hʋch ikbi tok a̱, ahah! ahnit Chihowa im iksa puta ilap im issish akinli ho̱ isht chumpa tok a̱, mominchit hʋsh pehlichashke.

Inta! il itibapishi ʋhleha ma! Chihowa, micha ilap o̱ achukma isht anumpa aiena, yʋmmak osh ai a̱hlichit hʋchi hiohlicha hinla, mikmʋt hochukma toba tok ʋhleha moyuma ka ai itin takla ya̱, ai ʋttʋt hʋch ima he ʋlhpiesa mak o̱, yʋmma ibbak a̱ pit hʋchi fohki lishke.